તેલ સંકટ ટળ્યું: ઈરાને ભારતીય ટેન્કરોને આપી છૂટ

પશ્ચિમ એશિયામાં ઈરાન, ઈઝરાયેલ અને અમેરિકા વચ્ચે વધતા જતા યુદ્ધના તણાવ વચ્ચે ભારત માટે ખૂબ જ મહત્વના સમાચાર આવ્યા છે.

ભારતના વિદેશ મંત્રી એસ. જયશંકર અને ઈરાનના વિદેશ મંત્રી સૈયદ અબ્બાસ અરાઘચી વચ્ચે થયેલી ટેલિફોનિક વાતચીત બાદ ઈરાને ભારતીય તેલ ટેન્કરોને 'સ્ટ્રેટ ઓફ હોર્મુઝ' (હોર્મુઝની સામુદ્રધુની)માંથી સુરક્ષિત પસાર થવાની મંજૂરી આપી છે.

શા માટે મહત્વનું છે આ પગલું?

સ્ટ્રેટ ઓફ હોર્મુઝ એ વિશ્વનો સૌથી વ્યસ્ત અને સંવેદનશીલ દરિયાઈ માર્ગ છે, જ્યાંથી દુનિયાનો અંદાજે 20 થી 25 ટકા તેલ અને ગેસનો પુરવઠો પસાર થાય છે. ઈરાને હાલમાં અમેરિકા, યુરોપ અને ઈઝરાયેલના જહાજો માટે આ માર્ગ બંધ કરી દીધો છે, પરંતુ ભારત સાથેના મજબૂત સંબંધોને કારણે ભારતીય જહાજો 'પુષ્પક' અને 'પરિમલ'ને ત્યાંથી સુરક્ષિત રીતે નીકળવાની મંજૂરી મળી છે.

ભારત તેની જરૂરિયાતનું 50 ટકા એલએનજી (LNG) આ જ માર્ગે આયાત કરે છે. જો આ માર્ગ બંધ રહે તો ભારતમાં ગેસ અને તેલના ભાવમાં મોટો ઉછાળો આવી શકે તેમ હતો. જોકે, જયશંકરની મધ્યસ્થી બાદ હવે ભારતીય જહાજોને આંતરરાષ્ટ્રીય સ્તરે ચાલતી હિંસા અને હુમલાઓ વચ્ચે પણ સુરક્ષા કવચ મળશે.

નોંધનીય છે કે ગુરુવારે જ આ ક્ષેત્રમાં ઓછામાં ઓછા છ જહાજો પર હુમલા થયા હોવાના અહેવાલ છે, જે વચ્ચે ભારતને મળેલી આ છૂટછાટ મોટી સિદ્ધિ ગણાય.

તેલના ભાવમાં વધઘટ

યુદ્ધને કારણે ક્રૂડ ઓઈલના ભાવ જે અગાઉ 72.48 ડોલર હતા તે વધીને 119.50 ડોલર સુધી પહોંચી ગયા હતા. જોકે, ભારત જેવા મોટા તેલ આયાતકાર દેશ માટે આ માર્ગ ખુલવો એ અર્થતંત્ર માટે સંજીવની સમાન છે.

ભારત સતત યુદ્ધમાં બંને પક્ષો સાથે વાતચીત કરીને શાંતિ અને ડી-એસ્કેલેશન (તણાવ ઘટાડવો) ની હિમાયત કરી રહ્યું છે.