અમદાવાદ પાલિકાની સામાન્ય સભામાં 'બુરખા' વિવાદ

અમદાવાદ મહાનગરપાલિકાની સામાન્ય સભા દરમિયાન બુરખા મુદ્દે તીવ્ર વિવાદ ઉભો થયો હતો. મકતમપુરા વોર્ડની AIMIM મહિલા કોર્પોરેટર જૈનબ બીબી હિજાબ પહેરીને મુદ્દાઓ રજૂ કરવા ઊભી થઈ હતી. તે સમયે ખાડિયા વોર્ડની ભાજપ મહિલા કોર્પોરેટર ગીતાબેન પરમારે બુરખો હટાવીને બોલવા કહ્યું હોવાનો આક્ષેપ થયો, જેને કારણે સભામાં તણાવ સર્જાયો.

જૈનબ બીબીએ જણાવ્યું કે સામાન્ય સભા પ્રજાના પ્રશ્નો ઉકેલવા માટે છે, પરંતુ પહેરવેશ પર સવાલ ઉઠાવવો બંધારણીય અધિકારોનો ભંગ છે. તેમણે આ ટિપ્પણીને મહિલાની પ્રતિષ્ઠાને ઠેસ પહોંચાડનાર ગણાવી હતી. બીજી તરફ ગીતાબેન પરમારે પોતાનો બચાવ કરતાં કહ્યું કે તેઓ માત્ર બોલનારની ઓળખ સ્પષ્ટ રહે તે માટે બુરખો હટાવવાની વાત કરી હતી, ધાર્મિક મુદ્દો ઉભો કરવાનો તેમનો હેતુ નહોતો.

સભા દરમિયાન પ્રજાના મુખ્ય મુદ્દાઓ પર ચર્ચા થવાને બદલે બુરખા વિવાદ છવાયો રહ્યો. વિપક્ષે શાસક પક્ષને પ્રદૂષિત હવા, ઇલેક્ટ્રિક વાહનના ઓછા ઉપયોગ, વ્હાઇટ ટોપિંગ માર્ગો અને ભ્રષ્ટાચાર જેવા મુદ્દાઓ પર ઘેરવાનો પ્રયાસ કર્યો.
વિપક્ષના નેતાએ જણાવ્યું કે શહેરમાં એર ક્વોલિટી ઇન્ડેક્સ 200ને પાર પહોંચ્યો છે, છતાં એએમસી યોગ્ય પગલાં નથી લઈ રહ્યું. છેલ્લા પાંચ વર્ષમાં એર ક્વોલિટી સુધારવા માટે 546 કરોડ ખર્ચાયા છતાં હવાની ગુણવત્તા સુધરી નથી.

સભામાં સતત વિવાદ અને આક્ષેપો વચ્ચે પ્રજાના મૂળ પ્રશ્નો પાછા છૂટી જતા જોવા મળ્યા હતા.