પાર્સલ કાંડઃ નવસારીના કિશન પટેલને અમેરિકન કોર્ટે 63 મહિનાની સજા ફટકારી

અમેરિકામાં સ્ટુડન્ટ વિઝા પર ગયેલાં વિદ્યાર્થીઓને ભણવાની સાથે ખર્ચા કાઢવા મુશ્કેલ થઈ પડતાં હોય છે. આ ઉપરાંત એજ્યુકેશન લોનના હપ્તા કાઢવામાં ધોળા દિવસે તારા દેખાઈ જતાં હોય છે. તેવા સમયે કેટલાક ગુજરાતી વિદ્યાર્થીઓ અમેરિકા પહોંચી વગર મહેનતે ડોલર કમાવવા માટે અવળી લાઈન પર ચઢી જતાં હોય છે. આવો જ એક કિસ્સો નવસારીના કિશન પટેલ સાથે બન્યો છે. ભણવા માટે અમેરિકા ગયેલા 20 વર્ષિય કિશને પોતાની જિંદગી જાતે બરબાદ કરી નાખી છે. કિશન રાજેશકુમાર પટેલ નામનો વિદ્યાર્થીને અમેરિકાની કોર્ટે રૂપિયા 2.6 મિલિયન ડોલરના પાર્સલ કાંડમાં 63 મહિનાની જેલની સજા ફટકારી છે.

અમેરિકન પોલીસે કિશન પટેલની 24 ઓગસ્ટ 2024ના રોજ પાર્સલ કાંડમાં ધરપકડ કરી હતી. ત્યારથી તે જેલમાં બંધ છે. કિશનને ધરપકડના પાંચ જ દિવસમાં ફેડરલ કસ્ટડીમાં ટ્રાન્સફર કરી દેવામાં આવ્યો હતો અને 18 માર્ચ 2025ના રોજ તેણે ગુનો કબૂલી લીધા બાદ કોર્ટે 63 મહિનાની જેલની સજા ફટકારી છે. કોર્ટમાં રજૂ કરાયેલા ડોક્યુમેન્ટ્સ અનુસાર કિશન પટેલ અને ધ્રુવ રાજેશભાઈ માંગુકિયાએ જુલાઈ-2024 થી લઈને ઓગસ્ટ 2024 દરમિયાન ઠગાઈનો ભોગ બનેલા અમેરિકન સિટીઝન્સ પાસેથી કેશ અને ગોલ્ડ ભરેલા પાર્સલ કલેક્ટ કર્યા હતા.

કિશન અને ધ્રુવના ગુનાની FBIએ તપાસ કરી હતી. જેમાં જાણવા મળ્યું હતું કે તેમણે 25 વિક્ટિમ પાસેથી 26,94,156 ડોલરના કેશ અથવા ગોલ્ડથી ભરેલા પાર્સલ કલેક્ટ કર્યા હતા. કિશન પટેલની ટેક્સાસમાંથી ધરપકડ કરવામાં આવી હતી. તે એક વિક્ટિમ પાસેથી 1.30 લાખ ડોલર કેશથી ભરેલું પાર્સલ લેવા આવ્યો ત્યારે પોલીસના સંકજામાં આવી ગયો હતો. કિશનની સાથે પકડાયેલા ધ્રુવ માંગુકિયાએ 16 જૂન 2025 ના રોજ પોતાનો ગુનો કબૂલ કરી લીધો છે અને સજાના એલાનની રાહ જોવામાં આવી રહી છે.

20 વર્ષની ઉંમરે અમેરિકામાં જેલની સજા પામનારા કિશન પટેલની જિંદગી જ બરબાદ થઈ ગઈ છે.  ભણવાની ઉંમરમાં તે હાલ જેલની હવા ખાઈ રહ્યો છે. તેની સજા પૂરી થતાં અથવા તે પહેલા ઈન્ડિયા ડિપોર્ટ કરી દેવાશે તે વાત પણ નક્કી છે. અમેરિકામાં સિરિયસ ક્રાઈમ કરીને ઈન્ડિયા ડિપોર્ટ થનારા કિશનને હવે અમેરિકા સિવાય કેનેડા સહિતના અનેક દેશોના વિઝા મેળવવામાં પ્રોબ્લેમ થઈ શકે છે.

કિશન અને ધ્રુવની માફક તાજેતરમાં શુભમ પટેલ અને હર્ષિલ પટેલ નામના બે ગુજરાતી વિદ્યાર્થીઓની પણ પાર્સલ કાંડમાં અલાસ્કામાંથી ધરપકડ કરવામાં આવી હતી. જેલમાં બંધ શુભમ પર અમેરિકાની કોર્ટે બે લાખ જ્યારે કિશન પર એક લાખ ડોલરનો બોન્ડ મૂક્યો છે.

સૂત્રોનું માનીએ તો અમેરિકા પહોંચવા માટે સ્ટૂડન્ટ વિઝાના લાખો રૂપિયા આપનારા સ્ટૂડન્ટ્સ પોતે કરેલા ખર્ચાની ભરપાઈ કરવા માટે અમેરિકામાં બેનંબરના ધંધા શરૂ કરી દેતા હોય છે. ઈન્ડિયાથી ચાલતા સ્કેમમાં અમેરિકન સિટીઝન્સને ડરાવી કે ધમકાવી તેમની પાસેથી પૈસા પડાવવામાં આવે છે તે કલેક્ટ કરવા અમેરિકામાં રહેતાં ગુજરાતીઓને મોકલવામાં આવતા હોય છે.

અમેરિકામાં કાયદેસર અને ગેરકાયદે રહેતા ઘણા ગુજરાતીઓ આવા પ્રકારના ધંધા સાથે જોડાયેલા છે. હવે જેટલી રકમનું પાર્સલ ઉઠાવવાનું હોય તેની 10 ટકા રકમ કુરિયરને મળી જાય છે અને તેણે ગોલ્ડ કે કેશથી ભરેલું પાર્સલ કહેવામા આવે તે વ્યક્તિને ત્યાંથી ઉઠાવી એક નિશ્ચિત વ્યક્તિને સોંપી દેવાનું હોય છે. આ ધંધામાં અમેરિકન્સ પાસેથી કરોડો ડોલરનું ફ્રોડ કરવામાં આવે છે અને તેમાં જે માલ મળે છે તેનો પણ અમેરિકામાં તાત્કાલિક વહીવટ પણ થઈ જાય છે.