સુશીલા કાર્કી કેટલા મત મેળવીને વડાપ્રધાન બન્યા?

નેપાળના વચગાળાના વડાપ્રધાનની પસંદગી માટે ડિસ્કોર્ડ પર ઓનલાઈન મતદાન કરવામાં આવ્યું હતું. જેમાં 7,713 લોકોએ મતદાન કર્યું હતું. જેમાંથી 3,833 લોકોએ કાર્કીના પક્ષમાં મતદાન કર્યું હતું. આ સર્વે નેપાળના રાષ્ટ્રપતિ રામચંદ્ર પૌડેલ સમક્ષ રજૂ કરવામાં આવ્યો હતો. ત્યારબાદ પૌડેલે કાર્કીને વચગાળાના વડાપ્રધાન પદની ખુરશી સોંપી હતી.

નેપાળમાં સુશીલા કાર્કીના વચગાળાના વડાપ્રધાન બનવા અંગે નવો ખુલાસો થયો છે. આ અંતર્ગત, કાર્કીને વડાપ્રધાન તરીકે ચૂંટવા માટે એક ગેમિંગ એપનો ઉપયોગ કરવામાં આવ્યો હતો અને સોશિયલ મીડિયા પર સરવે કરવામાં આવ્યા હતા. રસપ્રદ બાબત એ છે કે, કાર્કીને ફક્ત 7713 મતોના આધારે પસંદ કરવામાં આવ્યા હતા. આ મત કોણે આપ્યા તે હજુ સુધી કોઈને ખબર નથી.

નેપાળી મીડિયાના અહેવાલ મુજબ કે.પી.શર્મા ઓલીના રાજીનામા પછી જનરેશન-ઝેડ નેતાઓએ ડિસ્કોર્ડ પર એક સરવે હાથ ધર્યો હતો. જેમાં સુશીલા કાર્કી ઉપરાંત, ધારણના મેયર હાર્ડકા સંપાગ અને મહાવીર પુનના નામ સરવેમાં સામેલ કરાયા હતા.

7,713 મતમાં કાર્કી પ્રથમ ક્રમે આવ્યા

ડિસ્કોર્ડ પર કરવામાં આવેલા મતદાનમાં કુલ 7,713 મત પડ્યા. કાર્કીના પક્ષમાં 50 ટકા મત પડ્યા. 3,833 લોકોની પહેલી પસંદગી કાર્કી હતા. બીજા ક્રમે રેન્ડમ નેપાળી હતા. રેન્ડમ નેપાળી એટલે નેપાળનો વ્યક્તિ. ત્રીજા ક્રમે સાગર ધકલ હતા. જેમના પક્ષમાં 1000 થી વધુ લોકોએ મતદાન કર્યું.

ધારણના મેયર હાર્ડકા સંપાગ ચોથા ક્રમે અને મહાવીર પુન પાંચમા ક્રમે હતા. આ સરવેના આધારે, જનરલ-ઝેડના પ્રતિનિધિઓએ રાષ્ટ્રપતિ રામચંદ્ર પૌડેલ સાથે નક્કી કર્યુ હતું. એવું કહેવાય છે કે જનરેશન-ઝેડના કહેવા મુજબ પૌડેલે કાર્કીને વચગાળાના વડાપ્રધાન તરીકે નિયુક્ત કર્યા હતા.

સરવે સંબંધિત પ્રશ્નો ઉભા થયા

આ સરવે સંબંધિત 2 સવાલ ઉઠી રહ્યા છે. ડિસ્કોર્ડ એક અમેરિકન ગેમિંગ કંપની છે. તેના 20 કરોડ વપરાશકર્તાઓ છે. ડિસ્કોર્ડ પર આ પ્રશ્ન કોણે પોસ્ટ કર્યો અને તેમણે કઈ ક્ષમતામાં આ પ્રશ્ન પોસ્ટ કર્યો.

બીજું કે, આ સરવેમાં કોણે ભાગ લીધો? ગોપનીયતાના આધારે ડિસ્કોર્ડ તેના વપરાશકર્તાઓનું સ્થાન જાહેર કરતું નથી. શું ફક્ત નેપાળના લોકોએ કાર્કીની ચૂંટણીમાં ભાગ લીધો હતો અને તે લોકો કોણ હતા?

કાર્કી સામે વિરોધ શરૂ થયો 

માત્ર ત્રણ દિવસ પછી નેપાળમાં કાર્કી સામે વિરોધ શરૂ થયો છે. રસપ્રદ વાત એ છે કે કાર્કીનો વિરોધ તે લોકો દ્વારા કરવામાં આવી રહ્યો છે. જેમણે ત્રણ દિવસ પહેલા તેમની નિમણૂકમાં મહત્વપૂર્ણ ભૂમિકા ભજવી હતી. નેપાળી મીડિયા અનુસાર સુદાન ગુરુંગ અને તેમની ટીમે કાર્કી સામે વિરોધ શરૂ કર્યો છે.

રવિવાર અને સોમવારે ગુરુંગની ટીમે વડાપ્રધાનના નિવાસસ્થાનની બહાર વિરોધ પ્રદર્શન કર્યું હતું. ગુરુંગની ટીમનું કહેવું છે કે, વડાપ્રધાન સુશીલા કાર્કી મનસ્વી રીતે નિર્ણયો લઈ રહ્યા છે. ગુરુંગની ટીમે મંત્રીમંડળ વિસ્તરણ અંગે કાર્કીનો વિરોધ કર્યો છે.