યુટ્યુબર બોનુ કોમલીનો આપઘાત: ડાયરીમાં ખુલી વેદના

તેલંગાણાની રાજધાની હૈદરાબાદમાંથી એક હૃદયદ્રાવક સમાચાર સામે આવ્યા છે. જાણીતી પાર્ટ-ટાઈમ યુટ્યુબર અને વિજ્ઞાનની તેજસ્વી વિદ્યાર્થિની બોનુ કોમલીએ પોતાના ભાડાના મકાનમાં આત્મહત્યા કરી લીધી છે. માત્ર 21 વર્ષની વયે જીવન ટૂંકાવનાર કોમલીના મૃત્યુ પાછળ પ્રેમમાં મળેલી નિષ્ફળતા અને માનસિક એકલતા હોવાનું પ્રાથમિક તપાસમાં બહાર આવ્યું છે.

ડાયરીના પાનામાં છુપાયેલું હતું દર્દ : 

ઘટનાસ્થળેથી મળી આવેલી કોમલીની ડાયરીમાં તેના મનનો ઉદ્વેગ સ્પષ્ટપણે જોવા મળ્યો હતો. તેણે પોતાની નોંધમાં લખ્યું હતું કે તે ત્રણ વર્ષ જૂના સંબંધોમાંથી બહાર આવવા મથામણ કરી રહી હતી. તે હજુ પણ એ વ્યક્તિની પ્રતીક્ષા કરી રહી હતી જે હવે તેની સાથે રહેવા માંગતો નહોતો. તેને સતત એવો ડર સતાવતો હતો કે જો તે જીવનમાં આગળ વધી જશે અને પેલી વ્યક્તિ તેને શોધતી પાછી આવશે તો શું થશે. આ ભાવનાત્મક દ્વંદ્વ તેને અંદરથી કોરી ખાતો હતો.

અભ્યાસ અને સોશિયલ મીડિયા કારકિર્દી : 

મૂળ આંધ્રપ્રદેશના વિશાખાપટ્ટનમની રહેવાસી કોમલી હૈદરાબાદની એક ખાનગી કોલેજમાં બીએસસીનો અભ્યાસ કરતી હતી. છેલ્લા 11 મહિનાથી તે શહેરમાં એક એપાર્ટમેન્ટમાં એકલી રહેતી હતી. અભ્યાસની સાથે તે યુટ્યુબ પર ડેઈલી વ્લોગ્સ અને લાઈફસ્ટાઈલ વીડિયો બનાવીને લોકપ્રિય થઈ હતી. તેની તાજેતરની તિરુમાલા પદયાત્રાનો વીડિયો સોશિયલ મીડિયા પર ખૂબ વાયરલ થયો હતો, જે કમનસીબે તેની છેલ્લી પોસ્ટ બની રહી.

અંતિમ સંદેશ અને ઘટનાનો ક્રમ : 

સોમવારે વહેલી સવારે કોમલીએ કુવૈતમાં કામ કરતી તેની માતાને એક સંદેશ મોકલ્યો હતો. જેમાં તેણે માતા પ્રત્યેનો પ્રેમ વ્યક્ત કર્યો હતો અને નાના ભાઈની કાળજી રાખવા વિનંતી કરી હતી. જ્યારે માતાએ વળતો ફોન કર્યો અને કોમલીએ ઉપાડ્યો નહીં, ત્યારે ચિંતિત માતાએ હૈદરાબાદમાં રહેતા એક મિત્રને તપાસ કરવા મોકલ્યો. પોલીસની હાજરીમાં રૂમનો દરવાજો તોડવામાં આવતા કોમલીનો મૃતદેહ લટકતી હાલતમાં મળી આવ્યો હતો.

પોલીસ તપાસ અને અગાઉના પ્રયાસો : 

પોલીસના જણાવ્યા અનુસાર, કોમલી 27 વર્ષીય સોફ્ટવેર એન્જિનિયર અને સાથી યુટ્યુબર સાથે સંબંધમાં હતી, પરંતુ થોડા સમય પહેલા જ તેમનું બ્રેકઅપ થયું હતું. અહેવાલો મુજબ, આ માનસિક આઘાતને કારણે તેણે છ મહિના પહેલા પણ જીવન ટૂંકાવવાનો પ્રયાસ કર્યો હતો. હાલ પોલીસે શંકાસ્પદ મૃત્યુનો ગુનો નોંધીને કોમલીના મોબાઈલ રેકોર્ડ્સ અને ડિજિટલ પુરાવાની તપાસ શરૂ કરી છે. મૃતદેહને પોસ્ટમોર્ટમ માટે ઓસ્માનિયા જનરલ હોસ્પિટલમાં મોકલી આપવામાં આવ્યો છે.