રશિયામાં 50 મુસાફરોને લઈ જતું વિમાન એકાએક ગુમ

રશિયાના અમૂર ક્ષેત્રમાંથી એક પેસેન્જર પ્લેન અચાનક ગુમ થઈ જતાં ભારે ચકચાર મચી ગઈ છે. પ્રાથમિક માહિતી મુજબ, આ પ્લેનમાં પાંચ બાળકો સહિત 43 પેસેન્જર અને સાત ક્રૂ સભ્યો એમ કુલ 50 લોકો સવાર હતા. સ્થાનિક એર ટ્રાફિક કંટ્રોલ (ATC) એ જણાવ્યું કે, અમૂર ક્ષેત્રમાં ઉડાન ભરી રહેલા AN-24 પેસેન્જર પ્લેન સાથે અચાનક સંપર્ક તૂટી ગયો હતો.

રશિયન એર ટ્રાફિક કંટ્રોલના જણાવ્યા અનુસાર, આ પ્લેન ચીનની સરહદ નજીક આવેલા અમૂર શહેરમાંથી રડાર સ્ક્રીન પરથી અચાનક અદૃશ્ય થઈ ગયું હતું. સાઇબેરિયાની અંગારા એરલાઇન દ્વારા આ પ્લેન ઓપરેટ કરવામાં આવી રહ્યું હતું.

પ્રાદેશિક ગવર્નર વેસિલી ઓર્લોવે આ ઘટનાની પુષ્ટિ કરતા જણાવ્યું કે, પ્લેનના ગુમ થયાના સમાચાર મળતા જ તમામ જરૂરી સુરક્ષા અને બચાવ દળોને તુરંત પ્લેનની શોધખોળ માટે તૈનાત કરી દેવામાં આવ્યા છે. મોટા પાયે શોધ અભિયાન શરૂ કરવામાં આવ્યું છે, જેમાં હવાઈ અને જમીની એમ બંને સ્તરે પ્લેન અને તેમાં સવાર લોકોની ભાળ મેળવવાના પ્રયાસો થઈ રહ્યા છે.

આ ઘટનાથી ચિંતાનો માહોલ ફેલાયો છે. સત્તાવાળાઓ દ્વારા ગુમ થયેલા પ્લેન અને તેમાં સવાર લોકોની સુરક્ષા સુનિશ્ચિત કરવા માટે સઘન પ્રયાસો હાથ ધરવામાં આવ્યા છે.