પાકિસ્તાનની રાજધાની ઇસ્લામાબાદ ફરી એકવાર આતંકી હુમલાથી ધણધણી ઉઠી છે. શુક્રવારે નમાજ દરમિયાન શહેરના શહજાદ ટાઉન વિસ્તારમાં આવેલા તરલાઈ ઇમામબારામાં એક શક્તિશાળી વિસ્ફોટ થયો હતો. આ વિસ્ફોટ એટલો ભયાનક હતો કે તેનો અવાજ 5 કિલોમીટર દૂર સુધી સંભળાયો હતો. પ્રારંભિક અહેવાલો મુજબ, આ દુર્ઘટનામાં 25 થી વધુ લોકોએ જીવ ગુમાવ્યા છે અને અનેક લોકો ઘાયલ થયા છે.
હોસ્પિટલોમાં કટોકટી જાહેર :&nbsp;
ઘટનાની જાણ થતા જ પોલીસ અને બચાવ દળની ટીમો ઘટનાસ્થળે પહોંચી ગઈ હતી. ઘાયલોને તાત્કાલિક પાકિસ્તાન ઇન્સ્ટિટ્યૂટ ઓફ મેડિકલ સાયન્સિસ અને અન્ય સરકારી હોસ્પિટલોમાં ખસેડવામાં આવ્યા છે. શહેરની મુખ્ય હોસ્પિટલોમાં કટોકટી જાહેર કરવામાં આવી છે. પ્રત્યક્ષદર્શીઓના જણાવ્યા અનુસાર, વિસ્ફોટ બાદ મસ્જિદમાં નાસભાગ મચી ગઈ હતી અને ચારેબાજુ લોહીના નિશાન જોવા મળ્યા હતા.
ઓપરેશન રદ્દ-ઉલ-ફિત્ના અને વિસ્ફોટનું જોડાણ :&nbsp;
નોંધનીય છે કે આ વિસ્ફોટ પાકિસ્તાની સેના દ્વારા બલુચિસ્તાનમાં ચલાવવામાં આવેલા ઓપરેશન રદ્દ-ઉલ-ફિત્ના-1 પૂર્ણ થયાના બીજા જ દિવસે થયો છે. સેનાએ દાવો કર્યો હતો કે આ ઓપરેશનમાં 200 થી વધુ બળવાખોરોને ઠાર કરવામાં આવ્યા છે. હવે નિષ્ણાતો એવી શંકા વ્યક્ત કરી રહ્યા છે કે ઇસ્લામાબાદમાં થયેલો આ હુમલો સેનાના ઓપરેશનનો બદલો હોઈ શકે છે.
કોણ છે આ હુમલા પાછળ ?
હજુ સુધી કોઈ પણ આતંકી સંગઠને આ હુમલાની જવાબદારી સ્વીકારી નથી. જોકે, પાકિસ્તાનમાં હાલની સુરક્ષા સ્થિતિ જોતા તહરીક-એ-તાલિબાન પાકિસ્તાન (TTP) અથવા બલુચ બળવાખોરો તરફ શંકાની સોય જઈ રહી છે. સતત થઈ રહેલા આ હુમલાઓએ પાકિસ્તાનના આર્મી ચીફ અસીમ મુનીરની કાર્યક્ષમતા પર મોટા સવાલો ઉભા કર્યા છે. સેનાની છબી જનતાની નજરમાં સતત ખરડાઈ રહી છે કારણ કે તેઓ સુરક્ષા જાળવવામાં નિષ્ફળ સાબિત થઈ રહ્યા છે.

ઇસ્લામાબાદ મસ્જિદ વિસ્ફોટ

શુક્રવારની નમાજ દરમિયાન થયેલા બ્લાસ્ટમાં 25ના મોત, આર્મી ચીફ અસીમ મુનીરની મુશ્કેલીઓ વધી

February 6, 2026 | 16:51 IST