નાઈલ નદીમાં 21 લોકો ડૂબ્યા, અનેક લાપતા

ઉત્તર સુદાનમાં નાઈલ નદીમાં એક ભયાનક બોટ અકસ્માત સર્જાયો છે, જેમાં અત્યાર સુધીમાં ઓછામાં ઓછા 21 લોકોના ડૂબી જવાથી મોત થયા છે. આ કરુણ ઘટનાએ સુદાનના જર્જરિત ઈન્ફ્રાસ્ટ્રક્ચર અને નદી પરિવહનમાં સુરક્ષાના અભાવની પોલ ખોલી દીધી છે.

કેવી રીતે સર્જાઈ દુર્ઘટના?

મળતી માહિતી મુજબ, આ અકસ્માત તયબા અલ-ખવાદ અને દેઈમ અલ-કરાઈ ગામો વચ્ચે નદી ઓળંગતી વખતે થયો હતો. પ્રત્યક્ષદર્શીઓના જણાવ્યા અનુસાર, નાનકડી હોડીમાં આશરે 30 જેટલા મુસાફરો સવાર હતા. નદીની વચ્ચે પહોંચતા જ બોટનું સંતુલન બગડ્યું હતું અને તે પલટી ગઈ હતી.

સુદાનના ડોક્ટર્સ નેટવર્કના જણાવ્યા અનુસાર, આ અકસ્માતમાં અત્યાર સુધીમાં માત્ર 6 લોકોનો જ બચાવ થયો છે, જ્યારે 21 મૃતદેહો બહાર કાઢવામાં આવ્યા છે. હજુ પણ કેટલાક લોકો લાપતા હોવાથી સર્ચ ઓપરેશન ચાલુ છે.

તંત્રની બેદરકારી સામે રોષ

સુદાનના ડોક્ટર્સ સંગઠને આ દુર્ઘટના માટે સ્થાનિક સત્તાવાળાઓ અને સિવિલ ડિફેન્સ ટીમોની નિષ્ફળતાને જવાબદાર ઠેરવી છે. અકસ્માત સમયે બચાવ કામગીરી માટે કોઈ સરકારી ટીમ હાજર નહોતી, જેના કારણે મૃત્યુઆંક વધ્યો હોવાનો આક્ષેપ થઈ રહ્યો છે.

સુદાનમાં છેલ્લા ત્રણ વર્ષથી આર્મી અને પેરામિલિટરી ફોર્સ વચ્ચે ચાલી રહેલા આંતરિક યુદ્ધને કારણે રોડ-રસ્તાઓ બંધ છે, જેના લીધે લોકો જોખમી રીતે નદી માર્ગે મુસાફરી કરવા મજબૂર બન્યા છે.

સુદાનમાં મોટાભાગના લોકો સિંગલ એન્જિનવાળી નાની હોડીઓ પર નિર્ભર છે, જેમાં લાઈફ જેકેટ જેવી પાયાની સુરક્ષા સુવિધાઓનો પણ અભાવ જોવા મળે છે. સરકાર દ્વારા હજુ સુધી અકસ્માતનું સત્તાવાર કારણ જાહેર કરવામાં આવ્યું નથી, પરંતુ ક્ષમતા કરતા વધુ મુસાફરો હોવાને પ્રાથમિક કારણ માનવામાં આવે છે.