જન્મ નાગરિકતા સમાપ્તીના નિર્ણયને ટ્રમ્પનો સપોર્ટ

અમેરિકી રાષ્ટ્રપતિ ડોનાલ્ડ ટ્રમ્પે ફરી એકવાર ઈમિગ્રેશન પર પોતાની આકરી નીતિ પર ભાર મૂક્યો છે, ખાસ કરીને જન્મસિદ્ધ નાગરિકતાને સમાપ્ત કરવાના તેમના વિવાદાસ્પદ નિર્ણય પર. પોલિટિકો સાથેની વાતચીતમાં ટ્રમ્પે દાવો કર્યો હતો કે, આ કાયદો, જે 1868માં લાગુ કરાયેલા અમેરિકી સંવિધાનના 14મા સંશોધન પર આધારિત છે, તે મૂળરૂપે અમેરિકન ગૃહયુદ્ધ પછીના સમયમાં પૂર્વ દાસ પરિવારોની સ્થિતિ સ્પષ્ટ કરવા અને તેમના બાળકોને નાગરિકતા આપવા માટે બનાવવામાં આવ્યો હતો. 

દેશ લાખો નવા લોકોને આશ્રય આપવાની ક્ષમતા ધરાવતો નથી

ટ્રમ્પે દલીલ કરી હતી કે, આ ઐતિહાસિક જોગવાઈ ક્યારેય એવા વિદેશી નાગરિકો માટે ન હતી જેઓ ટૂંકા સમય માટે અમેરિકા આવીને, બાળકના જન્મ દ્વારા નાગરિકતા મેળવવાનો પ્રયાસ કરે છે, અને આજે અમીર પ્રવાસીઓ તેનો ખોટો ઉપયોગ કરી રહ્યા છે. ઈમિગ્રેશન પર પોતાની કડક નીતિને આગળ ધપાવતા, ટ્રમ્પે સ્પષ્ટ કર્યું કે, જાન્યુઆરી 2025માં ફરીથી પદ સંભાળતાની સાથે જ તેમણે એક કાર્યકારી આદેશ જારી કર્યો હતો. આ આદેશમાં 20 જાન્યુઆરી પછીના 30 દિવસ બાદ અમેરિકામાં જન્મેલા બાળકોને સ્વચાલિત નાગરિકતા નહિ આપવાની જોગવાઈ રાખવામાં આવી છે. ટ્રમ્પનું માનવું છે કે, દેશ લાખો નવા લોકોને આશ્રય આપવાની ક્ષમતા ધરાવતો નથી.

અમેરિકી સંવિધાનના 14મા સંશોધનને સીધો પડકાર

ટ્રમ્પના આ કાર્યકારી આદેશે અમેરિકી સંવિધાનના 14મા સંશોધનને સીધો પડકાર આપ્યો છે, જે સ્પષ્ટપણે જણાવે છે કે, અમેરિકામાં જન્મ લેનાર દરેક વ્યક્તિ અમેરિકી નાગરિક છે. આ જન્મસિદ્ધ નાગરિકતાની જોગવાઈને પડકારવાના કારણે અનેક સંઘીય અદાલતોમાં મુકદ્દમાઓ દાખલ થયા છે. ટ્રમ્પે જણાવ્યું કે, તેમના દ્વારા જારી કરાયેલા આદેશને રદ્દ કરવાનો નિર્ણય ગંભીર અસર કરી શકે છે, ખાસ કરીને જ્યારે આ મામલો હવે દેશની સર્વોચ્ચ અદાલત, સુપ્રીમ કોર્ટમાં પહોંચી ગયો છે.

સંવૈધાનિક કાયદેસરતાની તપાસ શરૂ કરી

જૂન 2025માં, અમેરિકી સુપ્રીમ કોર્ટે આદેશ આપ્યો હતો કે, સંઘીય અદાલતોને રાષ્ટ્રપતિના આદેશ પર વ્યાપક રાષ્ટ્રીય પ્રતિબંધ લગાવવાનો અધિકાર નથી. ત્યારબાદ, સુપ્રીમ કોર્ટે પોતે આ આદેશની સંવૈધાનિક કાયદેસરતાની તપાસ શરૂ કરી દીધી છે, જે ટ્રમ્પના આ પગલાને અંતિમ સ્વરૂપ આપશે.