Argentina માં ધરા ધ્રુજી, 7.5 ની તીવ્રતાના પ્રચંડ ભૂકંપથી હાહાકાર, ચિલી સુધી સુનામીનું એલર્ટ

દક્ષિણ અમેરિકાના દેશ આર્જેન્ટિના (Argentina)માં આજે શક્તિશાળી ભૂકંપના જોરદાર આંચકા અનુભવાયા, જેના કારણે ભારે ગભરાટ ફેલાયો હતો. રિક્ટર સ્કેલ પર આ ભૂકંપની તીવ્રતા 7.5 નોંધાઈ છે. ધરતી ધ્રુજતાની સાથે જ લોકો પોતાના ઘરોમાંથી જીવ બચાવવા માટે ખુલ્લા આકાશ નીચે દોડી આવ્યા હતા. આ ભયાનક ભૂકંપના પગલે પડોશી દેશ ચિલી સુધી સુનામીની ચેતવણી પણ જારી કરવામાં આવી છે. ભારતીય સમય અનુસાર, આ ભૂકંપ શુક્રવારે સાંજે સાડા છ વાગ્યે આવ્યો હતો.

યુનાઇટેડ સ્ટેટ્સ જિયોલોજિકલ સર્વેના જણાવ્યા અનુસાર, આર્જેન્ટિના (Argentina) ભૂકંપના જોરદાર આંચકાથી કંપી ઉઠ્યું હતું. ભૂકંપનું કેન્દ્રબિંદુ આર્જેન્ટિના (Argentina)ના દક્ષિણી રાજ્ય ઉશુઆઇયાથી 222 કિલોમીટર દૂર સમુદ્રમાં આવેલા ડ્રેક પેસેજમાં નોંધાયું છે. આ ભૂકંપની ઊંડાઈ 10 કિલોમીટર હતી. એટલું જ નહીં, ભૂકંપના આંચકા બાદ બે વધુ શંકાસ્પદ આફ્ટરશોક્સની પણ માહિતી મળી છે. ભૂકંપ એટલો પ્રચંડ હતો કે તેની તીવ્રતા 7.5 આંકવામાં આવી છે.

ડ્રેક પેસેજ એક ખતરનાક દરિયાઈ વિસ્તાર છે, જે દક્ષિણ અમેરિકાના કેપ હોર્ન, ચિલી, આર્જેન્ટિના (Argentina) અને એન્ટાર્કટિકાના સાઉથ શેટલેન્ડ ટાપુઓની વચ્ચે આવેલો છે. ભૂકંપના આંચકા અનુભવાયા બાદ તાત્કાલિક ચિલી સુધી સુનામીની ચેતવણી જારી કરવામાં આવી છે. સ્થાનિક વહીવટી તંત્રએ લોકોને દરિયાકાંઠાથી દૂર રહેવા અને સલામત ઊંચાઈવાળા સ્થળોએ ચાલ્યા જવા માટે તાકીદ કરી છે. આ ભયાનક ભૂકંપે સમગ્ર વિસ્તારમાં ભારે ખળભળાટ મચાવી દીધો છે.