બાંગ્લાદેશમાં 12 દિવસમાં 3 હિન્દુની કરાઈ હત્યા

સોમવાર 29 ડિસેમ્બરના રોજ સાંજે મયમનસિંહના ભાલુકા વિસ્તારમાં આવેલી 'સુલ્તાના સ્વેટર્સ લિમિટેડ' ફેક્ટરીમાં લોહીલુહાણ ખેલ ખેલાયો હતો. અહીં અંસાર બેરેકમાં તૈનાત ૪૨ વર્ષીય બજેન્દ્ર બિસ્વાસ પર તેમના જ સાથીદાર નોમાન મિયાએ સરકારી શૉટગનથી ગોળીબાર કર્યો હતો. ગોળી બજેન્દ્રની જાંઘના ભાગે વાગતા અતિશય રક્તસ્ત્રાવ થયો હતો અને હોસ્પિટલ પહોંચતા પહેલા જ તેમણે દમ તોડ્યો હતો. ચોંકાવનારી વાત એ છે કે હત્યા બાદ આરોપી નોમાન મિયાએ આ ઘૃણાસ્પદ કૃત્યને 'માત્ર એક મજાક' ગણાવીને છટકવાનો પ્રયાસ કર્યો હતો.

જૂના વિવાદ અને ભયનું વાતાવરણ: ભાલુકા વિસ્તારમાં લઘુમતીઓ પર હુમલાનો આ કોઈ પહેલો બનાવ નથી. માત્ર ૧૧ દિવસ પહેલા જ, ૧૮ ડિસેમ્બરે આ જ વિસ્તારમાં દીપુ ચંદ્ર દાસ નામના હિન્દુ યુવકને ટોળા દ્વારા નિર્વસ્ત્ર કરી, ઢોર માર મારીને જીવતા સળગાવી દેવાની કમકમાટીભરી ઘટના બની હતી. ટૂંકા ગાળામાં બનેલી આ બીજી મોટી ઘટનાએ સાબિત કર્યું છે કે બાંગ્લાદેશમાં હિન્દુઓ માટે સ્થિતિ અત્યંત સ્ફોટક બની રહી છે.

પરિવાર અને કાયદાકીય સ્થિતિ: મૃતક બજેન્દ્ર બિસ્વાસ સિલ્હટના કાદિરપુર ગામના વતની હતા અને તેમના પરિવારનો એકમાત્ર આર્થિક આધાર હતા. તેમના અવસાનથી પરિવાર પર આભ તૂટી પડ્યું છે. જોકે પોલીસે આરોપી નોમાનની ધરપકડ કરી છે, પરંતુ માનવાધિકાર સંગઠનો આને માત્ર અકસ્માત કે મજાક માનવા તૈયાર નથી. તેમનું કહેવું છે કે લઘુમતીઓને નિશાન બનાવવા માટે સોશિયલ મીડિયા અને અંગત અદાવતનો હથિયાર તરીકે ઉપયોગ કરવામાં આવી રહ્યો છે.

આંતરરાષ્ટ્રીય ચિંતા: છેલ્લા કેટલાક મહિનાઓમાં બાંગ્લાદેશમાં હિન્દુઓ વિરુદ્ધ હિંસા અને હત્યાના બનાવોમાં તીવ્ર ઉછાળો આવ્યો છે. કડક સજાના અભાવે ગુનેગારો બેફામ બન્યા છે. આ તાજી ઘટનાએ વિશ્વભરના હિન્દુ સંગઠનો અને માનવાધિકાર કાર્યકરોમાં ચિંતા જન્માવી છે, જેઓ હવે બાંગ્લાદેશ સરકાર પાસે લઘુમતીઓની સુરક્ષા માટે નક્કર ગેરંટી માંગી રહ્યા છે.