શ્રીલંકામાં ટ્રેનની ટક્કરમાં 6 હાથીઓના મોત, વન્યજીવન વિભાગે તપાસ શરૂ કરી

શ્રીલંકામાં વન્યજીવન અભયારણ્ય નજીક એક પેસેન્જર ટ્રેન હાથીઓના ટોળા સાથે અથડાઈ ગઈ. ટ્રેન સાથે અથડાવાથી ઓછામાં ઓછા છ હાથીઓના મોત થયા છે. એક અધિકારીએ આ ઘટના અંગે માહિતી આપી છે. સરકારી વન્યજીવન વિભાગના પ્રવક્તા હસિની શરથચંદ્રએ જણાવ્યું હતું કે રાજધાની કોલંબોથી લગભગ 200 કિલોમીટર દૂર મિનેરિયા નજીક થયેલી અથડામણમાં ચાર બચ્ચા અને બે પુખ્ત હાથીઓના મોત થયા છે. આ વિસ્તાર તેના કુદરતી ઉદ્યાનો અને વન્યજીવન માટે પ્રખ્યાત છે. 

પાટા પરથી ઉતરી ગયેલા ટ્રેનના ડબ્બા...

સ્થાનિક ટેલિવિઝન ચેનલો પર દર્શાવવામાં આવેલા ચિત્રોમાં ટક્કર પછી ટ્રેનનું એન્જિન અને ઘણા કોચ પાટા પરથી ઉતરી ગયા હોવાનું દર્શાવવામાં આવ્યું હતું. એક રેલવે અધિકારીએ નામ ન આપવાની શરથે જણાવ્યું હતું કે આ અકસ્માતમાં કોઈ મુસાફરને ઈજા થઈ નથી. શરથચંદ્રએ કહ્યું કે વન્યજીવન વિભાગે આ ઘટનાની તપાસ શરૂ કરી દીધી છે. 

દર વર્ષે હજારો પ્રવાસીઓ આવે છે...

દર વર્ષે હજારો પ્રવાસીઓ મિનેરિયા રાષ્ટ્રીય ઉદ્યાનની મુલાકાત લે છે જેથી તેઓ હાથીઓને તેમના જંગલી નિવાસસ્થાનમાં જોઈ શકે. તે 'હાથી કોરિડોર'નો એક ભાગ છે જે કૌદુલ્લા અને વાસગામુવા રાષ્ટ્રીય ઉદ્યાનોને જોડે છે. વન્યજીવન નિષ્ણાતો અને સ્થાનિક વહીવટીતંત્ર સતત ટ્રેન ડ્રાઇવરોને જંગલો અને હાથી કોરિડોરમાંથી પસાર થતી વખતે ટ્રેનની ગતિ ઓછી કરવા અને હોર્ન વગાડીને હાથીઓને ચેતવણી આપવા અપીલ કરી રહ્યા છે. આમ છતાં, આવા અકસ્માતો થાય છે.

તાજેતરના દિવસોમાં ઘટનાઓમાં વધારો થયો...

તાજેતરના વર્ષોમાં શ્રીલંકામાં હાથીઓ સાથે ટ્રેન અથડામણની સંખ્યામાં વધારો થયો છે કારણ કે જંગલી હાથીઓ ખોરાક અને પાણીની શોધમાં રેલ્વે ટ્રેક ઓળંગવાનો પ્રયાસ કરે છે. શ્રીલંકામાં હાથીઓને ખાસ કાનૂની રક્ષણ મળે છે. દેશમાં લગભગ 7,000 જંગલી હાથી છે, જેમને ત્યાંના બૌદ્ધ સમુદાય દ્વારા પવિત્ર માનવામાં આવે છે. શ્રીલંકામાં હાથીને મારી નાખવો એ ગુનો છે, જેની સજા કેદ અથવા ભારે દંડ થઈ શકે છે.