અંડર-19 વર્લ્ડ કપના હીરો મનજીત કાલરાની ધરપકડ!

ભારતના ભૂતપૂર્વ અંડર-19 ક્રિકેટર અને જાફના કિંગ્સના સહ-માલિક મનજોત કાલરાની શ્રીલંકામાં લંકા પ્રીમિયર લીગ (LPL) 2026 દરમિયાન કથિત ભ્રષ્ટાચારના સંબંધમાં ધરપકડ કરવામાં આવી છે. તેમના પર એક ખેલાડીને મેચ ફિક્સ કરવા માટે ઉશ્કેરવાનો આરોપ છે. અન્ય એક ભારતીય યુવરાજ પુષ્પાની પણ ધરપકડ કરવામાં આવી છે. શ્રીલંકા ક્રિકેટે તપાસમાં સંપૂર્ણ સહયોગ આપવાની અને ટુર્નામેન્ટની નિષ્પક્ષતા જાળવવાની ખાતરી આપી છે.

સ્થાનિક મીડિયા અહેવાલો અનુસાર 27 વર્ષીય કાલરા પર એક ખેલાડીને મેચ ફિક્સ કરવા માટે ઉશ્કેરવાનો આરોપ છે. શુક્રવારે રમતગમત સંબંધિત ગુનાઓ નિવારણ માટે પોલીસના સ્પેશિયલ ઇન્વેસ્ટિગેશન યુનિટ (SIU) દ્વારા તેની ધરપકડ કરવામાં આવી હતી. પોલીસના જણાવ્યા અનુસાર, ટુર્નામેન્ટની છઠ્ઠી સીઝન શરૂ થવાના થોડા કલાકો પહેલા જ ધરપકડ કરવામાં આવી હતી.

પીટીઆઈના અહેવાલ મુજબ, ધરપકડ બાદ કાલરાને મેજિસ્ટ્રેટ સમક્ષ રજૂ કરવામાં આવ્યો હતો. જ્યાં કોર્ટે તેમને 31 જુલાઈ સુધી ન્યાયિક કસ્ટડીમાં મોકલ્યો હતો. આ કેસના સંદર્ભમાં અન્ય એક ભારતીય નાગરિક યુવરાજ પુષ્પાની પણ ધરપકડ કરવામાં આવી છે. કોર્ટે તેની ન્યાયિક કસ્ટડીનો પણ આદેશ આપ્યો હતો.

સમગ્ર ઘટનાક્રમ વચ્ચે શ્રીલંકા ક્રિકેટ (SLC) એ સ્પષ્ટતા કરી હતી કે આ ધરપકડોથી લંકા પ્રીમિયર લીગ 2026 પર કોઈ અસર થશે નહીં. બોર્ડે જણાવ્યું હતું કે, તે તપાસ એજન્સીઓને તમામ શક્ય સહયોગ પૂરો પાડશે અને ટુર્નામેન્ટની પારદર્શિતા અને ન્યાયીતા જાળવવા માટે સંપૂર્ણપણે પ્રતિબદ્ધ છે.

શ્રીલંકા ક્રિકેટે તેના નિવેદનમાં જણાવ્યું હતું કે, LPL 2026ના આયોજક તરીકે તે ટુર્નામેન્ટની અખંડિતતા અને વિશ્વસનીયતાનું રક્ષણ કરવા માટે સંપૂર્ણપણે પ્રતિબદ્ધ છે. બોર્ડે પુનરોચ્ચાર કર્યો હતો કે લીગ સાથે સંકળાયેલા કોઈપણ હિસ્સેદાર દ્વારા ભ્રષ્ટાચાર, અયોગ્ય વર્તન અથવા કોઈપણ પ્રકારની ગેરવર્તણૂકને સહન કરવામાં આવશે નહીં.

બોર્ડે જણાવ્યું હતું કે, ટુર્નામેન્ટ ઉચ્ચતમ નૈતિક અને પારદર્શક ધોરણો અનુસાર યોજાય તે સુનિશ્ચિત કરવા માટે તમામ જરૂરી પગલાં લેવામાં આવ્યા છે. લીગના ભ્રષ્ટાચાર વિરોધી માળખાને મજબૂત બનાવવા માટે SLCનું ભ્રષ્ટાચાર વિરોધી એકમ સરકારના સ્પેશિયલ ઇન્વેસ્ટિગેશન યુનિટ (SIU) સાથે સતત નજીકથી કામ કરી રહ્યું છે.

મનજોત કાલરાએ 2018ના ICC અંડર-19 વર્લ્ડ કપ ફાઇનલમાં સદી ફટકારીને ભારતને જીત અપાવી હતી. તેની મેચ વિનિંગ ઇનિંગે ભારતને ટાઇટલ જીતવામાં મદદ કરી હતી. ક્રિકેટથી દૂર થયા પછી તે રમતગમતના વ્યવસાય તરફ વળ્યો અને આ વર્ષે જાફના કિંગ્સ ફ્રેન્ચાઇઝમાં રોકાણ કર્યું. તેનો સહ-માલિક બન્યો. LPL 2026 દરમિયાન તેની ધરપકડથી ક્રિકેટ જગતમાં ખળભળાટ મચી ગયો છે.

ટુર્નામેન્ટના પહેલા દિવસે ધરપકડ
જાફના કિંગ્સ અને ગેલ ગેલેન્ટ્સ વચ્ચે LPL 2026 ની શરૂઆતની મેચ કોલંબોના SSC ગ્રાઉન્ડ્સ પર રમાનારી હતી. તે પહેલા ધરપકડ કરવામાં આવી હતી. પાંચ ટીમોની ટુર્નામેન્ટમાં 24 મેચનો સમાવેશ થાય છે અને તે 8 ઓગસ્ટ સુધી ચાલશે. આ વર્ષની શરૂઆતમાં અન્ય ફ્રેન્ચાઇઝ માલિકને લાંચ લેવા બદલ સજા ફટકારવામાં આવી હતી.

શ્રીલંકાના ખેલાડીઓની ફરિયાદ બાદ કાર્યવાહી કરવામાં આવી
શ્રીલંકન પોલીસના જણાવ્યા અનુસાર, કાલરા પર લંકા પ્રીમિયર લીગ સાથે સંકળાયેલા ખેલાડીને પૈસા ઓફર કરવાનો આરોપ છે. તપાસ એજન્સીઓએ જણાવ્યું હતું કે, સવાલમાં રહેલા ખેલાડીએ લગભગ 10 દિવસ પહેલા અધિકારીઓને કથિત ઓફરની જાણ કરી હતી. કોર્ટને જાણ કરવામાં આવી હતી કે, ભાનુકા રાજપક્ષે, અવિષ્કા ફર્નાન્ડો, દુનિથ વેલાલેજ અને અન્ય બે ખેલાડીઓએ ફરિયાદ નોંધાવી હતી.

2018 અંડર-19 વર્લ્ડ કપ ફાઇનલમાં સદી ફટકારી
મનજોત કાલરા 2018 અંડર-19 વર્લ્ડ કપમાં ભારતની ટાઇટલ જીતનો હીરો હતો. તેણે ન્યૂઝીલેન્ડના માઉન્ટ મૌંગાનુઈમાં ઓસ્ટ્રેલિયા સામેની ફાઇનલમાં અણનમ 101 રન બનાવ્યા. ભારતે 38.5 ઓવરમાં 217 રનનો લક્ષ્યાંક હાંસલ કરીને ચોથી વખત અંડર-19 વર્લ્ડ કપ જીત્યો. ટીમના કોચ રાહુલ દ્રવિડ હતા અને કેપ્ટન પૃથ્વી શો હતા. જ્યારે શુભમન ગિલ, શિવમ માવી, કમલેશ નાગરકોટી અને ઇશાન પોરેલ પણ ટીમનો ભાગ હતા.

IPL અને સ્થાનિક ક્રિકેટમાં તક ન મળી
અંડર-19 વર્લ્ડ કપમાં પ્રભાવશાળી પ્રદર્શન પછી તેને IPL 2018 ની હરાજીમાં દિલ્હી ડેરડેવિલ્સ (હવે દિલ્હી કેપિટલ્સ) ટીમમાં સામેલ કરવામાં આવ્યો હતો. જો કે, તેને ઘણી તકો મળી ન હતી. તેણે દિલ્હી માટે ફર્સ્ટ-ક્લાસ, લિસ્ટ A અને T20 ક્રિકેટ પણ રમી હતી.

રણજી ટ્રોફીમાં પણ એક વર્ષ માટે સસ્પેન્ડ થયો હતો
અંડર-19 વર્લ્ડ કપમાં ટીમ ઈન્ડિયાને જીત અપાવનાર મનજોત કાલરા પર છેતરપિંડી બદલ એક વર્ષનો પ્રતિબંધ મૂકવામાં આવ્યો હતો. મનજીત કાલરાને અંડર-16 અને અંડર-19 માં ઉંમરમાં છેતરપિંડી કરવાના આરોપસર DDCA લોકપાલ દ્વારા એક વર્ષ માટે રણજી ટ્રોફીમાં રમવાથી સસ્પેન્ડ કરવામાં આવ્યો હતો. BCCIના રેકોર્ડ મુજબ કાલરા 20 વર્ષ અને 351 દિવસનો હતો. તે સમયે બંગાળ સામે દિલ્હી અંડર-23 માટે રમ્યો હતો. જેમાં 80 રન બનાવ્યા હતા. તેની રણજી ટીમમાં શિખર ધવનની જગ્યાએ રમવા માટે પસંદગી થવાની હતી.