બાંગ્લાદેશી હિન્દુઓની ભારત સરકાર પાસે મદદની ગુહાર

બાંગ્લાદેશમાં હાલમાં વ્યાપેલી અશાંતિ અને કટ્ટરપંથીઓના આતંકને કારણે લઘુમતી હિન્દુ સમુદાય અત્યંત ભયભીત અવસ્થામાં જીવી રહ્યો છે, અને આ સ્થિતિમાં તેઓએ પોતાની સુરક્ષા માટે ભારત સરકાર પાસે સરહદો ખોલવાની કરુણ ગુહાર લગાવી છે. તાજેતરમાં દીપુ ચંદ્ર દાસ અને અમૃત મંડળની થયેલી નિર્મમ હત્યાઓએ સમગ્ર દેશમાં ફફડાટ ફેલાવી દીધો છે, જેના કારણે લઘુમતી હિન્દુઓનું જીવવું દુષ્કર બની ગયું છે. રંગપુરના એક રહેવાસીએ પોતાની વેદના ઠાલવતા જણાવ્યું હતું કે, તેમને દરરોજ ધર્મના નામે જાહેરમાં અપમાનિત કરવામાં આવે છે અને રસ્તા પર ચાલતી વખતે જે રીતે ટોણાં મારવામાં આવે છે તે ગમે ત્યારે ભયાનક મોબ લિંચિંગમાં ફેરવાઈ શકે છે. 

શેખ હસીનાની અવામી લીગને જ પોતાના રક્ષક માનતા

આ પીડિતો પાસે જવા માટે કોઈ સુરક્ષિત આશરો નથી અને તેઓ સતત એવા ડરમાં જીવે છે કે, ક્યાંક તેમની હાલત પણ દીપુ કે અમૃત જેવી ન થઈ જાય. આ ભયાનક વાતાવરણને કારણે તેઓ માનવીય અભિગમ સાથે ભારત સરકારને સરહદ પર સુરક્ષિત રસ્તો આપવા માટે વિનંતી કરી રહ્યા છે. બાંગ્લાદેશની રાજકીય અસ્થિરતાએ આ ડરમાં વધુ વધારો કર્યો છે, ખાસ કરીને પૂર્વ રાષ્ટ્રપતિ ખાલિદા ઝિયાના પુત્ર તારિક રહેમાનની વાપસીથી લઘુમતીઓમાં ભારે ચિંતા જોવા મળી રહી છે. હિન્દુ સમુદાયને એવો ભય છે કે, જો BNP સત્તામાં આવશે તો તેમનું ઉત્પીડન અને દમન અનેકગણું વધી જશે, કારણ કે તેઓ શેખ હસીનાની અવામી લીગને જ પોતાના એકમાત્ર રક્ષક માનતા હતા.

હિન્દુઓ માટે જીવન એક અત્યંત ખરાબ સ્વપ્ન સ્વરુપ

સનાતન જાગરણ મંચના કાર્યકરોનું કહેવું છે કે, બાંગ્લાદેશમાં અંદાજે 25 લાખ હિન્દુઓની વસ્તી છે અને વર્તમાન પરિસ્થિતિ ઝડપથી નરસંહાર તરફ આગળ વધી રહી છે. ઢાકા અને મયમનસિંઘ જેવા શહેરોના રહેવાસીઓનું સ્પષ્ટ માનવું છે કે, ભારત જો સરહદો ખોલે તો તેનો અર્થ એ નથી કે, બધા જ પલાયન કરી જશે, પરંતુ હિંસાનો ભોગ બનેલા અસહાય લોકો માટે જીવ બચાવવાનો એકમાત્ર માર્ગ ખુલી જશે. હાલમાં બાંગ્લાદેશી હિન્દુઓ માટે જીવન એક અત્યંત ખરાબ સ્વપ્ન જેવું બની ગયું છે, જ્યાં તેમની અવાજ સાંભળનાર કોઈ નથી.