શ્રીલંકામાં ચક્રવાત દિતવાહનો કહેર, 56ના મોત

વિનાશક ચક્રવાત દિતવાહ શ્રીલંકામાં ભારે તબાહી મચાવી રહ્યું છે, અત્યાર સુધીમાં 56 લોકોનો ભોગ લઈ ચૂક્યું છે, જ્યારે 60 લોકો હજી પણ લાપતા છે. શ્રીલંકાના દરિયાકાંઠેથી ઉદભવેલું આ **ચક્રવાત** ધીમે ધીમે ભારત તરફ આગળ વધી રહ્યું છે. ભારતીય હવામાન વિભાગે તમિલનાડુ, પુડુચેરી, આંધ્ર પ્રદેશ, તેલંગાણા અને કેરળ માટે એલર્ટ જાહેર કર્યું છે. હાલમાં બચાવ અને રાહત ટીમો સતત કામગીરીમાં લાગેલી છે.

શ્રીલંકામાં દિતવાહનો કહેર

છેલ્લા 24 કલાકમાં ચક્રવાતને કારણે 300 મિલીમીટરથી વધુ વરસાદ નોંધાયો છે. હવામાન વિભાગના જણાવ્યા અનુસાર, આગામી 12 કલાકમાં તોફાન વધુ રૌદ્ર સ્વરૂપ ધારણ કરી શકે છે. જેના કારણે અનેક વિસ્તારોમાં ભૂસ્ખલનની ઘટનાઓ સામે આવી છે. શ્રીલંકાના પૂર્વીય અને મધ્ય ભાગો આ તોફાનથી સૌથી વધુ પ્રભાવિત થયા છે. ડિઝાસ્ટર મેનેજમેન્ટ સેન્ટરે જણાવ્યું છે કે, અત્યાર સુધીમાં 43,991 લોકોને શાળાઓ અને જાહેર આશ્રયસ્થાનોમાં સુરક્ષિત રીતે ખસેડવામાં આવ્યા છે. આ દરમિયાન શાળાઓ બંધ કરી દેવામાં આવી છે, ટ્રેન સેવાઓ સ્થગિત કરી દેવામાં આવી છે અને ભારે વરસાદના કારણે કોલંબો સ્ટોક એક્સચેન્જે સમય પહેલા ટ્રેડિંગ અટકાવી દીધું હતું

ફ્લાઇટ્સનું ડાયવર્ઝન

DMCના ઈમરજન્સી ઓપરેશન્સ ડિરેક્ટર બ્રિગેડિયર એસ. ધર્મવિક્રમાએ જણાવ્યું કે, અનેક અસરગ્રસ્ત વિસ્તારોમાં બચાવ કાર્ય ચાલુ છે, પરંતુ ભૂસ્ખલનના કારણે રસ્તાઓ બંધ થઈ જવાથી ઘણા ગામો સુધી પહોંચવું અત્યંત મુશ્કેલ બની રહ્યું છે. પોર્ટ્સ અને સિવિલ એવિએશન મંત્રી અનુરા કરુણાથિલકેએ કહ્યું કે, જો પરિસ્થિતિ વધુ બગડે છે, તો શ્રીલંકા તેના મુખ્ય એરપોર્ટ પરથી ફ્લાઇટ્સને ભારતના ત્રિવેન્દ્રમ અથવા કોચીન એરપોર્ટ તરફ વાળશે. સ્થાનિક મીડિયા અનુસાર, મસ્કટ, દુબઈ, નવી દિલ્હી અને બેંગકોક સહિત 6 ફ્લાઇટ્સને પહેલેથી જ કોલંબો એરપોર્ટ પરથી ડાયવર્ટ કરવામાં આવી છે.

ભારત માટે એલર્ટ જારી

બંગાળની ખાડીમાં બનેલું આ ખતરનાક તોફાન શ્રીલંકાથી આગળ વધીને હવે ભારતના દરિયાકાંઠાના વિસ્તારો તરફ વધી રહ્યું છે. હવામાન વિભાગે આ માટે પ્રી-ચક્રવાત એલર્ટ જારી કર્યું છે. આ ચક્રવાત ઉત્તર તમિલનાડુ, પુડુચેરી, દક્ષિણ આંધ્ર પ્રદેશ, તેલંગાણા અને કેરળના દરિયાકાંઠા નજીકથી પસાર થવાની સંભાવના છે. 30 નવેમ્બર સુધીમાં આ વિસ્તારોમાં હવામાન બગડવાની સંભાવના વ્યક્ત કરવામાં આવી છે. આ ઉપરાંત દરિયાકાંઠાના વિસ્તારોમાં માછીમારોને પણ સતર્ક રહેવાની સલાહ આપવામાં આવી છે.