અમેરિકી SCનો ચુકાદો: ભારત પર હવે 10% ટેરિફ

અમેરિકાના પ્રમુખ ડોનાલ્ડ ટ્રમ્પની મહત્વાકાંક્ષી ટેરિફ નીતિને યુએસ સુપ્રીમ કોર્ટ તરફથી મોટો કાનૂની ફટકો પડ્યો છે. અદાલતે ટ્રમ્પ દ્વારા લાદવામાં આવેલા વ્યાપક ટેરિફને ગેરબંધારણીય ગણાવતા હવે ભારત સહિત વિશ્વના દેશો પરના વેપાર શુલ્કમાં મોટો ઘટાડો નોંધાયો છે. ભારત પર અગાઉ નક્કી કરવામાં આવેલ 18% ટેરિફ હવે ઘટીને 10% થઈ જશે.

શું છે સુપ્રીમ કોર્ટનો ચુકાદો?

6 વિરુદ્ધ 3ના મતોથી સુપ્રીમ કોર્ટે ઠેરવ્યું છે કે 1977નો કાયદો (IEEPA), જેનો સહારો લઈને ટ્રમ્પ વ્યક્તિગત દેશો પર ટેરિફ લાદતા હતા, તે પ્રમુખને આ પ્રકારની સત્તા આપતો નથી. ચીફ જસ્ટિસ જોન રોબર્ટ્સે સ્પષ્ટ કર્યું કે ટેરિફ લાદવાની સત્તા માત્ર કોંગ્રેસ પાસે છે. આ ચુકાદાથી ટ્રમ્પના અગાઉના 18% ટેરિફનો કાનૂની આધાર જતો રહ્યો છે.

ટ્રમ્પનો વળતો પ્રહાર

કોર્ટના ચુકાદાથી રોષે ભરાયેલા ટ્રમ્પે તુરંત જ 'સેક્શન 122' હેઠળ નવો આદેશ બહાર પાડ્યો છે. આ નવા આદેશ મુજબ, હવે તમામ આયાતી માલ પર 10% ટેરિફ લાદવામાં આવશે.

જોકે, આ ટેરિફ 150 દિવસ માટે કામચલાઉ છે. ટ્રમ્પે સોશિયલ મીડિયા પર કહ્યું કે, "આ આદેશ તાત્કાલિક અસરથી લાગુ થશે."

ભારત-અમેરિકા વેપાર પર શું અસર?

ટેરિફમાં ઘટાડો: ભારતીય ચીજવસ્તુઓ જે અગાઉ 18% શુલ્ક ચૂકવવાની હતી, તેના પર હવે માત્ર 10% ટેરિફ લાગશે.

ભારત સાથેની ડીલ અકબંધ: સુપ્રીમ કોર્ટના ચુકાદા બાદ ટ્રમ્પે કહ્યું કે, "ભારત સાથેના મારા સંબંધો શાનદાર છે. ભારત સાથેની વેપાર સમજૂતી ચાલુ જ છે, માત્ર તેને અમલમાં મૂકવાની રીત બદલાશે."

ફાર્મા સેક્ટરને રાહત: દવાઓ (Pharma) અને અમુક ખાસ સેક્ટરોને આ ટેરિફમાંથી મુક્તિ આપવામાં આવી છે, જે ભારત માટે મોટા સમાચાર છે.

નિષ્ણાતોના મતે, ગેરકાયદે ટેરિફ દ્વારા લેવામાં આવેલા અંદાજે 175 બિલિયન ડોલરનું રિફંડ આપવું પડી શકે છે. કેલિફોર્નિયાના ગવર્નર ગેવિન ન્યૂઝમે આને "ઇલીગલ કેશ ગ્રેબ" ગણાવી તુરંત વ્યાજ સાથે પૈસા પાછા આપવાની માંગ કરી છે.

ભલે ટ્રમ્પને કાનૂની હાર મળી હોય, પરંતુ તેમણે 10% ના નવા ટેરિફ દ્વારા પોતાનો એજન્ડા જાળવી રાખવાનો પ્રયાસ કર્યો છે. ભારતીય નિકાસકારો માટે આ મિશ્ર સમાચાર છે, કારણ કે શુલ્ક ઘટ્યા છે પરંતુ ટેરિફ હજુ પણ 1946 પછીના સૌથી ઊંચા સ્તરે છે.