ટર્કિશ એરલાઇન્સનું કોલકાતામાં ઇમરજન્સી લેન્ડિંગ

નેપાળના કાઠમંડુથી તુર્કીના ઇસ્તંબુલ જઈ રહેલા ટર્કિશ એરલાઇન્સના એક વિશાળ વિમાનમાં હવામાં જ ટેકનિકલ ખામી સર્જાતા મોટી દુર્ઘટના સર્જાતા રહી ગઈ હતી. બુધવારે બપોરે સર્જાયેલી આ કટોકટી બાદ પાઇલટ્સની સમયસૂચકતા અને સાવચેતીને કારણે વિમાનને ભારત તરફ વાળી કોલકાતા એરપોર્ટ પર સુરક્ષિત રીતે ઉતારવામાં આવ્યું હતું.

ઉડાન ભર્યાની ગણતરીની મિનિટોમાં એન્જિન ઠપ થયું : 

ટર્કિશ એરલાઇન્સની ફ્લાઇટ THY-727 એ બપોરે ૧:૨૯ વાગ્યે કાઠમંડુના ત્રિભુવન આંતરરાષ્ટ્રીય એરપોર્ટ પરથી ઉડાન ભરી હતી. વિમાન હજુ આકાશમાં ઊંચાઈ પ્રાપ્ત કરી રહ્યું હતું ત્યારે જ તેના બે એન્જિનમાંથી એક એન્જિનમાં ગંભીર ખામી સર્જાઈ હતી. એન્જિન બંધ થઈ જતાં પાઇલટ્સે તાત્કાલિક કાઠમંડુ એર ટ્રાફિક કંટ્રોલનો સંપર્ક સાધ્યો હતો અને કટોકટીની જાણ કરી હતી.

સલામતી માટે કોલકાતા એરપોર્ટની પસંદગી : 

આંતરરાષ્ટ્રીય સુરક્ષા પ્રોટોકોલ મુજબ એક એન્જિન સાથે લાંબી મુસાફરી કરવી જોખમી હોવાથી પાઇલટ્સે પ્લેનને નજીકના સુરક્ષિત એરપોર્ટ પર ઉતારવાનો નિર્ણય લીધો હતો. કાઠમંડુ પરત ફરવાને બદલે પાઇલટ્સે કોલકાતાના નેતાજી સુભાષ ચંદ્ર બોઝ આંતરરાષ્ટ્રીય એરપોર્ટ પર લેન્ડિંગ માટે પરવાનગી માંગી હતી. કોલકાતા એરપોર્ટ પર એમ્બ્યુલન્સ અને ફાયર બ્રિગેડ સહિતની તમામ ઇમરજન્સી સેવાઓ તૈનાત કરી દેવામાં આવી હતી.

તમામ મુસાફરો અને ક્રૂ મેમ્બર્સ સુરક્ષિત : 

બપોરે ૩:૦૩ વાગ્યે વિમાન રનવે પર સુરક્ષિત રીતે લેન્ડ થયું ત્યારે એરપોર્ટ સત્તાધીશો અને મુસાફરોએ રાહતનો શ્વાસ લીધો હતો. વિમાનમાં સવાર ૨૩૬ મુસાફરો અને ૧૧ ક્રૂ મેમ્બર્સ સહિત કુલ ૨૪૭ લોકો સંપૂર્ણપણે સુરક્ષિત છે. હાલમાં એન્જિનિયરો દ્વારા વિમાનનું ટેકનિકલ નિરીક્ષણ કરવામાં આવી રહ્યું છે અને મુસાફરોને તુર્કી પહોંચાડવા માટે એરલાઇન્સ દ્વારા અન્ય વૈકલ્પિક વ્યવસ્થા હાથ ધરવામાં આવી છે.