A320 એરક્રાફ્ટ અંગે વૈશ્વિક સ્તરે હાઇ એલર્ટ જારી કરવામાં આવ્યું છે. એરબસે તાત્કાલિક કાર્યવાહી કરવાનો આદેશ આપ્યો છે. તેના કારણે વૈશ્વિક ઉડ્ડયન ક્ષેત્ર કટોકટીની સ્થિતિમાં ધકેલાઈ ગયું છે. હજારો ફ્લાઇટ્સ પ્રભાવિત થઈ રહી છે. એરલાઇન્સ તેમના કાફલાને અપડેટ કરવા માટે દોડાદોડ કરી રહી છે. તેના કારણે મુસાફરોને અસુવિધાનો સામનો કરવો પડે તેવી શક્યતા છે.

એરબસ A320 ફેમિલી એરક્રાફ્ટ, સૌર કિરણોત્સર્ગને કારણે ફ્લાઇટ કંટ્રોલ ડેટા કરપ્ટ થયા હોવાનું જાણવા મળ્યું છે. તાજેતરમાં બનેલી એક ઘટના બાદ, એરબસે તેના લગભગ 6,000 એરક્રાફ્ટ માટે તાત્કાલિક સોફ્ટવેર/હાર્ડવેર અપડેટ્સનો આદેશ આપ્યો છે. તેની સીધી અસર વિશ્વભરની ઘણી કંપનીઓ પર પડી રહી છે. જેમાં ભારતીય એરલાઇન્સ ઇન્ડિગો અને એર ઇન્ડિયાનો સમાવેશ થાય છે. યુરોપિયન યુનિયન એવિએશન સેફ્ટી એજન્સી (EASA) એ ઇમરજન્સી એરવર્થિનેસ ડાયરેક્ટિવ (EAD) પણ લાગુ કર્યો છે. જે ચોક્કસપણે વૈશ્વિક ફ્લાઇટ કામગીરીને અસર કરશે.

સમગ્ર મામલો શું છે?

એરબસે A320 એરક્રાફ્ટ માટે સૌર કિરણોત્સર્ગ સંબંધિત સમસ્યા શોધી કાઢી છે. સૌર કિરણોત્સર્ગના સંપર્કથી ફ્લાઇટ કંટ્રોલ સિસ્ટમમાં વપરાતા ડેટા પર અસર થવાની શક્યતા છે. તેના કારણે આશરે 6 હજાર જેટલાં A320 વિમાનોને અસર થવાની સંભાવનાએ એરબસે તાત્કાલિક સોફ્ટવેર અપડેટનો આદેશ આપ્યો છે.

ભારતમાં ઇન્ડિગો અને એર ઇન્ડિયાના વિમાનો અપડેટથી પ્રભાવિત થયા હોવાના અહેવાલ છે. આ વિમાનોમાં ફેરફાર દરમિયાન કેટલીક ફ્લાઇટ્સ મોડી અથવા રદ થવાની ધારણા છે.

એરબસે એક પ્રેસ રિલીઝ કરી જણાવ્યું કે, A320 ફેમિલી એરક્રાફ્ટમાં તાજેતરમાં એક ઘટના બની હતી, જ્યાં તીવ્ર સૌર કિરણોત્સર્ગે ફ્લાઇટ કંટ્રોલ સિસ્ટમ માટે મહત્વપૂર્ણ ડેટાને કરપ્ટ કર્યો હતો. ત્યારબાદ કંપનીએ સ્વીકાર્યું કે મોટી સંખ્યામાં ઇન-સર્વિસ A320 વિમાનો પ્રભાવિત થઈ શકે છે.

એરબસે જણાવ્યું હતું કે, તેણે, ઉડ્ડયન સત્તાવાળાઓ સાથે મળીને તાત્કાલિક પગલાં લેવા એરલાઇન્સને એલર્ટ ઓપરેટર્સ ટ્રાન્સમિશન (AOT) જારી કર્યું છે. તેના આધારે, EASA એ ઇમરજન્સી એરવર્થિનેસ ડાયરેક્ટિવ લાગુ કર્યો છે. કંપની સ્વીકારે છે કે આ ભલામણો ઓપરેશનલ વિક્ષેપોનું કારણ બનશે. અમે સલામતીને ટોચની પ્રાથમિકતા રાખીને એરલાઇન્સ સાથે નજીકથી કામ કરીશું.

એરપોર્ટ ઉપર જતાં પહેલાં ફ્લાઈટ સ્ટેટસ ચકાસવા ઇન્ડિગોની અપીલ

ભારતની સૌથી મોટી એરલાઇન ઇન્ડિગોએ X પર નિવેદન જારી કરીને કહ્યું કે, "એરબસે વૈશ્વિક A320 કાફલા માટે ટેકનિકલ એડવાઈઝરી જારી કરી છે. અમે સક્રિયપણે ફરજિયાત અપડેટ્સ પૂર્ણ કરી રહ્યા છીએ. કેટલાક ફ્લાઇટ શેડ્યૂલ ફરીથી શેડ્યૂલ કરવામાં આવી શકે છે. મુસાફરોને એરપોર્ટ પર જતા પહેલા એપ્લિકેશન/વેબસાઇટ પર ફ્લાઇટ સ્ટેટસ તપાસવાની સલાહ આપવામાં આવે છે. એરલાઇને ઉમેર્યું હતું કે તેની ટીમો રિબુકિંગ અને અપડેટ્સમાં મદદ કરવા માટે 24x7 ઉપલબ્ધ છે."

એર ઈન્ડિયાની કેટલીક ફ્લાઇટ્સ મોડી પડવાની શક્યતા

એર ઇન્ડિયાએ સત્તાવાર નિવેદન જારી કરીને કહ્યું કે, "અમે એરબસ A320 વિમાન પરિવારથી વાકેફ છીએ. પરિણામે, કેટલાક વિમાનો પર સોફ્ટવેર/હાર્ડવેર રિએલાઇનમેન્ટની જરૂર પડશે. તેના કારણે ટર્ન અરાઉન્ડ સમય વધશે અને સુનિશ્ચિત સેવાઓ પર અસર પડશે. મુસાફરોને તેમની ફ્લાઇટ સ્ટેટસ તપાસવા વિનંતી કરવામાં આવે છે. કોઈપણ સહાય માટે 011-69329333, 011-69329999 પર કૉલ કરવા વિનંતી છે."

વિશ્વભરમાં મોટી કંપનીઓને અસર

ઓસ્ટ્રેલિયાની જેટસ્ટાર એરવેઝે જણાવ્યું કે, સોફ્ટવેર સમસ્યાના કારણે ઘણી ફ્લાઇટ્સ રદ કરવામાં આવી છે. દક્ષિણ કોરિયાની કોરિયન એરએ જણાવ્યું કે, રવિવાર સવાર સુધીમાં 10 એરબસ વિમાનોના અપડેટ્સ પૂર્ણ થઈ જશે. જાપાનની ANA હોલ્ડિંગ્સે અહેવાલ આપ્યો હતો કે, શનિવારે 65 ફ્લાઇટ્સ રદ કરવામાં આવી હતી. યુનાઇટેડ એરલાઇન્સ (યુએસએ) એ જણાવ્યું હતું કે, "અમારા 6 વિમાનો પ્રભાવિત થયા છે. કેટલીક ફ્લાઇટ્સમાં નાના વિક્ષેપોની અપેક્ષા છે."

કેટલા વિમાન પ્રભાવિત થયા?

દુનિયાભરમાં 11,300 થી વધુ એરબસ A320 ફેમિલી એરક્રાફ્ટ કાર્યરત છે. જેમાંથી 6,440 A320 મોડેલ છે. સૂત્રોના જણાવ્યા અનુસાર, આશરે 6,000 જેટને તાત્કાલિક સોફ્ટવેર ફેરફારની જરૂર છે. નોંધપાત્ર સંખ્યામાં વિમાનોને હાર્ડવેર રિપ્લેસમેન્ટની પણ જરૂર છે. જે સંભવિત રીતે અઠવાડિયા સુધી ગ્રાઉન્ડિંગ રહી શકે છે. 30 ઓક્ટોબરના રોજ જેટ બ્લુ ફ્લાઇટ 1230 (કાનકુન-નેવાર્ક) માં બનેલી ઘટના બાદ આ કાર્યવાહી શરૂ કરવામાં આવી છે. જેમાં ફ્લાઇટને ટેમ્પામાં કટોકટી ઉતરાણ કરવું પડ્યું હતું. ફ્લાઇટ નિયંત્રણ સમસ્યાના કારણે આ ચેતવણી જારી કરવામાં આવી હતી.

November 29, 2025 | 10:50 IST