Pope Francis : ગુપ્ત મતદાન અને સફેદ ધુમાડો, કેવી રીતે ચૂંટાશે કેથોલિકોના નવા પોપ?

કેથોલિક સમુદાયના 1.4 અબજ લોકોના ધર્મગુરુ પોપ ફ્રાન્સિસનું આજે નિધન થયું છે. તેમણે વેટિકન સિટીમાં 88 વર્ષની વયે અંતિમ શ્વાસ લીધા. પોપ ફ્રાન્સિસના નિધનના સમાચાર ફેલાતાની સાથે જ તેમના ઉત્તરાધિકારીને લઈને ચર્ચા શરૂ થઈ ગઈ છે. જણાવી દઈએ કે, નવા પોપની પસંદગી કાર્ડિનલ્સ કરશે.

267 મા પોપની પસંદગી માટે મે મહિનામાં કાર્ડિનલ્સની એક બેઠક યોજાશે, જેમાં વોટિંગ દ્વારા નવા પોપની પસંદગી કરવામાં આવશે. કાર્ડિનલ રોમન કેથોલિક ચર્ચના એક ઉચ્ચ અધિકારી છે, જે પોપ પછી બીજા સ્થાને હોય છે. રોમના પાદરી વર્ગના સભ્ય તરીકે તેઓ પોપના સલાહકાર તરીકે કાર્ય કરે છે.

જણાવી દઈએ કે, પોપની પસંદગી એક ગુપ્ત પ્રક્રિયા હોય છે, જેમાં 80 વર્ષથી ઓછી વયના કાર્ડિનલ ભાગ લે છે. જે ઉમેદવારને બે તૃતીયાંશ બહુમતી મળી જાય છે, તેને પોપ ચૂંટી લેવામાં આવે છે. પોપ ચૂંટાયા બાદ સફેદ ધુમાડો છોડીને પોપની પસંદગીની જાહેરાત કરવામાં આવે છે. નવા પોપની પસંદગીની માહિતી વિશ્વભરના લોકોને ‘હેબેમસ પાપમ’ (અમારી પાસે એક પોપ છે) કહીને આપવામાં આવે છે.

ચાલો જાણીએ કે 267 મા પોપ બનવા માટે કયા કયા કાર્ડિનલ પ્રબળ દાવેદાર છે…

કાર્ડિનલ પીએત્રો પેરોલિન, ઇટાલી

કાર્ડિનલ લુઇસ એન્ટોનિયો ટેગલે, ફિલિપાઇન્સ

કાર્ડિનલ પીટર ટર્કસન, ઘાના

કાર્ડિનલ પીટર એર્ડો, હંગેરી

કાર્ડિનલ માયકોલા બાયચોક, યુક્રેન

કાર્ડિનલ પિયરબતિસ્તા પિઝાબલ્લા, ઇઝરાયલ

કાર્ડિનલ મારિયો ગ્રેચ, માલ્ટા

કાર્ડિનલ સર્જિયો દા રોચા, બ્રાઝિલ

કાર્ડિનલ કાર્લોસ અગુઇર રેતેસ, મેક્સિકો

કાર્ડિનલ લાઝરસ યુ હ્યુંગ-સિક, દક્ષિણ કોરિયા

કાર્ડિનલ ફ્રિડોલિન અમ્બોંગો બેસુંગો, કોંગો લોકશાહી પ્રજાસત્તાક

કાર્ડિનલ માઇકલ ચર્ની, કેનેડા

કાર્ડિનલ જોસેફ ટોબિન, અમેરિકા

વિશ્વભરમાં 252 કાર્ડિનલ્સ...

કોલેજ ઓફ કાર્ડિનલ્સ રિપોર્ટ અનુસાર, વિશ્વભરમાં 252 કાર્ડિનલ્સ છે. આમાંથી 137 કાર્ડિનલ હાલમાં 80 વર્ષથી ઓછી વયના છે અને તેથી તેઓ 267 મા પોપની પસંદગી પ્રક્રિયામાં ભાગ લેવા માટે પાત્ર છે. પોપના મૃત્યુ અથવા રાજીનામા પછી કાર્ડિનલ્સને વેટિકનના સિસ્ટિન ચેપલમાં બોલાવવામાં આવે છે, જ્યાં તેઓ ગુપ્તતાના શપથ લે છે અને બાહ્ય વિશ્વથી અલગ થઈ જાય છે. આ દરમિયાન તેઓ સંભવિત ઉમેદવારોની યોગ્યતા પર ચર્ચા કરે છે. પછી વોટ નાખીને 2 તૃતીયાંશ બહુમતીના આધારે નવા પોપની પસંદગી કરે છે.

પોપ બનનારા પ્રથમ બિન-યુરોપિયન

પોપ ફ્રાન્સિસ આર્જેન્ટિનાના એક જેસુઈટ પાદરી હતા, તેઓ 2013 માં રોમન કેથોલિક ચર્ચના 266 મા પોપ બન્યા હતા. તેઓને પોપ બેનેડિક્ટ સોળમાના ઉત્તરાધિકારી તરીકે પસંદ કરવામાં આવ્યા હતા. પોપ ફ્રાન્સિસ છેલ્લા 1000 વર્ષમાં પ્રથમ એવા વ્યક્તિ હતા જે બિન-યુરોપિયન હોવા છતાં કેથોલિક ધર્મના સર્વોચ્ચ પદ પર પહોંચ્યા.

નાઈટ ક્લબમાં બાઉન્સર તરીકે કામ કર્યું હતું...

પોપ ફ્રાન્સિસે તેમની યુવાવસ્થામાં એક નાઈટ ક્લબમાં બાઉન્સર તરીકે કામ કર્યું હતું. તેમણે પાદરી બનતા પહેલા બ્યુનોસ એરેસમાં એક નાઈટ ક્લબમાં બાઉન્સર તરીકે કામ કર્યું હતું જેથી તેઓ પોતાનું ગુજરાન ચલાવી શકે.