કેદારનાથ-બદ્રીનાથમાં ભક્તોના પૈસે VIP મહેમાનગતિ

શ્રી બદ્રીનાથ-કેદારનાથ મંદિર સમિતિ (BKTC) માં કથિત નાણાકીય ગેરરીતિઓ અંગે મોટો ખુલાસો થયો છે. મંદિર સમિતિએ યાત્રા દરમિયાન ભાજપ, RSS નેતાઓ અને અન્ય મહેમાનો માટે રહેઠાણ, ભોજન અને હેલિકોપ્ટર ટિકિટ પર લાખો રૂપિયા ખર્ચ કર્યાનો ઘટસ્ફોટ થયો. સામાજીક કાર્યકરે માહિતી અધિકાર (RTI) હેઠળ મેળવેલા દસ્તાવેજોના આધારે સમગ્ર ભ્રષ્ટાચારનો પર્દાફાશ થયો છે.

સામાજીક કાર્યકર વિકાસ નેગીએ આરોપ લગાવ્યો કે, ભક્તો તરફથી મળેલા દાન અને પ્રસાદનો ઉપયોગ રાજકીય આતિથ્ય માટે કરવામાં આવ્યો હતો. ઘણા વ્યક્તિઓને અનધિકૃત મહેમાનો તરીકે નોંધીને તેમના રહેઠાણ અને ભોજનની વ્યવસ્થા મંદિર સમિતિના ખર્ચે કરવામાં આવી હતી.

RTI માં આપેલી માહિતી અનુસાર, 30 એપ્રિલથી 1 મે, 2025 દરમિયાન કેબિનેટ મંત્રી ગણેશ જોશીની પુત્રી નેહા જોશીના કેદારનાથ રોકાણ પર આશરે ₹60,000 ખર્ચ કરવામાં આવ્યો હતો. કેદારનાથના ધારાસભ્ય આશા નૌટિયાલના રોકાણ પાછળ ₹37,500 અને વડાપ્રધાન નરેન્દ્ર મોદીના ભાઈ પંકજ મોદીના રોકાણ પર ₹22,000 ખર્ચ કરવામાં આવ્યા હતા.

આ ઉપરાંત RSS નેતાઓ પ્રકાશ અને નિરંજનનાં રોકાણ પર ₹20,000, રુદ્રપ્રયાગ જિલ્લા ભાજપ પ્રમુખ ભારત ભૂષણ ભટ્ટ અને અન્ય કાર્યકરોના રોકાણ પર ₹24,000 અને BKTC પ્રમુખ હેમંત દ્વિવેદીના અંગત સહાયક અજય શ્રીવાસ્તવના રોકાણ પર ₹23,000 ખર્ચ કરવામાં આવ્યા હતા.

વિકાસ નેગીએ આરોપ લગાવ્યો છે કે મંદિર સમિતિએ BKTC પ્રમુખ અને મુખ્ય કાર્યકારી અધિકારી, પર્યટન મંત્રી સતપાલ મહારાજના નામે ઘણા વ્યક્તિઓના રહેવા અને ભોજનનો ખર્ચ ઉઠાવ્યો હતો. તેમણે કહ્યું કે, RTI દ્વારા મેળવેલી હેલિકોપ્ટર ટિકિટ ચુકવણીની વિગતો પણ ચોંકાવનારી છે.

તેમણે આક્ષેપ કરતાં કહ્યું કે BKTC પ્રમુખ અને ઉપપ્રમુખના મહેમાનો માટે હેલિકોપ્ટર ટિકિટ મંદિર ભંડોળમાંથી ચૂકવવામાં આવી હતી. રાજ્ય સરકાર દ્વારા ઉચ્ચ સ્તરીય તપાસ અને દોષિતો સામે કાર્યવાહી કરવાની એડવોકેટ નેગીએ માંગ કરી છે. તેમણે કહ્યું કે બદ્રીનાથ અને કેદારનાથ મંદિર લાખો સનાતનીઓ માટે શ્રદ્ધા અને ભક્તિના કેન્દ્રો છે. આ મંદિરોમાં ભ્રષ્ટાચાર સહન કરવામાં આવશે નહીં.

વિકાસ નેગીએ અગાઉ RTI દ્વારા BKTC માં કથિત અનિયમિતતાના અનેક કિસ્સાઓનો પર્દાફાશ કર્યો છે. તાજેતરમાં તેમણે BKTC ના ઉપપ્રમુખ વિજયસિંહ કપરાવન પર તેમની પત્નીને વર્ગ-4 કર્મચારી તરીકે બતાવીને ચૂકવણી મેળવવાનો અને રુદ્રપ્રયાગમાં ખાનગી નિવાસસ્થાનને ઓફિસ તરીકે બતાવીને માસિક ભાડું વસૂલવાનો આરોપ મૂક્યો હતો. તેમણે મંદિર ભંડોળમાંથી ₹11 લાખ યાત્રાળુ પુજારીઓને વહેંચવાનો પણ પર્દાફાશ કર્યો હતો.