ભારતને લઈને અમેરિકી ગુપ્તચર નિર્દેશકનું મોટું નિવેદન, કહ્યું- આતંકવાદની કોઈ સીમા નથી અને અમે ભારતની...

પહલગામમાં થયેલા આતંકવાદી હુમલાની અમેરિકા સહીત મોટાભાગના દેશોએ સખત શબ્દોમાં નિંદા કરી છે. વિશ્વના ઘણા દેશોએ આ હુમલા બાદ ભારત પ્રત્યે ઊંડી સહાનુભુતિ વ્યક્ત કરી છે. આ દરમિયાન, અમેરિકાના રાષ્ટ્રીય ગુપ્તચર વિભાગના નિર્દેશક તુલસી ગબાર્ડે પહલગામના આ ભયાનક હુમલાની આકરી નિંદા કરતા ભારતને મદદ કરવાની ખાતરી આપી છે. તેમણે સોશિયલ મીડિયા પ્લેટફોર્મ 'X' પર લખ્યું કે, "પહલગામમાં 26 હિન્દુઓને નિશાન બનાવીને કરવામાં આવેલા ઘાતકી ઇસ્લામિક આતંકવાદી હુમલા સામે અમે ભારતની સાથે એકતાથી ઉભા છીએ."

તેમણે વધુમાં કહ્યું કે, "જે લોકોએ પોતાના પ્રિયજનો ગુમાવ્યા છે તેમના માટે મારી પ્રાર્થના અને ઊંડી સંવેદના છે. હું PM નરેન્દ્ર મોદી અને ભારતના તમામ લોકો સાથે છું. અમે તમારી સાથે છીએ અને આ જઘન્ય હુમલા માટે જવાબદાર લોકોને પકડવામાં તમને પૂરો સહયોગ આપોશું." ઉલ્લેખનીય છે કે, વિશ્વના મોટાભાગના દેશોએ આ ઘટના પર ગમ્ભીએ ચિંતા વ્યક્ત કરી છે. ઘણા દેશોના રાષ્ટ્રાધ્યક્ષોએ PM મોદી સાથે ટેલિફોનિક વાતચીત કરીને હુમલા અંગે પોતાની ચિંતા જણાવી છે. 

બ્રિટનની સખત નિંદા...

બ્રિટિશ PM કીર સ્ટાર્મરે પણ શુક્રવારે પહલગામના આંતકવાદી હુમલાને એક 'ઘૃણાસ્પદ' ઘટના ગણાવી છે. સ્ટાર્મરે બ્રિટનના લોકો વતી પોતાની ઊંડી સંવેદના વ્યક્ત કરી અને બંને નેતાઓએ એકબીજા સાથે સંપર્કમાં રહેવા માટે સહમતિ દર્શાવી છે. બ્રિટનના સાંસદોએ પણ જમ્મુ-કાશ્મીરના પહલગામમાં થયેલા આ આતંકવાદી હુમલાની સખત નિંદા કરી છે. બ્રિટનના સાંસદ તનમનજીત સિંહ ધેસીએ આશા વ્યક્ત કરી છે કે આ હુમલા પાછળ રહેલા ગુનેગારોને ટૂંક સમયમાં ન્યાયના કઠોડામાં લાવવામાં આવશે.