મિડલ ઈસ્ટમાં યુદ્ધની જ્વાળા વધુ ભયાનક બની

વર્તમાન સમયમાં મિડલ ઈસ્ટના દેશો વચ્ચે ચાલી રહેલો સંઘર્ષ હવે ખતરનાક વળાંક પર પહોંચી ગયો છે. ઈઝરાયલ અને ઈરાન વચ્ચેના સીધા સંઘર્ષની સાથે હવે સંયુક્ત આરબ અમીરાત (UAE) પણ આ લપેટમાં આવ્યું હોય તેમ જણાય છે. દુબઈ ઇન્ટરનેશનલ એરપોર્ટ જેવા વ્યસ્ત કેન્દ્ર પર થયેલા ડ્રોન હુમલા અને ઈઝરાયલ દ્વારા લેબનોનની રાજધાની બેરૂત પર કરવામાં આવેલા ભીષણ હવાઈ હુમલાઓએ સમગ્ર વિશ્વની ચિંતામાં વધારો કર્યો છે. અમેરિકાના પ્રમુખ ડોનાલ્ડ ટ્રમ્પે આ મામલે સીધો હસ્તક્ષેપ કરતા ઈરાનની સૈન્ય શક્તિને તોડી પાડવાનો દાવો કર્યો છે.

દુબઈ એરપોર્ટ પર ડ્રોન હુમલો: વિમાની સેવાઓ પ્રભાવિત

દુબઈ ઇન્ટરનેશનલ એરપોર્ટ (DXB) નજીક આવેલા ફ્યુઅલ ટેન્ક (તેલના ડેપો) પર અચાનક ડ્રોન હુમલો થતા ભીષણ આગ ફાટી નીકળી હતી. આ ઘટનાને પગલે વિશ્વના સૌથી વ્યસ્ત એરપોર્ટ પૈકીના એક એવા દુબઈ એરપોર્ટ પર અફરાતફરી મચી ગઈ હતી. સુરક્ષાના કારણોસર વિમાની સેવાઓ કામચલાઉ ધોરણે સ્થગિત કરી દેવામાં આવી હતી અને ઘણી ફ્લાઈટ્સને જેબેલ અલી સ્થિત અલ્ મકતુમ ઇન્ટરનેશનલ એરપોર્ટ (DWC) પર ડાયવર્ટ કરવામાં આવી હતી.

દુબઈ સિવિલ ડિફેન્સની ટીમોએ કલાકોની જહેમત બાદ આગ પર કાબૂ મેળવ્યો હતો. સદનસીબે આ હુમલામાં કોઈ જાનહાનિના સમાચાર નથી, પરંતુ સાવચેતીના ભાગરૂપે દુબઈ પોલીસે એરપોર્ટ રોડ અને એરપોર્ટ ટનલને બંધ કરી દીધા હતા. દુબઈ મીડિયા ઓફિસે જણાવ્યું છે કે સ્થિતિ હવે નિયંત્રણમાં છે, પરંતુ સર્ચ ઓપરેશન ચાલુ હોવાથી વાહનચાલકોને વૈકલ્પિક રસ્તાઓનો ઉપયોગ કરવા સૂચના અપાઈ છે.

ઈઝરાયલની ડિફેન્સ સિસ્ટમ પર સંકટ?

મિડલ ઈસ્ટના આ જંગમાં એક ચોંકાવનારો અહેવાલ અમેરિકન અધિકારીઓ તરફથી આવ્યો છે. ઈરાન તરફથી સતત થઈ રહેલા બેલેસ્ટિક મિસાઈલ અને ડ્રોન હુમલાઓને કારણે ઈઝરાયલની અત્યાધુનિક ડિફેન્સ સિસ્ટમ 'આયર્ન ડોમ' અને અન્ય ઈન્ટરસેપ્શન મિસાઈલોનો સ્ટોક ખૂટી પડવાની અણીએ છે. અમેરિકા આ વાતથી સારી રીતે વાકેફ છે કે જો ઈરાન હજુ પણ આક્રમક રીતે હુમલા ચાલુ રાખશે, તો ઈઝરાયલ માટે તમામ મિસાઈલોને હવામાં તોડી પાડવી મુશ્કેલ બની જશે.

બીજી તરફ, ઈઝરાયલે લેબનોનની રાજધાની બેરૂતના દક્ષિણી વિસ્તારોમાં વિનાશક હવાઈ હુમલા કર્યા છે. આ હુમલાઓમાં મોટાપાયે માલહાનિ થઈ હોવાના અહેવાલ છે અને સમગ્ર વિસ્તારમાં ભયનો માહોલ છે.

ડોનાલ્ડ ટ્રમ્પનું આક્રમક વલણ: 'ઈરાનની શક્તિ ધ્વસ્ત કરીશું'

અમેરિકાના પ્રમુખ ડોનાલ્ડ ટ્રમ્પે એરફોર્સ વન પરથી પત્રકારો સાથે વાત કરતા મોટું નિવેદન આપ્યું છે. ટ્રમ્પે દાવો કર્યો છે કે અમેરિકા હવે સીધી રીતે ઈરાનની તે ફેક્ટરીઓ અને મેન્યુફેક્ચરિંગ યુનિટ્સને નિશાન બનાવી રહ્યું છે જ્યાં ડ્રોનનું ઉત્પાદન થાય છે. તેમણે કહ્યું કે, "ઈરાન પાસે હવે બહુ ઓછી સૈન્ય શક્તિ બચી છે અને અમે તેમની સૈન્ય ક્ષમતાને જડમૂળથી ઉખેડી નાખવાનું શરૂ કરી દીધું છે." ટ્રમ્પે એમ પણ ઉમેર્યું કે ઈરાન હવે વાટાઘાટો કરવા માટે આતુર છે, પરંતુ અમેરિકા તેની શરતો પર મક્કમ છે.

અન્ય દેશો પણ સંઘર્ષની લપેટમાં

• કુવૈત: કુવૈત નેશનલ ગાર્ડે તેમની સરહદમાં ઘૂસેલા બે ડ્રોનને તોડી પાડ્યા છે. અગાઉ રવિવારે અલી અલ સાલેમ બેઝ પર થયેલા હુમલામાં ઈટાલિયન ફોર્સના આશ્રયસ્થાનને નુકસાન થયું હતું.

• ઈરાક: બગદાદ એરપોર્ટ નજીક આવેલા અમેરિકન વિક્ટરી બેઝ પર રોકેટ હુમલો થયો છે, જેમાં ૫ લોકો ઘાયલ થયા છે. 'સરાયા અવલિયા અલ-દમ' નામના જૂથે આ હુમલાની જવાબદારી લીધી છે.

• ઈરાન: ઈરાનના વિદેશ મંત્રી અબ્બાસ અરાઘચીએ ઈઝરાયલના હુમલાઓને 'ઈકોસાઈડ' ગણાવી વૈશ્વિક મંચ પર વિરોધ નોંધાવ્યો છે અને ઈઝરાયલને સજા મળવી જોઈએ તેવી માંગ કરી છે.

મિડલ ઈસ્ટમાં ફેલાયેલી આ હિંસા હવે માત્ર પ્રાદેશિક નથી રહી, પરંતુ વૈશ્વિક અર્થતંત્ર અને સુરક્ષા પર તેની અસર જોવા મળી રહી છે. હોર્મુઝ સ્ટ્રેટમાં સુરક્ષા જાળવવા માટે અમેરિકા અન્ય દેશો સાથે ચર્ચા કરી રહ્યું છે. જો આ તણાવ જલ્દી શાંત નહીં થાય, તો વિશ્વએ એક મોટા યુદ્ધનો સામનો કરવો પડી શકે છે.