તિરુપતિ લાડુ વિવાદ: ઘીમાં ભેળસેળના ગંભીર આક્ષેપો

વિશ્વવિખ્યાત તિરુપતિ બાલાજી મંદિરના લાડુ પ્રસાદની શુદ્ધતા અંગે ફરી એકવાર મોટો વિવાદ ઊભો થયો છે. આંધ્ર પ્રદેશના મુખ્યમંત્રી એન. ચંદ્રબાબુ નાયડુએ પ્રસાદ બનાવવા માટે વપરાતા ઘીમાં અત્યંત હાનિકારક પદાર્થોની ભેળસેળ થઈ હોવાના ગંભીર આરોપો લગાવ્યા છે.

મુખ્યમંત્રીનો ચોંકાવનારો દાવો : 

કુર્નૂલમાં આયોજિત એક કાર્યક્રમ દરમિયાન મુખ્યમંત્રીએ આશંકા વ્યક્ત કરી હતી કે લાડુના ઘીમાં માત્ર હલકી ગુણવત્તાના પદાર્થો જ નહીં, પરંતુ સફાઈ માટે વપરાતા ટોઈલેટ ક્લીનર જેવા કેમિકલ્સનો પણ ઉપયોગ થયો હોઈ શકે છે. આ બાબતે તેમણે અગાઉની જગન મોહન રેડ્ડી સરકારની આકરી ટીકા કરી હતી. નાયડુના મતે શ્રીશૈલમ મંદિરમાં પણ આવી જ ગેરરીતિઓ થઈ હોવાની શક્યતા છે.

જગન રેડ્ડીનો વળતો પ્રહાર : 

વાય.એસ.આર. કોંગ્રેસના નેતા જગન મોહન રેડ્ડીએ આ તમામ આરોપોને પાયાવિહોણા અને રાજકીય રીતે પ્રેરિત ગણાવ્યા છે. તેમણે સ્પષ્ટ કર્યું હતું કે તપાસ એજન્સીઓના રિપોર્ટમાં ક્યાંય પ્રાણીજ ચરબી કે બીફ ટેલોનો ઉલ્લેખ નથી. તેમણે આક્ષેપ કર્યો હતો કે ચંદ્રબાબુ નાયડુ પોતાના રાજકીય ફાયદા માટે ભગવાન અને ધાર્મિક મુદ્દાઓનો ઉપયોગ કરી રહ્યા છે. આ મામલે તેઓ સુપ્રીમ કોર્ટ અને માનવ અધિકાર આયોગ સુધી જવાની તૈયારી કરી રહ્યા છે.

હાનિકારક કેમિકલ્સનો ઉપયોગ : 

તપાસ દરમિયાન એવી ચોંકાવનારી વિગતો બહાર આવી છે કે કેટલીક ડેરી કંપનીઓને લેક્ટિક એસિડ અને LABSA (એસિડ સ્લરી) જેવા ઔદ્યોગિક રસાયણો સપ્લાય કરવામાં આવ્યા હતા. LABSA એ ખાવાલાયક પદાર્થ નથી અને તેનો ઉપયોગ ઔદ્યોગિક સફાઈમાં થાય છે. જો આવા નોન-ફૂડ ગ્રેડ કેમિકલ્સનો ઉપયોગ ઘીમાં થયો હોય, તો તે ભક્તોના સ્વાસ્થ્ય માટે અત્યંત જોખમી સાબિત થઈ શકે છે.

ભક્તોમાં ચિંતા અને આક્રોશ : 

તિરુપતિ લાડુ સાથે લાખો ભક્તોની આસ્થા જોડાયેલી છે. પ્રસાદની પવિત્રતા સાથે ચેડાં થવાના અહેવાલોથી શ્રદ્ધાળુઓમાં ભારે રોષ જોવા મળી રહ્યો છે. હાલમાં એ વાતની તપાસ ચાલી રહી છે કે જે કંપનીઓને આ કેમિકલ્સ મળ્યા હતા, શું તે જ કંપનીઓના ઘીનો ઉપયોગ મંદિરના રસોડામાં થયો હતો કે કેમ.