મહાદેવ ઓનલાઈન સટ્ટાબાજી એપનો મુખ્ય સૂત્રધાર ઝડપાયો

Mastermind of Mahadev App arrested in Oman: મહાદેવ ઓનલાઈન સટ્ટાબાજી એપ કેસનો મુખ્ય આરોપી અને કથિત માસ્ટરમાઇન્ડ સૌરભ ચંદ્રાકરની ઓમાનમાં ઝડપાયો છે. ઇન્ટરપોલ દ્વારા જારી કરાયેલી રેડ નોટિસના આધારે રોયલ ઓમાન પોલીસે ધરપકડ કરી છે. તેના પર બનાવટી ઇન્ડોનેશિયન પાસપોર્ટના આધારે ઓમાનમાં ગેરકાયદેસર રીતે પ્રવેશ કરવાનો આરોપ છે.

અલ-ખૌદ ડિટેન્શન સેન્ટરમાં રાખવામાં આવ્યો
ધરપકડ બાદ સૌરભ ચંદ્રાકરને મસ્કત સ્થિત અલ-ખૌદ ડિટેન્શન સેન્ટરમાં રાખવામાં આવ્યો છે. ભારત સરકારે તેના પ્રત્યાર્પણ માટે જરૂરી કાનૂની પ્રક્રિયા શરૂ કરી છે અને ઓમાની સત્તાવાળાઓ સાથે સતત સંકલન કરી રહ્યું છે. આ દરમિયાન ચંદ્રાકરે પોતાના બચાવ માટે કાનૂની ટીમની પણ નિમણૂક કરી છે. બીજી તરફ, ઓમાનની તપાસ એજન્સીઓ બનાવટી પાસપોર્ટના ઉપયોગ અને ગેરકાયદેસર પ્રવેશ અંગે અલગથી તપાસ કરી રહી છે.

જ્યૂસની દુકાનથી સટ્ટાબાજી નેટવર્ક સુધીનો સફર
છત્તીસગઢના ભિલાઈના રહેવાસી સૌરભ ચંદ્રાકર શરૂઆતમાં જ્યૂસની દુકાન ચલાવતો હતો. વર્ષ 2017 માં તેણે ઓનલાઈન સટ્ટાબાજીના ધંધામાં પ્રવેશ કર્યો. 2019માં દુબઈ પહોંચ્યા બાદ પોતાના નેટવર્કનો ઝડપથી વિસ્તાર કર્યો. તપાસ એજન્સીઓના દાવા મુજબ તેણે ખાસ કરીને IPL દરમિયાન મોટા પાયે ઓનલાઈન સટ્ટાબાજીનું સંચાલન કર્યું હતું અને ગેરકાયદેસર નાણાકીય વ્યવહારો દ્વારા વિશાળ સંપત્તિ એકત્ર કરી હતી.

EDએ હજારો કરોડની સંપત્તિ જપ્ત કરી
એન્ફોર્સમેન્ટ ડિરેક્ટોરેટ (ED)ની તપાસ અનુસાર, મહાદેવ એપ કેસમાં અત્યાર સુધી અંદાજે ₹4,336 કરોડની સંપત્તિ જપ્ત કરવામાં આવી છે. તપાસમાં એવો પણ દાવો કરવામાં આવ્યો છે કે સૌરભ ચંદ્રાકર વર્ષ 2019થી ફરાર હતો. આશરે ₹5,000 કરોડના ઓનલાઈન સટ્ટાબાજી નેટવર્ક સાથે સંકળાયેલો હતો.

UAE છોડીને ઓમાન પહોંચ્યો હોવાનો દાવો
મીડિયા અહેવાલો મુજબ, કેસની કાર્યવાહી દરમિયાન સૌરભ ચંદ્રાકર સંયુક્ત આરબ અમીરાત (UAE) છોડીને ઓમાન પહોંચ્યો હતો. તપાસ એજન્સીઓનું માનવું છે કે બનાવટી પાસપોર્ટનો ઉપયોગ કરીને તેણે પોતાની ઓળખ છુપાવવાનો અને પ્રત્યાર્પણ પ્રક્રિયામાં વિલંબ કરવાનો પ્રયાસ કર્યો હોઈ શકે છે. ઓમાનના કાયદા મુજબ નકલી પાસપોર્ટનો ઉપયોગ કરીને દેશમાં પ્રવેશ કરવો ગંભીર ગુનો છે, જેમાં દોષિત ઠરવા પર ત્રણથી પાંચ વર્ષની જેલની સજાની જોગવાઈ છે.

હવે પ્રત્યાર્પણ પ્રક્રિયા પર નજર
ભારતીય તપાસ એજન્સીઓ હવે ઓમાની સરકાર સાથે કાનૂની પ્રક્રિયા પૂર્ણ કરીને સૌરભ ચંદ્રાકરને ભારત લાવવાના પ્રયાસોમાં છે. આગામી દિવસોમાં કોર્ટના નિર્ણય અને બંને દેશોની કાનૂની પ્રક્રિયા બાદ પ્રત્યાર્પણ અંગે મહત્વપૂર્ણ નિર્ણય લેવાય તેવી શક્યતા છે.

મહાદેવ ઓનલાઈન સટ્ટાબાજી કૌભાંડ કેસના મુખ્ય આરોપીઓ
રવિ ઉપ્પલ તે આ એપનો સહ-માલિક અને બીજો મુખ્ય માસ્ટરમાઇન્ડ છે. તેને ડિસેમ્બર 2023માં દુબઈ (UAE) ખાતે ઇન્ટરપોલ નોટિસના આધારે અટકાયતમાં લેવાયો હતો, પરંતુ નવેમ્બર 2025ના અહેવાલો મુજબ તે ત્યાંથી ગુમ (લાપતા) થઈ ગયો છે. EDની તપાસ મુજબ, છત્તીસગઢના પૂર્વ મુખ્યમંત્રી ભૂપેશ બઘેલ અને અન્ય વહીવટી અધિકારીઓને સટ્ટાબાજીનું રેકેટ સુરક્ષિત રાખવા માટે કરોડો રૂપિયાની પ્રોટેક્શન મની (લાંચ) આપવામાં આવી હોવાના ગંભીર આરોપો લાગેલા છે. આ કૌભાંડમાં હવાલા ઓપરેટરો અને સહયોગીઓ જેવા કે અનિલ દામાણી, સુનીલ દામાણી, ચંદ્રભૂષણ વર્મા (ASI), સતીશ ચંદ્રાકર, નિતિન ટિબરેવાલ અને અમિત અગ્રવાલ ની ધરપકડ કરવામાં આવી છે.

બોલીવુડ કલાકારોની પણ પૂછપરછ કરાઈ હતી

• રણબીર કપૂર અને શ્રદ્ધા કપૂર: આ બંને કલાકારોને ED દ્વારા સમન્સ પાઠવી પૂછપરછ કરવામાં આવી હતી. તેમના પર મહાદેવ ગેમિંગ એપના પ્રમોશન માટે એન્ડોર્સમેન્ટ ફી તરીકે મોટી રકમ લેવાનો અને તે પૈસા ગેરકાયદેસર સ્ત્રોતમાંથી આવ્યા હોવાની શંકા હેઠળ તપાસ થઈ હતી.
• સાહિલ ખાન: ફિલ્મ 'સ્ટાઈલ' ફેમ અભિનેતા સાહિલ ખાનની મુંબઈ પોલીસની સ્પેશિયલ ઇન્વેસ્ટિગેશન ટીમ (SIT) દ્વારા છત્તીસગઢથી ધરપકડ કરવામાં આવી હતી. તેના પર આ સટ્ટાબાજીની એપ્સ ચલાવવાનો, તેનો પ્રચાર કરવાનો અને તેમાં સીધી ભાગીદારી હોવાનો ગંભીર આરોપ છે.
• તમન્ના ભાટિયા: મહારાષ્ટ્ર સાયબર સેલે તમન્ના ભાટિયાની પૂછપરછ કરી હતી. તેના પર મહાદેવ એપની સહયોગી (સિસ્ટર) એપ 'Fairplay' પર IPL મેચોના ગેરકાયદેસર પ્રસારણ અને પ્રમોશન કરવાનો આરોપ હતો.
• કપિલ શર્મા, હુમા કુરેશી અને હીના ખાન: EDએ ત્રણેયને રાયપુર ઓફિસમાં બોલાવીને નિવેદન નોંધ્યા હતા. કપિલ શર્મા સટ્ટાબાજી એપના પ્રમોશનલ સક્સેસ કન્સર્ટમાં સામેલ હતો. જ્યારે હુમા અને હીના ખાને દુબઈની ઈવેન્ટ્સમાં ભાગ લીધો હતો, જેના માટે તેમને હવાલા ચેનલ દ્વારા ચૂકવણી કરવામાં આવી હોવાની આશંકા છે.
• બાદશાહ અને સંજય દત્ત: રેપર બાદશાહ અને અભિનેતા સંજય દત્તના મેનેજરના નિવેદનો પણ મુંબઈ સાયબર સેલ દ્વારા Fairplay એપના પ્રમોશન કેસના સંદર્ભમાં નોંધવામાં આવ્યા હતા.

દુબઈ કનેક્શન અને આલીશાન લાઈફસ્ટાઈલ

• મુખ્ય હેડક્વાર્ટર: સૌરભ ચંદ્રાકર અને રવિ ઉપ્પલે ભારતમાંથી ભાગ્યા બાદ દુબઈ (UAE) ને મુખ્ય અડ્ડો બનાવ્યો હતો. તેઓ ત્યાંથી એપ્લિકેશન અને ફ્રેન્ચાઈઝી નેટવર્કનું સંચાલન કરતા હતા.
• ભવ્ય લગ્નથી પર્દાફાશ: આ કૌભાંડ ત્યારે પ્રકાશમાં આવ્યું જ્યારે સૌરભ ચંદ્રાકરે ફેબ્રુઆરી 2023માં દુબઈમાં આશરે ૨૦૦ કરોડ રૂપિયા નો આલીશાન લગ્નોત્સવ યોજ્યો હતો. આ લગ્નમાં બોલિવૂડ કલાકારોને લાવવા માટે પ્રાઈવેટ જેટ ભાડે કરાયા હતા અને કલાકારોને રોકડમાં કરોડો રૂપિયા ચૂકવાયા હતા.
• બુર્જ ખલીફામાં પ્રોપર્ટી: સટ્ટાબાજીની ગેરકાયદે કમાણીમાંથી દુબઈમાં અબજો રૂપિયાનું રોકાણ કરવામાં આવ્યું છે. ED એ દુબઈના હાઈ-પ્રોફાઈલ વિસ્તારો જેવા કે દુબઈ હિલ્સ એસ્ટેટ અને વિશ્વની સૌથી ઊંચી ઈમારત બુર્જ ખલીફા માં આવેલા લક્ઝરી વિલા અને એપાર્ટમેન્ટ્સ સહિત આશરે 1,700 કરોડ રૂપિયા ની મિલકતો જપ્ત કરી છે.

હવાલા નેટવર્ક અને મની લોન્ડરિંગ ચેનલો

• બેનામી બેંક ખાતાઓ: ભારતમાં ગરીબ અને અજાણ્યા લોકોના KYC દસ્તાવેજોનો દુરુપયોગ કરીને 10 હજારથી વધુ નકલી બેંક ખાતાઓ ખોલવામાં આવ્યા હતા. સામાન્ય લોકો પાસેથી સટ્ટાના પૈસા આ ખાતાઓમાં જમા કરાવાતા.
• લેયરિંગ અને ક્રિપ્ટોકરન્સી: આ ખાતાઓમાંથી પૈસાને પકડાતા બચાવવા માટે અલગ-અલગ શેલ કંપનીઓમાં ટ્રાન્સફર કરવામાં આવતા. ત્યારબાદ નાણાંને ક્રિપ્ટોકરન્સી, વિદેશી પોર્ટફોલિયો ઇન્વેસ્ટમેન્ટ (FPIs) અને નકલી હીરાના વેપારના નામે ભારત બહાર મોકલી દેવાતા હતા.
• હવાલા ઓપરેટર્સ: દુબઈ બેઝ્ડ હવાલા ઓપરેટરો દ્વારા કરોડો રૂપિયાની રોકડ રકમ ગેરકાયદે સરહદ પાર પહોંચાડવામાં આવતી હતી. તાજેતરમાં જ ED એ કોલકાતા, મુંબઈ, દિલ્હી અને ઈન્દોર જેવા શહેરોમાં દરોડા પાડીને દુબઈ સાથે જોડાયેલા હવાલા ઓપરેટરોના 580 કરોડ રૂપિયા થી વધુના શેર અને સિક્યોરિટીઝ ફ્રીઝ કર્યા છે.
• અંડરવર્લ્ડ કનેક્શન: તપાસ એજન્સીઓના અહેવાલો મુજબ, આ સિન્ડિકેટના તાર અંડરવર્લ્ડ ડોન દાઉદ ઈબ્રાહિમના ભાઈ મુશ્તાકીમ ઈબ્રાહિમ કાસ્કર સાથે પણ જોડાયેલા છે, જેણે આ એપના આંતરરાષ્ટ્રીય નેટવર્કને ફેલાવવામાં મદદ કરી હતી.
• મહાદેવ એપના કાળા કારોબારને રોકવા માટે ભારત સરકારે સિન્ડિકેટની તમામ સહયોગી એપ્સ (Tiger Exchange, Gold365, Laser247) પર પ્રતિબંધ મૂક્યો છે.