કેરેબિયન સમુદ્રમાં 7.6 ની તીવ્રતાનો ભૂકંપ

યુએસ જીઓલોજિકલ સર્વે (યુએસજીએસ) અનુસાર, ભૂકંપ શનિવારે સાંજે (સ્થાનિક સમય) ૧૦ કિલોમીટર (૬.૨૧ માઇલ) ની ઊંડાઈએ આવ્યો હતો. ભૂકંપનું કેન્દ્રબિંદુ હોન્ડુરાસથી લગભગ ૧૩૦ માઇલ (૨૦૯ કિલોમીટર) ઉત્તરમાં, કેમેન ટાપુઓ નજીક હતું.

યુએસ સુનામી ચેતવણી પ્રણાલીએ શરૂઆતમાં કેરેબિયન સમુદ્ર અને ઉત્તરી હોન્ડુરાસ માટે સુનામી ચેતવણી જારી કરી હતી. યુ.એસ. એટલાન્ટિક અથવા ગલ્ફ કિનારા માટે સુનામીનો કોઈ ખતરો નોંધાયો નથી, પરંતુ પ્યુઅર્ટો રિકો અને વર્જિન ટાપુઓ માટે ચેતવણીઓ જારી કરવામાં આવી હતી.

પેસિફિક સુનામી ચેતવણી કેન્દ્રએ જણાવ્યું હતું કે ભૂકંપના કેન્દ્રથી 620 માઇલની અંદરના દરિયાકાંઠાના વિસ્તારોને ખતરનાક સુનામી મોજા અસર કરી શકે છે, જેમાં કેમેન ટાપુઓ, જમૈકા, ક્યુબા, મેક્સિકો, હોન્ડુરાસ, નિકારાગુઆ, બહામાસ, કોસ્ટા રિકા, બેલીઝ, હૈતી, પનામા અને ગ્વાટેમાલાનો સમાવેશ થાય છે.

યુએસ નેશનલ ઓશનિક એન્ડ એટમોસ્ફેરિક એડમિનિસ્ટ્રેશન (US National Oceanic and Atmospheric Administration) એ ક્યુબાના દરિયાકાંઠાના કેટલાક ભાગોમાં ભરતીના સ્તરથી 1 થી 3 મીટર ઉપર સુનામીના મોજા ઉછળવાનો અંદાજ લગાવ્યો હતો. જ્યારે હોન્ડુરાસ અને કેમેન ટાપુઓ માટે 0.3 થી 1 મીટરના નાના મોજાની આગાહી કરવામાં આવી છે.

શરૂઆતમાં એક ડઝનથી વધુ દેશોને સુનામીની ચેતવણી આપ્યા બાદ, યુએસ એજન્સીઓએ પાછળથી મોટાભાગની ચેતવણીઓ રદ કરી દીધી. જોકે, તેમણે કહ્યું કે દરિયાની સપાટીમાં નાના ફેરફારો થઈ શકે છે.

દરમિયાન, હોન્ડુરાસ, ક્યુબા, ડોમિનિકન રિપબ્લિક, પ્યુઅર્ટો રિકો અને કેમેન ટાપુઓ સહિત અનેક કેરેબિયન દેશોએ દરિયાકાંઠાના વિસ્તારોમાં રહેતા રહેવાસીઓ માટે સ્થળાંતરની ચેતવણી જારી કરી છે.