ઈઝરાયલ માટે જાસૂસી કરવાના આરોપમાં ઈરાને ત્રણ લોકોને ફાંસી આપી!

ઈઝરાયલની ગુપ્તચર એજન્સી 'મોસાદ' માટે જાસૂસી કરવાના આરોપમાં ત્રણ લોકોને ઈરાને બુધવારે ફાંસી આપી છે. ઈરાની ન્યાયતંત્રની વેબસાઇટ 'મિઝાન ઓનલાઈન' અનુસાર તુર્કીની સરહદ નજીક ઉત્તર પશ્ચિમ શહેર ઉર્મિયામાં ઈદ્રીસ અલી, આઝાદ શોજાઈ અને રસુલ અહેમદ રસુલ નામના વ્યક્તિઓને ફાંસી આપવામાં આવી છે.

ન્યાયતંત્રે કહ્યું, "ઈદ્રીસ અલી, આઝાદ શોજાઈ અને રસુલ અહેમદ રસુલે હત્યા કરવા દેશમાં સાધનો આયાત કરવાનો પ્રયાસ કર્યો હતો. ત્યારબાદ તેની ધરપકડ કરવામાં આવી હતી અને યહૂદી શાસનને મદદ કરવાનો આરોપ મૂકવામાં આવ્યો હતો. બુધવારે સવારે સજા સંભળાવવામાં આવી હતી. ત્યારબાદ તેને ફાંસી આપવામાં આવી હતી."

ઈરાન પર લશ્કરી કાર્યવાહી બાદ અમેરિકાના રાષ્ટ્રપતિ ડોનાલ્ડ ટ્રમ્પે યુદ્ધવિરામની જાહેરાત કર્યાના એક દિવસ પછી ત્રણેય લોકોને ફાંસી આપવામાં આવી છે. બંને પક્ષો હાલમાં યુદ્ધવિરામ પર સંમત છે. ઈઝરાયલ સાથેના સંઘર્ષ દરમિયાન ઈરાને ઈઝરાયલ સાથે સંબંધો હોવાના આરોપમાં ઓછામાં ઓછા 700 લોકોની ધરપકડ કરી હતી.

અગાઉ, ઈરાન દ્વારા 14 જૂન અને 23 જૂનના રોજ પણ ફાંસી આપવામાં આવી હતી. સોમવારે, 'મોસાદ' માટે જાસૂસી કરવાના દોષિત ઠરેલા અન્ય એક વ્યક્તિને ફાંસી આપવામાં આવી હતી.

ઈરાની ન્યાયતંત્રે કહ્યું, "મોહમ્મદ અમીન મહદવી શાયસ્તેને યહૂદી શાસન સાથે ગુપ્તચર સહયોગ બદલ ફાંસી આપવામાં આવી હતી." શાયસ્તેને 2023 માં ઇઝરાયલી ગુપ્તચર એજન્સી મોસાદ સાથેના કથિત સંબંધો બદલ ધરપકડ કરવામાં આવી હતી. અગાઉ 22 જૂનના રોજ, માજિદ મોસાયેબીને પણ મોસાદને 'સંવેદનશીલ માહિતી' પહોંચાડવાના આરોપમાં ફાંસી આપવામાં આવી હતી.

ન્યાયતંત્રે કહ્યું હતું કે, "માજિદ મોસાયેબીને ફાંસી આપવામાં આવી હતી. સુપ્રીમ કોર્ટે તેની સજાની પુષ્ટિ કરી હતી." મોસાયેબી પર 'સંવેદનશીલ માહિતી' મોસાદને પહોંચાડવાનો પ્રયાસ કરવાનો આરોપ હતો.

સમાચાર એજન્સીઓના અહેવાલોમાં દાવો કરવામાં આવ્યો છે કે 13 જૂને તેહરાન પર હવાઈ હુમલા શરૂ થયા પહેલા ઇઝરાયલી જાસૂસો શસ્ત્રોની દાણચોરી કરી રહ્યા હતા.

--IANS