એક ટક્કર બાદ બીજી ટક્કર… દક્ષિણ આફ્રિકામાં ભયાનક અકસ્માતે 21 જીવ લીધા

South Africa Minibus Taxi Accident: દક્ષિણ આફ્રિકાના પશ્ચિમ કેપ પ્રાંતમાં ભયાનક માર્ગ અકસ્માતમાં ઓછામાં ઓછા 21 લોકોના મોત થયા છે. N1 હાઇવે પર બે મિનિબસ ટેક્સી વચ્ચે સામસામે ટક્કર થતાં આ અકસ્માત સર્જાયો હતો. અકસ્માતમાં અનેક લોકો ગંભીર રીતે ઘાયલ થયા છે. ટક્કર બાદ એક SUV પણ અકસ્માતગ્રસ્ત વાહનો સાથે અથડાઈ હતી. અધિકારીઓએ ચેતવણી આપી છે કે મૃત્યુઆંક વધવાની શક્યતા છે.

N1 હાઇવે પર બે મિનિબસ ટેક્સી વચ્ચે ભયાનક ટક્કર
રોડ ટ્રાફિક મેનેજમેન્ટ કોર્પોરેશનના જણાવ્યા અનુસાર, દક્ષિણ આફ્રિકામાં આ માર્ગ અકસ્માત રવિવારે રાત્રે N1 હાઇવે પર થયો હતો. આ અકસ્માત પ્રિન્સ આલ્બર્ટ અને લીઉ-ગામકા વચ્ચેના માર્ગ પર થયો હતો, જે કેપટાઉનથી લગભગ 380 કિલોમીટર પૂર્વમાં આવેલો છે. પ્રાથમિક માહિતી પ્રમાણે, બે મિનિબસ ટેક્સી સામસામે અથડાઈ હતી. ટક્કર બાદ અનેક મુસાફરો ગંભીર રીતે ઘાયલ થયા હતા. ઘટનાની જાણ થતાં જ બચાવ અને રાહત ટીમો ઘટનાસ્થળે પહોંચી હતી અને ઘાયલોને સારવાર માટે હોસ્પિટલ ખસેડવામાં આવ્યા હતા.

અકસ્માત બાદ SUV પણ અથડાઈ
વેસ્ટર્ન કેપ મોબિલિટી ડિપાર્ટમેન્ટના જણાવ્યા અનુસાર, બે મિનિબસ ટેક્સી વચ્ચે થયેલા અકસ્માત બાદ એક SUV પણ અકસ્માતગ્રસ્ત વાહનો સાથે અથડાઈ હતી. આ વધારાની ટક્કરને કારણે ઘટનાની ગંભીરતા વધી હતી. પોલીસે જણાવ્યું કે ત્રણ પીડિતોને હોસ્પિટલ લઈ જવામાં આવ્યા હતા, પરંતુ હોસ્પિટલ પહોંચતા જ તેમને મૃત જાહેર કરવામાં આવ્યા હતા. ગંભીર રીતે ઘાયલ લોકોની સંખ્યા જોતા અધિકારીઓએ મૃત્યુઆંક વધુ વધી શકે તેવી આશંકા વ્યક્ત કરી છે.

N1 હાઇવે પર વાહનવ્યવહાર બંધ
ભયાનક અકસ્માત બાદ N1 હાઇવેના સંબંધિત માર્ગને વાહનવ્યવહાર માટે બંધ કરવામાં આવ્યો હતો. અકસ્માતને કારણે આ રૂટ પર ટ્રાફિક પણ પ્રભાવિત થયો હતો. રોડ ટ્રાફિક મેનેજમેન્ટ કોર્પોરેશન દ્વારા દક્ષિણ આફ્રિકા માર્ગ અકસ્માતનું કારણ જાણવા તપાસ શરૂ કરવામાં આવી છે. હાલ અકસ્માત કયા ચોક્કસ કારણોસર થયો તે અંગે સત્તાવાર નિષ્કર્ષ સામે આવ્યો નથી. તપાસ પૂર્ણ થયા બાદ અકસ્માતનું કારણ સ્પષ્ટ થઈ શકે છે.

દક્ષિણ આફ્રિકામાં મિનિબસ ટેક્સી અકસ્માત ફરી ચર્ચામાં
દક્ષિણ આફ્રિકામાં મિનિબસ ટેક્સી જાહેર પરિવહનનું મહત્વનું સાધન છે. જોકે, મિનિબસ ટેક્સી સાથે સંકળાયેલા ગંભીર માર્ગ અકસ્માતો અગાઉ પણ સામે આવ્યા છે. જાન્યુઆરીમાં મિનિબસ ટેક્સીને લગતા બે અલગ-અલગ અકસ્માતોમાં ઓછામાં ઓછા 25 લોકોના મોત થયા હતા, જેમાં 14 બાળકોનો સમાવેશ થતો હતો. N1 હાઇવે પર થયેલા આ તાજા અકસ્માતે દક્ષિણ આફ્રિકામાં માર્ગ સુરક્ષા અને જાહેર પરિવહનની સલામતી અંગે ફરી સવાલો ઉભા કર્યા છે. અધિકારીઓની તપાસ બાદ અકસ્માતની વધુ વિગતો સામે આવવાની શક્યતા છે.