પાકિસ્તાન હચમચ્યું, મદરેસામાં આત્મઘાતી હુમલો, મૌલાના સહીત 5ના મોત

પાકિસ્તાનમાં ચેમ્પિયન્સ ટ્રોફીનું આયોજન થઈ રહ્યું છે. દરમિયાન, શુક્રવારે થયેલા પ્રચંડ બોમ્બ વિસ્ફોટથી દેશ હચમચી ગયો છે. પાકિસ્તાનના ખૈબર પખ્તુનખ્વાના નૌશેરામાં મદરેસા હક્કાનિયામાં થયેલો આ વિસ્ફોટ ઇસ્લામિક કેલેન્ડરનો સૌથી પવિત્ર મહિનો રમઝાન પહેલા થયો હતો. આ ઘટનામાં 5 લોકોના મોત થયા છે. તે જ સમયે, 20 થી વધુ લોકો ઘાયલ થયા હોવાનું કહેવાય છે. મીડિયા રિપોર્ટ્સ અનુસાર, ખૈબર પખ્તુનખ્વાના પોલીસ મહાનિરીક્ષક ઝુલ્ફીકાર હમીદે પાકિસ્તાની મીડિયાને જણાવ્યું છે કે અકોરા ખટ્ટકમાં દારુલ ઉલૂમ હક્કાનીયા મસ્જિદમાં થયેલા વિસ્ફોટમાં ઓછામાં ઓછા 5 લોકો માર્યા ગયા છે અને 20 ઘાયલ થયા છે.

આત્મઘાતી હુમલાનો ભય...

ડોનના અહેવાલ મુજબ, મદરેસાના મુખ્ય હોલમાં શુક્રવારની નમાજ દરમિયાન વિસ્ફોટ થયો હતો. શરૂઆતની તપાસ મુજબ, તે એક આત્મઘાતી હુમલો હતો. રિપોર્ટમાં કહેવામાં આવ્યું છે કે વિસ્ફોટનું નિશાન મૌલાના હમીદુલ હક હક્કાની હતા. મૌલાના હમીદુલ હક હક્કાની એક રાજકારણી અને ઇસ્લામિક વિદ્વાન અને જમિયત ઉલેમા-એ-ઇસ્લામ (SAMI) ના વડા હતા. આ આત્મઘાતી હુમલામાં JUI-S નેતા મૌલાના હામિદ ઉલ હક હક્કાનીનું મોત થયું હોવાનું કહેવામાં આવી રહ્યું છે. ખૈબર પખ્તુનખ્વાના CM ના માહિતી સલાહકાર બેરિસ્ટર મોહમ્મદ અલી સૈફે એક નિવેદનમાં પુષ્ટિ આપી છે કે મૌલાના હમીદુલ હક પણ મૃતકોમાં સામેલ છે. તેમણે કહ્યું, 'તેઓ એક મહાન ધાર્મિક વિદ્વાન હતા જેમની ઇસ્લામ પ્રત્યેની અપાર સેવાઓ અવિસ્મરણીય છે.' મૌલાના હમીદુલ હકની શહાદત એક ન ભરવાપાત્ર ખોટ છે.