લોરેન્સ ગેંગ સામે FBIનું 'હાર્ડ બોલ' ઓપરેશન!

FBI's 'Operation Hard Ball' against Lawrence Bishnoi gang: અમેરિકાની તપાસ એજન્સી FBIએ લોરેન્સ બિશ્નોઈ ગેંગ સામે અત્યાર સુધીનું સૌથી મોટું આંતરરાષ્ટ્રીય અભિયાન શરૂ કર્યું છે. 'ઓપરેશન હાર્ડ બોલ' નામ હેઠળ અમેરિકા, કેનેડા અને યુરોપના વિવિધ વિસ્તારોમાં એક સાથે કાર્યવાહી હાથ ધરવામાં આવી છે. આ અભિયાન દરમિયાન અંદાજે 50 થી વધુ સ્થળોએ દરોડા પાડી 20 થી વધુ શખ્સોની અટકાયત કરવામાં આવી હોવાનું જાણવા મળ્યું છે.

ત્રણ ખંડમાં એકસાથે દરોડા, 'ઓપરેશન હાર્ડ બોલ' નામ આપ્યું
7 જુલાઈએ શરૂ કરાયેલા ઓપરેશનમાં FBI સાથે અન્ય સુરક્ષા એજન્સીઓ પણ જોડાઈ હતી. કેલિફોર્નિયા સહિત અનેક સ્થળોએ દરોડા દરમિયાન મોટી માત્રામાં હથિયારો, ડ્રગ્સ અને અન્ય પ્રતિબંધિત સામગ્રી જપ્ત કરવામાં આવી છે. તપાસ એજન્સીઓ હવે જપ્ત કરાયેલા પુરાવાના આધારે વધુ તપાસ આગળ ધપાવી રહી છે.

 

The #FBI is offering a reward of up to $50,000 for information leading to the arrest of Satinderjeet Singh, #wanted for his alleged involvement in the Lawrence Bishnoi Organized Crime Group which is allegedly engaged in a variety of violent acts in Southern California, and across… pic.twitter.com/BdCxmELUKv

— FBI Most Wanted (@FBIMostWanted) July 7, 2026

 

ગોલ્ડી બ્રાર અને જગ્ગુ ભગવાનપુરિયાનું નેટવર્ક પણ નિશાને
આ કાર્યવાહી માત્ર લોરેન્સ બિશ્નોઈ ગેંગ પૂરતી મર્યાદિત નથી. તપાસમાં ગેંગના નજીકના સાથીઓ ગણાતા ગોલ્ડી બ્રાર અને જગ્ગુ ભગવાનપુરિયાના આંતરરાષ્ટ્રીય નેટવર્કને પણ નિશાન બનાવવામાં આવ્યું છે. તપાસ મુજબ ગેંગના અનેક સભ્યો અમેરિકા, કેનેડા અને યુરોપમાં રહીને ગેરકાયદે પ્રવૃત્તિઓ ચલાવતા હતા. તેઓ ભારત ઉપરાંત વિદેશમાં વસતા ભારતીયોને પણ ધમકી આપી ખંડણી ઉઘરાવતા હોવાના આરોપો છે.

કેનેડાએ ગેંગને આતંકવાદી સંગઠન જાહેર કરી
ગયા વર્ષે કેનેડા સરકારે લોરેન્સ બિશ્નોઈ ગેંગને આતંકવાદી સંગઠન તરીકે જાહેર કર્યું હતું. ત્યારથી ગેંગની આંતરરાષ્ટ્રીય પ્રવૃત્તિઓ પર વિવિધ દેશોની સુરક્ષા એજન્સીઓ સતત નજર રાખી રહી છે.

અનમોલ બિશ્નોઈ પણ તપાસના કેન્દ્રમાં
લોરેન્સ બિશ્નોઈના ભાઈ અનમોલ બિશ્નોઈનું નામ પણ તપાસમાં ચર્ચામાં રહ્યું છે. તેના પર અમેરિકામાં રહીને મુંબઈમાં NCP નેતા બાબા સિદ્દીકીની હત્યાનું કાવતરું રચવાનો તેમજ અભિનેતા સલમાન ખાનના નિવાસસ્થાન પર થયેલા ગોળીબારના કથિત આયોજનમાં સંડોવણીનો આરોપ મૂકાયો હતો. ત્યારબાદ તેને ભારત મોકલવામાં આવ્યો હતો.

આંતરરાષ્ટ્રીય નેટવર્ક પર એજન્સીઓની નજર
ભારતીય તપાસ એજન્સીઓના સૂત્રો મુજબ લોરેન્સ બિશ્નોઈ ગેંગે અમેરિકા, કેનેડા અને યુરોપમાં પોતાનું મજબૂત નેટવર્ક ઉભું કર્યું હતું. વિદેશમાં આશ્રય લઈ રહેલા ગેંગના સભ્યો વિવિધ પ્રકારની ગુનાહિત પ્રવૃત્તિઓનું સંચાલન કરતા હોવાનું માનવામાં આવે છે. હાલ FBIનું 'ઓપરેશન હાર્ડ બોલ' ચાલુ છે અને તપાસ આગળ વધતાં વધુ ધરપકડો તથા નવા ખુલાસા થવાની શક્યતા વ્યક્ત કરવામાં આવી રહી છે.

 

As part of Operation "Hard Ball," the FBI and our law enforcement partners throughout California, other U.S. cities and in Canada, India and Europe collaborated to execute dozens of search and arrest warrants targeting 37 members of violent transnational organizations who are… pic.twitter.com/WXIOk6vALU

— FBI Los Angeles (@FBILosAngeles) July 7, 2026

 

સંયુક્ત કાર્યવાહીમાં 24 શખ્સોની ધરપકડ
યુએસ નેશનલ ઇન્વેસ્ટિગેશન એજન્સી (FBI) એ ભારતમાં જેલમાં બંધ કુખ્યાત ગેંગસ્ટર લોરેન્સ બિશ્નોઈ અને ભારત સ્થિત બે અન્ય ગુનાહિત સિન્ડિકેટ સામે અત્યાર સુધીનું સૌથી મોટું આંતરરાષ્ટ્રીય ઓપરેશન શરૂ કર્યું છે. "ઓપરેશન હાર્ડ બોલ" નામના અત્યંત ગુપ્ત અને સુનિયોજિત ઓપરેશનમાં યુએસ, કેનેડા અને યુરોપમાં 50 થી વધુ સ્થળોએ એક સાથે દરોડા પાડવામાં આવ્યા હતા. આ ઓપરેશનમાં અત્યાર સુધીમાં 24 ગુનેગારોની ધરપકડ કરવામાં આવી છે.

યુએસ ડિપાર્ટમેન્ટ ઓફ જસ્ટિસ (DOJ) અનુસાર આ કાર્યવાહી વર્ષોની સઘન તપાસ બાદ કરવામાં આવી છે. ત્રણ અલગ-અલગ ફેડરલ આરોપોમાં કુલ 37 આરોપીઓના નામ આપવામાં આવ્યા છે. આમાંથી 24 લોકોની કેલિફોર્નિયા, ઇન્ડિયાના, જ્યોર્જિયા (યુએસએ), કેનેડા અને સ્પેનમાં ધરપકડ કરવામાં આવી છે.

કુલ 37 આરોપીઓ પૈકી ભારતીય જેલમાં બે શખ્સોનો સમાવેશ થાય છે. કેલિફોર્નિયામાં ધરપકડ કરાયેલા 11, ઇન્ડિયાનામાં 1 અને જ્યોર્જિયામાં 1, કેનેડામાં 3, સ્પેનમાં 1 આરોપી અને યુએસમાંથી આરોપીઓની ધરપકડ કરવામાં આવી છે. જ્યારે 7 આરોપીઓ પહેલેથી જ કસ્ટડીમાં છે. એજન્સીઓ 10 ભાગેડુઓની શોધ કરી રહી છે. બિશ્નોઈ ભારતમાં પહેલેથી જ જેલમાં છે. જ્યારે તેનો સાથી, ગોલ્ડી બ્રાર હજુ પણ ફરાર છે.

કાર્યવાહીના કેન્દ્રમાં ત્રણ મુખ્ય ગેંગ
એફબીઆઈની કાર્યવાહીના કેન્દ્રમાં મુખ્ય ત્રણ ગેંગને નિશાન બનાવવામાં આવી છે. જેમાં લોરેન્સ બિશ્નોઈ ગેંગ, જગ્ગુ ભગવાનપુરિયા ગેંગ અને રવિન્દર સિંહ ઢાંડાનું ડ્રગ નેટવર્ક છે. યુએસ એફબીઆઈ અને કેનેડિયન પોલીસે સંયુક્ત રીતે ઓપરેશન હાર્ડબોલ હાથ ધર્યું ત્યારે આ કેસમાં હવે એક નવો વૈશ્વિક વળાંક આવ્યો છે. સુરક્ષા એજન્સીઓનો દાવો છે કે, જેલમાં બંધ ભારતીય ગેંગસ્ટર લોરેન્સ બિશ્નોઈ અને તેના ઉત્તર અમેરિકન સહયોગી ગોલ્ડી બ્રારે હાઇ-પ્રોફાઇલ રાજકીય અને ધાર્મિક નેતાની હત્યાનો આદેશ આપ્યો હતો. આ આરોપોની સત્યતા અને કાનૂની માન્યતા કોર્ટમાં ચકાસવાની બાકી છે. ત્યારે આ નવા ખુલાસાથી ફરી એકવાર આંતરરાષ્ટ્રીય સંગઠિત ગુના, વિદેશી ધરતી પર લક્ષિત હત્યાઓ અને દેશો વચ્ચે વધતા રાજદ્વારી વિવાદોના મુદ્દાઓ વૈશ્વિક ચર્ચાના કેન્દ્રમાં આવ્યા છે.

લોરેન્સ બિશ્નોઈ ગેંગ: જેલમાંથી કાર્યરત વૈશ્વિક સામ્રાજ્ય
યુએસ પ્રોસિક્યુટર્સે આરોપ લગાવ્યો છે કે, લોરેન્સ બિશ્નોઈ ભારતીય જેલમાં કેદ હોવા છતાં ગેરકાયદે મોબાઇલ ફોન અને ઇન્ટરનેટ-આધારિત સુરક્ષિત સંચાર ઉપકરણો (સેટેલાઇટ ફોન) દ્વારા વિશ્વભરમાં તેના ગુનાહિત નેટવર્કનું સંચાલન કરવાનું ચાલુ રાખે છે. ગોલ્ડી બ્રારને ઉત્તર અમેરિકામાં બિશ્નોઈ ગેંગના કમાન્ડર તરીકે અને રોહિત ગોદારાને યુરોપમાં ગેંગના ઇન્ચાર્જ તરીકે કામ આપવામાં આવ્યું છે.  આ ગેંગ ભારતીય ઇમિગ્રન્ટ્સ (ખાસ કરીને પંજાબી સમુદાય) ને ડરાવવા અને ખંડણી માટે સોશિયલ મીડિયા પર તેની ગુનાહિત છબીનો પ્રચાર કરે છે. એન્ક્રિપ્ટેડ એપ્સ (જેમ કે વોટ્સએપ) દ્વારા પીડિતો પાસેથી લાખો ડોલરની ખંડણી માંગવામાં આવે છે.

તપાસમાં દાવો કરવામાં આવ્યો છે કે, જૂન 2023 માં સરે (બ્રિટિશ કોલંબિયા, કેનેડા) માં એક અગ્રણી રાજકીય અને શીખ અલગતાવાદી ધાર્મિક નેતા હરદીપ સિંહ નિજ્જરની હત્યા લોરેન્સ બિશ્નોઈ અને ગોલ્ડી બ્રાર દ્વારા જેલ અને વિદેશમાં કરવાનો આદેશ આપવામાં આવ્યો હતો. બિશ્નોઈ ગેંગે યુએસ અને કેનેડા વચ્ચે આંતરરાષ્ટ્રીય કોકેઈન હેરફેરમાંથી મળેલી રકમથી તેની ગેંગને ભંડોળ પૂરું પાડ્યું હતું. તેઓ હરીફ ગેંગ પાસેથી કોકેઈન શિપમેન્ટ પણ મેળવતા હતા.

જગ્ગુ ભગવાનપુરિયા ગેંગ
બીજો મોટો ફેડરલ આરોપ ભારત સ્થિત ગેંગસ્ટર જગ્ગુ ભગવાનપુરિયાના સંગઠનને લક્ષ્ય બનાવે છે. ગેંગનું નેટવર્ક યુનાઇટેડ સ્ટેટ્સ, કેનેડા, યુનાઇટેડ કિંગડમ, યુરોપ, ઓસ્ટ્રેલિયા અને ન્યુઝીલેન્ડમાં ફેલાયેલું છે. આ ગેંગ ભાડા માટે હત્યા, અપહરણ, ખંડણી, હથિયારોની હેરફેર અને ડ્રગ હેરફેરમાં સંડોવાયેલી છે. તપાસમાં બહાર આવ્યું છે કે આ ગેંગે તેના હરીફોને ખતમ કરવા માટે ભારતમાં ભ્રષ્ટ અધિકારીઓની મદદનો પણ ઉપયોગ કર્યો હતો.

રવિન્દરસિંહ ધાંડા નેટવર્ક
ત્રીજો આરોપ કેનેડા સ્થિત ડ્રગ ટ્રાફિકર રવિન્દર સિંહ ધાંડા સામે છે. તેનું નેટવર્ક દક્ષિણ કેલિફોર્નિયાથી પરિવહન માર્ગો (ટ્રક, વગેરે) દ્વારા કેનેડામાં મોટા પ્રમાણમાં કોકેન અને મેથામ્ફેટામાઇનની દાણચોરી કરે છે. યુએસ અને કેનેડિયન એજન્સીઓએ સંયુક્ત રીતે કાર્યવાહી હાથ ધરી સેક્રામેન્ટો, કેલિફોર્નિયામાં 23 અને લોસ એન્જલસમાં 11 સ્થળોએ દરોડા પાડ્યા હતા. દરોડા દરમિયાન 1,000 કિલોગ્રામ કોકેન, 1 કિલોગ્રામ હેરોઈન, 12 ગેરકાયદેસર શસ્ત્રો, US$40,000 રોકડ જપ્ત કરી છે.

કેનેડાની રાષ્ટ્રીય પોલીસ, રોયલ કેનેડિયન માઉન્ટેડ પોલીસના કમિશનર માઇક ડુહેમે જણાવ્યું હતું કે, તેઓ ત્રણ નેટવર્કને તોડી પાડવા માટે ઘણા વર્ષોથી એફબીઆઈ સાથે કામ કરી રહ્યા છે અને સંયુક્ત કામગીરી આંતરરાષ્ટ્રીય સુરક્ષામાં એક સીમાચિહ્નરૂપ છે. આ સમગ્ર કામગીરીમાં એફબીઆઈ, લોસ એન્જલસ પોલીસ, કેનેડિયન પોલીસ (આરસીએમપી) અને યુરોપિયન સુરક્ષા એજન્સીઓ સાથે મળીને કામ કરી રહી છે.

કેનેડામાં નિજ્જરની હત્યા અને સંબંધોમાં ખટાશ
કેનેડાની ધરતી પર શીખ અલગતાવાદી અને ધાર્મિક નેતા હરદીપ સિંહ નિજ્જરની હત્યા આંતરરાષ્ટ્રીય રાજકારણ અને રાજદ્વારીના કેન્દ્રમાં રહી છે. જૂન 2023માં, બ્રિટિશ કોલંબિયાના સરેમાં એક ગુરુદ્વારાના પાર્કિંગમાં અજાણ્યા હુમલાખોરો દ્વારા નિજ્જરની ગોળી મારીને હત્યા કરવામાં આવી હતી. નિજ્જરને પ્રતિબંધિત સંગઠન ખાલિસ્તાન ટાઇગર ફોર્સ (KTF) ના વડા અને ભારત સરકારે વોન્ટેડ આતંકવાદી જાહેર કર્યા હતા. તેમની હત્યા બાદ કેનેડિયન સુરક્ષા એજન્સીઓએ સઘન તપાસ શરૂ કરતાં ભારત અને કેનેડા વચ્ચે તણાવમાં વધુ વધારો થયો હતો. કેનેડાના તત્કાલીન વડા પ્રધાન જસ્ટિન ટ્રુડોએ સંસદમાં આરોપ લગાવ્યો કે નિજ્જરની હત્યા પાછળ ભારતીય સરકારી એજન્ટોનો હાથ હોવાના "વિશ્વસનીય પુરાવા" છે. ત્યારે આ બાબતમાં મોટો રાજકીય વળાંક આવ્યો. ભારત સરકારે આ દાવાઓને ફગાવી દીધા. તેમને "સંપૂર્ણપણે વાહિયાત અને પ્રેરિત" ગણાવ્યા. આ ઘટનાથી બંને દેશો વચ્ચે ઐતિહાસિક રાજદ્વારી મડાગાંઠ શરૂ થઈ. જેના પરિણામે રાજદ્વારીઓને હાંકી કાઢવામાં આવ્યા. વિઝા સેવાઓ સ્થગિત કરવામાં આવી અને દ્વિપક્ષીય સંબંધોમાં તીવ્ર બગાડ થયો.