ઈરાન-ઈઝરાયલ યુદ્ધ: ભારતીય વિદ્યાર્થીઓની સુરક્ષા માટે ભારત સરકારનું રેસ્ક્યુ ઓપરેશન

ઈરાન અને ઈઝરાયલ વચ્ચે ચાલી રહેલું યુદ્ધ આજે પાંચમા દિવસે પણ યથાવત છે. ઈઝરાયલે તેહરાન યુનિવર્સિટી ઓફ મેડિકલ સાયન્સ પર હુમલો કર્યો, જેમાં બે ભારતીય વિદ્યાર્થીઓ ઘાયલ થયા. આ બંને વિદ્યાર્થીઓ જમ્મુ-કાશ્મીરના રહેવાસી છે અને તેમને સામાન્ય ઈજાઓ થઈ છે. યુનિવર્સિટી દ્વારા વિદ્યાર્થીઓની સુરક્ષા માટે તેમને રામસર ખસેડવામાં આવ્યા છે.   આ યુદ્ધની વચ્ચે ઈરાનમાં ફસાયેલા લગભગ 10,000 ભારતીયો, ખાસ કરીને મેડિકલ અને ધાર્મિક સંસ્થાઓમાં અભ્યાસ કરતા વિદ્યાર્થીઓ, માટે ભારત સરકારે રેસ્ક્યુ ઓપરેશન શરૂ કરવાની તૈયારી કરી છે. ઈરાન સરકારે પણ ભારતીયો સહિત વિદેશી નાગરિકોને સુરક્ષિત તેમના દેશ પરત મોકલવા સહમતિ દર્શાવી છે. આ નાગરિકોને અઝરબૈજાન, તુર્કમેનિસ્તાન અને અફઘાનિસ્તાનની સરહદો દ્વારા ભારત લાવવામાં આવશે.   ઈરાનમાં ફસાયેલા ભારતીય વિદ્યાર્થીઓએ ઈરાન અને ઈઝરાયલને યુદ્ધ અસ્થાયી રૂપે રોકવા વિનંતી કરી છે, જેથી તેઓ સુરક્ષિત રીતે વતન પરત ફરી શકે. એક વિદ્યાર્થીએ મીડિયાને જણાવ્યું, “શુક્રવારે રાત્રે 2:30 વાગ્યે બેઝમેન્ટમાં થયેલા ધડાકાથી અમે ડરી ગયા હતા. ત્યારથી અમે ઊંઘી શક્યા નથી.” ઈઝરાયલના બેલિસ્ટિક મિસાઈલ હુમલાઓથી વિદ્યાર્થીઓમાં ભયનો માહોલ છે.   ભારતીય દૂતાવાસે ઈરાનમાં ભારતીયોની સુરક્ષા માટે એડવાઈઝરી જારી કરી છે, જેમાં 24/7 હેલ્પલાઈનની સ્થાપના કરવામાં આવી છે. દૂતાવાસે ભારતીયોને સાવચેત રહેવા, બિનજરૂરી હિલચાલ ટાળવા અને સ્થાનિક સુરક્ષા પ્રોટોકોલનું પાલન કરવા જણાવ્યું છે. તેલ અવીવમાં ભારતીય દૂતાવાસ ઈઝરાયલમાં રહેતા ભારતીયો, જેમાં વિદ્યાર્થીઓ, કેર વર્કર્સ અને વ્યવસાયીઓનો સમાવેશ થાય છે, તેમના સંપર્કમાં છે.   ભારત સરકાર અને દૂતાવાસ ભારતીયોની સલામતીને સર્વોચ્ચ પ્રાથમિકતા આપી રહ્યા છે. આ યુદ્ધની સ્થિતિમાં ભારતીય નાગરિકોને સુરક્ષિત ઘરે લાવવા તમામ પ્રયાસો ચાલુ છે.