ટ્રમ્પના સૂર બદલાયા: ઈરાન સાથે ડીલના સંકેત

અમેરિકા અને ઈઝરાયલના ઈરાન સાથે ચાલી રહેલા ભીષણ સંઘર્ષ વચ્ચે અમેરિકન પ્રમુખ ડોનાલ્ડ ટ્રમ્પે ફરી એકવાર પોતાના નિવેદનથી વિશ્વભરના રાજદ્વારીઓને ચોંકાવી દીધા છે. હંમેશા આક્રમક વલણ અપનાવતા ટ્રમ્પે હવે ઈરાનના લોકોની પ્રશંસા કરવાનું શરૂ કર્યું છે અને યુદ્ધ વિરામ માટે મધ્યસ્થી અથવા મોટી ડીલના સંકેતો આપ્યા છે.

ઈરાની લોકો શક્તિશાળી અને કુશળ વાટાઘાટકારો: ટ્રમ્પ

તાજેતરના એક ઈન્ટરવ્યુમાં ડોનાલ્ડ ટ્રમ્પે ઈરાનના નાગરિકો પ્રત્યે સન્માન વ્યક્ત કર્યું છે. તેમણે જણાવ્યું કે ઈરાનના લોકો અત્યંત શક્તિશાળી છે અને મુશ્કેલ પરિસ્થિતિઓ સહન કરવાની અદભૂત ક્ષમતા ધરાવે છે. ટ્રમ્પના મતે ઈરાનીઓ મૂળભૂત રીતે લડાયક હોવા કરતા શ્રેષ્ઠ વાટાઘાટકારો છે. તેમણે સ્પષ્ટ કર્યું કે હવે ઈરાન સાથે ચર્ચા કરવાનો અને સમજૂતી કરવાનો યોગ્ય સમય આવી ગયો છે. તેઓ ટૂંક સમયમાં જ ઈરાન સાથે કોઈ મોટી ડીલ કરવા આતુર છે.

ઈઝરાયલ મારા આદેશોનું પાલન કરશે : 

યુદ્ધમાં ઈઝરાયલની ભૂમિકા અંગે વાત કરતા ટ્રમ્પે ભારે આત્મવિશ્વાસ સાથે જણાવ્યું કે ઈઝરાયલ એક ઉત્તમ ટીમ પ્લેયર છે. તેમણે દાવો કર્યો કે બેન્જામિન નેતન્યાહૂના નેતૃત્વમાં ઈઝરાયલની સરકાર અમેરિકાના નિર્દેશો મુજબ જ કામ કરશે. ટ્રમ્પના મતે, જ્યારે તેઓ યુદ્ધ રોકવાનો નિર્ણય લેશે, ત્યારે ઈઝરાયલ પણ લશ્કરી કાર્યવાહી તુરંત અટકાવી દેશે. આ નિવેદન દર્શાવે છે કે ટ્રમ્પ માને છે કે ઈઝરાયલ સંપૂર્ણપણે તેમના કહ્યામાં રહેશે.

અગાઉના વલણથી એકદમ વિપરીત નિવેદન : 

ટ્રમ્પનું આ નવું વલણ તેમના જૂના વલણ કરતા તદ્દન અલગ છે. અગાઉ તેઓ ઈરાન પ્રત્યે અત્યંત કઠોર હતા અને નેતન્યાહૂ સાથે મળીને સંયુક્ત નિર્ણય લેવાની વાત કરતા હતા. હવે તેઓ એકતરફી રીતે ઈઝરાયલ પર પોતાનું પ્રભુત્વ હોવાનું કહી રહ્યા છે. તેમણે એમ પણ ઉમેર્યું કે જ્યાં સુધી ઈઝરાયલને ઉશ્કેરવામાં નહીં આવે ત્યાં સુધી તેઓ શાંત રહેશે, પરંતુ જો અમેરિકા રોકાવાનું કહેશે તો તેઓ ચોક્કસપણે અટકી જશે.

ઓપરેશન એપિક ફ્યુરી અને વર્તમાન સ્થિતિ : 

નોંધનીય છે કે આ સંઘર્ષની શરૂઆત ફેબ્રુઆરીના અંતમાં થઈ હતી જ્યારે ટ્રમ્પ વહીવટીતંત્રે ઈરાન વિરુદ્ધ ઓપરેશન એપિક ફ્યુરી શરૂ કર્યું હતું. આ ઓપરેશન દરમિયાન ઈરાનના સર્વોચ્ચ નેતાની હત્યાના સમાચાર પણ વહેતા થયા હતા. જોકે, વહીવટીતંત્રમાંથી માહિતી લીક થવાને કારણે ટ્રમ્પ નારાજ થયા હતા અને તેમણે ઓપરેશનની ગતિ ધીમી કરવાના સંકેત આપ્યા હતા. હવે આ બદલાયેલા સંજોગોમાં ટ્રમ્પ યુદ્ધને બદલે ટેબલ ટોક એટલે કે વાટાઘાટોને વધુ મહત્વ આપી રહ્યા હોય તેવું જણાય છે.