પશ્ચિમ બંગાળમાં બબાલ

Abhishek Banerjee Attacked with Eggs in Sonarpur: પશ્ચિમ બંગાળના રાજકારણમાં એકસાથે બે મોટા ઘટનાક્રમોને પગલે ભારે સંગ્રામ છેડાયો છે. એકતરફ તૃણમૂલ કોંગ્રેસ (TMC) ના રાષ્ટ્રીય મહાસચિવ અને ડાયમંડ હાર્બરના સાંસદ અભિષેક બેનરજી પર દક્ષિણ 24 પરગણાના સોનારપુરમાં સ્થાનિક જનતા અને વિરોધીઓ દ્વારા કાચા ઇંડા ફેંકી હુમલો કરવામાં આવ્યો છે. બીજી તરફ, પશ્ચિમ બંગાળ સીઆઈડી (CID) ની પાંચ સભ્યોની ટીમે હાઈપ્રોફાઈલ 'ધારાસભ્ય સહી કૌભાંડ' (MLA Signature Case) માં અભિષેક બેનરજીના કાલીઘાટ સ્થિત નિવાસસ્થાને પહોંચી 1 જૂનના રોજ પૂછપરછ માટે હાજર થવા સમન્સ બજાવ્યું છે. આ હુમલા અને કાનૂની સકંજાને લીધે ટીએમસી અને ભાજપ સામસામે આવી ગયા છે.

સોનારપુરમાં વિરોધ પ્રદર્શન બાઇક રોકીને ફેંકાયા ઇંડા, "ચોર" ના નારા લાગ્યા
સમગ્ર હિંસક ઘટના સોનારપુરના કમરાબાદ વિસ્તારમાં શનિવારે સાંજે બની હતી. લોકસભા ચૂંટણી પછીની હિંસાના પીડિત અને ટીએમસીના એક મૃતક કાર્યકરના પરિવારને મળવા માટે સાંસદ અભિષેક બેનરજી સાંજે 4.30 વાગ્યાની આસપાસ કમરાબાદ પહોંચ્યા હતા. જો કે, ત્યાં ભાજપના કાર્યકરો અને સ્થાનિક ગ્રામજનોનો મોટો સમૂહ પહેલેથી જ વિરોધ પ્રદર્શન માટે હાજર હતો, જેમાં મહિલાઓ સૌથી આગળ હતી અને તેમના હાથમાં કાચા ઇંડા હતા.

 

#WATCH | Sonarpur, West Bengal: TMC MP Abhishek Banerjee was beaten up by locals during his visit to Sonarpur to meet the post-poll victims' families pic.twitter.com/zkXxLJydqe

— ANI (@ANI) May 30, 2026

 

બાઇક રોકીને ફેંકાયા ઇંડા, "ચોર" ના નારા લાગ્યા
ભારે વિરોધ અને ટ્રાફિક વ્યવસ્થાને જોતાં અભિષેક બેનરજી પોતાની સુરક્ષિત કાર છોડીને કાર્યકરના ઘર તરફ જવા બાઇક પર સવાર થયા હતા. પરંતુ પીડિત પરિવારના ઘરથી થોડાક સો મીટર દૂર જ ગુસ્સે ભરાયેલા પ્રદર્શનકારીઓએ તેમનો રસ્તો રોકી દીધો હતો. ટીએમસી નેતાને જોતાં જ ભીડે "ચોર, ચોર!" ના નારા લગાવવાનું શરૂ કર્યું હતું અને તેમના પર કાચા ઇંડા ફેંક્યા હતા. અરાજકતા એટલી વધી ગઈ કે ઉશ્કેરાયેલા ટોળાએ રસ્તા પર બે મોટરસાયકલ ફેંકી દીધી હતી. પરિસ્થિતિ વણસતી જોઈને સાંસદના સુરક્ષા કર્મચારીઓએ ત્વરિત એક્શન લીધા હતા અને અભિષેક બેનરજીને તાત્કાલિક હેલ્મેટ પહેરાવી સુરક્ષા કોર્ડન હેઠળ અત્યંત સુરક્ષિત સ્થળે ખસેડ્યા હતા.

15 વર્ષથી વિકાસ નથી થયો: ભ્રષ્ટાચાર અને ખરાબ રસ્તાથી જનતા આક્રોશમાં
આ હુમલા પાછળ સંગઠનાત્મક વિરોધ ઉપરાંત સ્થાનિક વહીવટીતંત્ર સામેનો જનઆક્રોશ જવાબદાર હોવાનું સામે આવ્યું છે. સ્થાનિક લોકોએ મીડિયા સમક્ષ પોતાનો રોષ ઠાલવતા કહ્યું, "અમે સામાન્ય મજૂર વર્ગના માણસો છીએ, અમારે કોઈ રાજકીય પક્ષ સાથે લેવાદેવા નથી. છેલ્લા પંદર વર્ષથી આ વિસ્તારમાં 1 કિલોમીટર સુધીનો મુખ્ય રસ્તો બિસ્માર હાલતમાં છે. ચોમાસામાં અહીં ઘૂંટણસમા પાણી ભરાઈ જાય છે. આ વિસ્તારના વિકાસ માટે જેટલા પણ સરકારી નાણાં આવ્યા, તે બધા ભ્રષ્ટાચારીઓ છીનવી ગયા." રહેવાસીઓએ વધુમાં આક્ષેપ કર્યો કે જ્યારે મમતા બેનરજી મુખ્યમંત્રી હતા, ત્યારે પણ રસ્તા અને પાણીની સુવિધા માટે અસંખ્ય રજૂઆતો કરાઈ હતી પરંતુ ટીએમસી શાસનમાં કોઈએ તેમની વાત સાંભળી નથી. પંદર વર્ષ સત્તામાં હોવા છતાં વિકાસ ન થતાં જ્યારે સાંસદ વિસ્તારમાં આવ્યા ત્યારે લોકોનો ગુસ્સો ફાટી નીકળ્યો હતો.

શું છે આ 'બંગાળ ધારાસભ્ય સહી કૌભાંડ'?
કાનૂની મોરચે પણ અભિષેક બેનરજીની મુશ્કેલીઓ વધી છે. પશ્ચિમ બંગાળ સીઆઈડી (CID) હાલમાં વિધાનસભા સચિવાલયમાં જમા કરાયેલા એક વિવાદિત પત્રની તપાસ કરી રહી છે. આ પત્ર વરિષ્ઠ ટીએમસી નેતા શોભનદેવ ચટ્ટોપાધ્યાયને કેબિનેટ મંત્રીનો દરજ્જો ધરાવતા 'વિરોધ પક્ષના નેતા' પદ પર નિયુક્ત કરવાના સમર્થનમાં રજૂ કરાયો હતો. આ મામલે કોલકાતાના હેર સ્ટ્રીટ પોલીસ સ્ટેશનમાં સત્તાવાર ફરિયાદ નોંધાઈ છે કે, ચૌરંગી બેઠકના પાંચ વખતના વરિષ્ઠ મહિલા ધારાસભ્ય નયના બેનરજીએ ધારાસભ્ય પદના શપથ ગ્રહણ વખતે જે સહી કરી હતી, તે આ સમર્થન પત્ર પરની સહી સાથે બિલકુલ મેળ ખાતી નથી. એટલે કે વિપક્ષી પદ મેળવવા ધારાસભ્યોની નકલી સહીઓ કરવામાં આવી હોવાનો આરોપ છે. આ કેસની તપાસના ભાગરૂપે સીઆઈડીએ અત્યાર સુધીમાં નયના બેનરજી, કુણાલ ઘોષ, બોલપુરના ધારાસભ્ય ચંદ્રનાથ સિંહા અને કેનિંગ પૂર્વના ધારાસભ્ય બહરુલ ઇસ્લામની પૂછપરછ કરી છે. ગુરુવારે જ્યારે સીઆઈડીની ટીમ વીડિયોગ્રાફર સાથે નયના બેનરજીના નિવાસસ્થાને પહોંચી અને તેમના પાન કાર્ડના ફોટોગ્રાફ્સ લીધા, ત્યારે નયના બેનરજીએ ભારે નારાજગી વ્યક્ત કરતા આ બાબતને પોતાનું અપમાન ગણાવ્યું હતું.

સીઆઈડી હેડક્વાર્ટરમાં હાજર થવા સમન્સ 
શનિવારે બપોરે અંદાજે 2:50 વાગ્યે સીઆઈડીની પાંચ સભ્યોની ટીમ કોલકાતાના કાલીઘાટ ખાતે અભિષેક બેનરજીના સત્તાવાર નિવાસસ્થાન 'શાંતિનિકેતન' પહોંચી હતી અને દોઢ કલાકની પ્રક્રિયા બાદ તેમને નોટિસ સોંપી હતી. નોટિસ મુજબ, ટીએમસી સાંસદને 1 જૂનના રોજ બપોરે 12:00 વાગ્યે ભવાની ભવન સ્થિત સીઆઈડી મુખ્યાલયમાં પૂછપરછ માટે હાજર થવાનો આદેશ અપાયો છે.

એજન્સીઓની સંખ્યા પર સવાલ
નોટિસ સ્વીકાર્યા બાદ મીડિયા સાથે વાત કરતા અભિષેક બેનરજીએ જણાવ્યું, "સીઆઈડીના અધિકારીઓ પાસે મારા ઘરનું સાચું સરનામું ન હોવાથી તેઓ પહેલા અલગ જગ્યાએ ગયા હતા, પરંતુ નોટિસ મારે વ્યક્તિગત રીતે સ્વીકારવાની હોવાથી હું ઘરે જ તેમની પ્રતીક્ષા કરી રહ્યો હતો. હું મારા વકીલો સાથે પરામર્શ કરીને તપાસમાં સંપૂર્ણ સહકાર આપીશ." જો કે, તેમણે આ સમગ્ર કાનૂની પ્રક્રિયાને કેન્દ્રીય ગૃહમંત્રી અમિત શાહના ઈશારે કરાતી રાજકીય કિન્નાખોરી ગણાવી હતી.

"5 એજન્સીઓ પાછળ લગાવો, મારું ગળું કાપી નાખો તો પણ ઝૂકીશ નહીં" - અભિષેક બેનરજી
અભિષેક બેનરજીએ તપાસ એજન્સીઓના દુરુપયોગનો આક્ષેપ કરતા આકરા પ્રહારો કર્યા હતા. તેમણે કટાક્ષ કરતા કહ્યું, "પહેલાં મારી પાછળ માત્ર ઇડી (ED) અને સીબીઆઈ (CBI) જેવી કેન્દ્રીય એજન્સીઓ જ પડી હતી. હવે તેમાં બંગાળ પોલીસ, કોલકાતા પોલીસ અને કોલકાતા મ્યુનિસિપલ કોર્પોરેશન (KMC) નો પણ ઉમેરો કરી દેવાયો છે. પહેલાં બે-ત્રણ એજન્સીઓ હતી, હવે પાંચ-છ એજન્સીઓ સાથે મળીને તપાસ કરી રહી છે. વિરોધીઓ એવું વિચારે છે કે આટલી એજન્સીઓનો ડર બતાવીને તેઓ મને ઘૂંટણિયે પાડી દેશે અને શરણાગતિ સ્વીકારવા મજબૂર કરશે, પણ તેઓ ભૂલી જાય છે કે હું તે પ્રકારનો માણસ નથી." સાંસદે વધુમાં ખુલ્લો પડકાર ફેંકતા ઉમેર્યું, "તમે ભલે મારું ગળું કાપી નાખો, પરંતુ મને આત્મસમર્પણ કરાવવા માટે તમારે દસ વાર વિચારવો પડશે અને સાત જન્મ લેવા પડશે. હું દેશદ્રોહી નથી જે ડરીને ભાગી જાય."

ભાજપનો પલટવાર: "અભિષેક બેનરજી નર્કમાં જવા જોઈએ"
આ આખા વિવાદ વચ્ચે પશ્ચિમ બંગાળ ભાજપે પણ ટીએમસી પર તીખા પ્રહારો કર્યા છે. ભાજપના સાંસદ સૌમિત્ર ખાને પૂર્વ મુખ્યમંત્રી મમતા બેનરજીના ભત્રીજા અભિષેક બેનરજી પર સીધા પ્રહારો કરતા સાર્વજનિક નિવેદન આપ્યું છે કે, ભ્રષ્ટાચાર અને જનતાના શોષણના પાપ બદલ "અભિષેક બેનરજીએ નર્કમાં જવું જોઈએ." પશ્ચિમ બંગાળમાં કાયદો અને વ્યવસ્થાની કથળતી સ્થિતિ અને આ સહી કૌભાંડ વચ્ચે હવે સમગ્ર રાજ્યની નજર 1 જૂને સીઆઈડી મુખ્યાલય ભવાની ભવન ખાતે થનારી અભિષેક બેનરજીની હાઈપ્રોફાઈલ પૂછપરછ પર ટકેલી છે.