UPSC સિવિલ સર્વિસ પરીક્ષા 2026: નવા નિયમો જાહેર

યુનિયન પબ્લિક સર્વિસ કમિશન (UPSC) એ સિવિલ સર્વિસીસ પરીક્ષા (CSE) 2026 માટે સત્તાવાર નોટિફિકેશન બહાર પાડ્યું છે. આ વખતે કમિશને પરીક્ષાની લાયકાત અને ઉમેદવારીના નિયમોમાં ક્રાંતિકારી ફેરફારો કર્યા છે. નવા નિયમો મુજબ, જે ઉમેદવારો પહેલેથી જ ભારતીય વહીવટી સેવા (IAS) અથવા ભારતીય વિદેશ સેવા (IFS) માં કાર્યરત છે, તેઓ CSE 2026 ની પરીક્ષામાં બેસવા માટે પાત્ર રહેશે નહીં. વહીવટી સ્થિરતા જાળવવા અને પદોના બ્લોકેજને રોકવા માટે આ મહત્વનો નિર્ણય લેવામાં આવ્યો છે.

સેવા આપતા અધિકારીઓ પર કડક નિયંત્રણો : 

UPSC એ સ્પષ્ટ કર્યું છે કે જો કોઈ ઉમેદવાર પ્રારંભિક પરીક્ષા પાસ કર્યા પછી પણ મુખ્ય પરીક્ષા પહેલા IAS અથવા IFS માં નિયુક્ત થઈ જાય, તો તેમને મુખ્ય પરીક્ષામાં બેસવા દેવામાં આવશે નહીં. તેવી જ રીતે, મુખ્ય પરીક્ષા આપી દીધા બાદ પણ જો પરિણામ પહેલા સેવા ફાળવણી થઈ જાય, તો નવી પરીક્ષાના આધારે તેમને સેવાનો લાભ મળશે નહીં. આ ઉપરાંત, IPS અધિકારીઓ માટે પણ જોગવાઈ છે કે તેમને ફરીથી એ જ સેવામાં કેડર બદલવા માટે પસંદગી કરવાની તક મળશે નહીં.

તાલીમ અને રાજીનામા અંગેની નવી જોગવાઈઓ : 

જે ઉમેદવારો CSE 2026 દ્વારા IPS અથવા ગ્રુપ A સેવામાં પસંદ થાય છે અને 2027 માં ફરીથી પરીક્ષા આપવા માંગે છે, તેમણે ફરજિયાતપણે તેમના વિભાગમાંથી તાલીમ મુક્તિ મેળવવી પડશે. જો કોઈ અધિકારી પરવાનગી વિના તાલીમ છોડશે, તો તેમની સેવા ફાળવણી તત્કાલ રદ કરવામાં આવશે. જોકે, જૂના ઉમેદવારો માટે 'વન-ટાઇમ ઓપોર્ચ્યુનિટી' હેઠળ થોડી રાહત અપાઈ છે, પરંતુ 2028 થી તમામ સેવા આપતા અધિકારીઓએ પરીક્ષા આપતા પહેલા રાજીનામું આપવું પડી શકે છે.

933 જગ્યાઓ માટે 24 ફેબ્રુઆરી સુધી અરજીની તક : 

UPSC એ આ વર્ષે કુલ 933 જગ્યાઓ માટે ભરતી બહાર પાડી છે. રસ ધરાવતા અને પાત્રતા ધરાવતા ઉમેદવારો 24 ફેબ્રુઆરી, 2026 સુધીમાં સત્તાવાર વેબસાઇટ પર જઈને ઓનલાઇન અરજી કરી શકે છે. આ નવા ફેરફારોથી પસંદગી પ્રક્રિયા વધુ પારદર્શક બનશે અને નવા ઉમેદવારોને વધુ તકો મળશે તેવી અપેક્ષા રાખવામાં આવી રહી છે.