પાકિસ્તાન સરકારનો વિવાદાસ્પદ નિર્ણય, આતંકવાદી મસૂદ અઝહરના પરિવારને 14 કરોડનું વળતર ...

પાકિસ્તાનની શહેબાઝ શરીફ સરકાર એક મોટા વિવાદમાં ફસાઈ ગઈ છે. એવા અહેવાલો છે કે સંયુક્ત રાષ્ટ્ર દ્વારા જાહેર કરાયેલા આતંકવાદી અને પ્રતિબંધિત આતંકી જૂથ જૈશ-એ-મોહમ્મદના વડા મસૂદ અઝહરને 14 કરોડ રૂપિયાનું જંગી વળતર આપી શકે છે. હકીકતમાં, પાકિસ્તાનની સરકારે ભારતીય હુમલામાં માર્યા ગયેલા લોકોના પરિજનોને એક-એક કરોડ રૂપિયા વળતર આપવાની જાહેરાત કરી છે. આ સાથે હુમલામાં નાશ પામેલા ઘરો અને બિલ્ડિંગોના પુનર્નિર્માણનું પણ વચન આપ્યું છે. આ નિર્ણયની ભારતીય અધિકારીઓ અને આંતરરાષ્ટ્રીય નિરીક્ષકો બંનેએ આકરી ટીકા કરી છે, જેમને ડર છે કે પુનઃનિર્મિત ઇમારતોનો ઉપયોગ ફરી એકવાર આતંકવાદી પ્રવૃત્તિઓને પ્રોત્સાહન આપવા માટે થઈ શકે છે.

શરીફ સરકાર મૃતકોના પરિજનોને 1-1 કરોડનું વળતર આપશે...

એક અહેવાલ અનુસાર, PM શહેબાઝ શરીફે ભારતના હવાઈ હુમલામાં માર્યા ગયેલા દરેક વ્યક્તિ માટે એક-એક કરોડ રૂપિયા વળતર આપવાની જાહેરાત કરી છે. આ નાણાં મૃતકોના નજીકના પરિજનોને મળશે. આનો અર્થ એ છે કે, જો મસૂદ અઝહરને એકમાત્ર કાનૂની વારસદાર માનવામાં આવે તો તેને 14 કરોડ રૂપિયા મળી શકે છે, કારણ કે તેના પરિવારના 14 લોકો માર્યા ગયા હતા.

આતંકવાદી અઝહરના પરિવારના 14 લોકો માર્યા ગયા હતા...

હકીકતમાં, તાજેતરમાં જ ઓપરેશન સિંદૂરમાં ભારતીય વાયુસેનાએ પાકિસ્તાનના આતંકવાદી ઠેકાણાઓ પર હુમલો કર્યો હતો. જેમાં મસૂદ અઝહરના પરિવારના 10 સભ્યો અને તેના 4 નજીકના લોકો માર્યા ગયા હતા. અઝહર તેના પરિવારનો કાનૂની રીતે ઉત્તરાધિકારી છે. અઝહરના પરિવારના 14 સભ્યોના મૃત્યુ થયા હોવાથી, આ હિસાબે અઝહરને 14 કરોડ રૂપિયા વળતર મળી શકે છે. મસૂદ અઝહરે પોતે પોતાના પરિવારના લોકોના મૃત્યુની પુષ્ટિ કરી હતી. ઓપરેશન સિંદૂરમાં અઝહરની મોટી બહેન અને તેના પતિ, એક ભત્રીજો અને તેની પત્ની, એક ભત્રીજી અને તેના પરિવારના પાંચ બાળકો સામેલ હતા. આ મૃત્યુ ભારતીય હવાઈ હુમલા દરમિયાન થયા હતા, જેમાં લાહોરથી લગભગ 400 કિલોમીટર દૂર પંજાબના બહાવલપુરમાં આતંકવાદી માળખાને નિશાન બનાવવામાં આવ્યું હતું.

આંતરરાષ્ટ્રીય નિરીક્ષકોએ પાકિસ્તાનની ટીકા કરી...

આંતરરાષ્ટ્રીય નિરીક્ષકોએ પણ આ અંગે પોતાનો મત વ્યક્ત કર્યો છે, જેમાંથી કેટલાકનું કહેવું છે કે પાકિસ્તાનના આ પગલાને સંયુક્ત રાષ્ટ્ર દ્વારા આતંકવાદી જાહેર કરાયેલા વ્યક્તિઓ અને જૂથો માટે મૌન સમર્થન તરીકે સમજી શકાય છે. આ ઘટનાક્રમે આતંકવાદ સામે લડવા માટે પાકિસ્તાનના અભિગમ અને આંતરરાષ્ટ્રીય કાયદા હેઠળ તેની જવાબદારીઓ વિશેની ચર્ચાને ફરીથી વેગ આપ્યો છે. આ વિવાદ એવા સમયે સામે આવ્યો છે જ્યારે પાકિસ્તાન સરહદ પારના આતંકવાદ અને પ્રાદેશિક સ્થિરતાને પહોંચી વળવાની તેની રીત માટે સખત તપાસના દાયરામાં છે. ટીકાકારોનું માનવું છે કે જાણીતા આતંકવાદી નેતાના પરિવારને વળતર આપવું એ માત્ર ખોટો સંદેશ જ નથી જતો પરંતુ દક્ષિણ એશિયામાં શાંતિ અને સલામતીને પ્રોત્સાહન આપવાના પ્રયત્નોમાં પણ અવરોધ ઊભો કરી શકે છે.

જણાવી દઈએ કે 7 મેના રોજ ભારતીય સેનાએ જામિયા મસ્જિદ સુભાન અલ્લાહમાં જૈશ-એ-મોહમ્મદના મુખ્યાલય સહિત મુખ્ય આતંકવાદી ઠેકાણાઓ પર ચોક્કસ હુમલો કર્યો હતો. આ હુમલામાં 100 થી વધુ આતંકવાદીઓ માર્યા ગયા હતા, જેમાં મુખ્ય આતંકવાદીઓનો પણ સમાવેશ થતો હતો.