બલૂચિસ્તાનમાં ભયાનક વિસ્ફોટ અને ગોળીબાર: 4ના મોત, 20 ઘાયલ

પાકિસ્તાનના અશાંત ગણાતા એવા બલૂચિસ્તાન પ્રાંતના અબ્દુલ્લા જિલ્લામાં આવેલા જબ્બાર માર્કેટમાં થયેલા ભયાનક વિસ્ફોટમાં ચાર લોકોના મોત થયા અને 20 લોકો ઘાયલ થયા. મીડિયા રિપોર્ટ્સ અનુસાર, આ વિસ્ફોટ ફ્રન્ટિયર કોરની બિલ્ડિંગ નજીક થયો હતો, જેના કારણે અનેક દુકાનો ધરાશાયી થઈ અને આગ લાગી. આ ઘટના દરમિયાન અજાણ્યા હુમલાખોરોએ આડેધડ ગોળીબાર પણ કર્યો, જેમાં બિલ્ડિંગના કર્મચારીઓને નિશાન બનાવવામાં આવ્યા.   અબ્દુલ્લા જિલ્લાના નાયબ કમિશનર રિયાજ ખાને જણાવ્યું કે, “વિસ્ફોટમાં ચાર લોકોના મોત થયા અને 20 લોકો ઘાયલ થયા છે. હુમલાખોરોએ ફ્રન્ટિયર કોરની બિલ્ડિંગ પર ગોળીબાર પણ કર્યો.” વિસ્ફોટ અને ગોળીબાર બાદ સુરક્ષા દળોએ આખા વિસ્તારને ખાલી કરાવી સીલ કરી દીધો છે અને હુમલાખોરોની શોધ માટે ઓપરેશન શરૂ કર્યું છે.   બલૂચિસ્તાનમાં લગભગ બે દાયકાથી અશાંતિનો માહોલ છે, જ્યાં વિસ્ફોટ અને ગોળીબારની ઘટનાઓ સામાન્ય બની ગઈ છે. આ ઘટના પહેલાં પણ ખુજદાર જિલ્લાના નાલ વિસ્તારમાં ચેકપોસ્ટ પર થયેલા ગોળીબારમાં ચાર કર્મચારીઓના મોત થયા હતા. તાજેતરમાં બલૂચ બળવાખોરો દ્વારા સુરક્ષા દળો પર થયેલા હુમલાઓએ પ્રાંતની સ્થિતિને વધુ ગંભીર બનાવી છે.   આ ઘટનાએ ફરી એકવાર બલૂચિસ્તાનમાં સુરક્ષા વ્યવસ્થા પર સવાલો ઉભા કર્યા છે. સ્થાનિક લોકોમાં ભયનો માહોલ છે, અને હુમલાખોરોની ધરપકડ માટે સુરક્ષા દળો પર દબાણ વધી રહ્યું છે.