એક કેદીને ખેંચ અને પછી હડકંપ! થેની જેલમાંથી 17 કેદીઓ કેવી રીતે ભાગ્યા?

Theni Sub Jail Prisoners Escape: તમિલનાડુના થેનીમાં જેલની સુરક્ષામાં મોટી ચૂક સામે આવી છે. સબ-જેલમાંથી 17 કેદીઓ ફરાર થવાની ઘટનાએ પોલીસ અને જેલ વિભાગમાં હડકંપ મચાવ્યો છે. કેદીઓને પકડવા માટે પોલીસનું સર્ચ ઓપરેશન તેજ કરવામાં આવ્યું છે, જ્યારે બેદરકારીના આરોપસર 9 જેલ કર્મચારીઓને સસ્પેન્ડ કરવામાં આવ્યા છે.

જેલ સ્ટાફ પર હુમલો કરી કેદીઓ ફરાર
મળતી માહિતી મુજબ, સોમવારે મોડી રાત્રે થેની સબ-જેલમાં આ ઘટના બની હતી. પોલીસના જણાવ્યા અનુસાર, તમામ 17 કેદીઓને એક જ કોટડીમાં રાખવામાં આવ્યા હતા. આ દરમિયાન એક કેદીને ખેંચ આવી હોવાની માહિતી જેલ સ્ટાફને મળી હતી. સ્ટાફના કર્મચારીઓ કેદીની તપાસ કરવા કોટડીમાં પહોંચ્યા ત્યારે કેદીઓએ તેમના પર હુમલો કર્યો અને તકનો લાભ લઈને ફરાર થઈ ગયા. આ હુમલામાં જેલના ત્રણ કર્મચારીઓ ઘાયલ થયા હતા.

નવ જેલ કર્મચારીઓ સસ્પેન્ડ
ઘટનાની ગંભીરતાને ધ્યાનમાં રાખીને જેલ પોલીસ મહાનિર્દેશક (DGP) સંદીપ રાય રાઠોડે નવ કર્મચારીઓને સસ્પેન્ડ કર્યા છે. સસ્પેન્ડ કરાયેલા કર્મચારીઓમાં બે હેડ કોન્સ્ટેબલ, એક ગ્રેડ-1 અને છ ગ્રેડ-2 જેલ ગાર્ડનો સમાવેશ થાય છે. તમિલનાડુના કાયદા મંત્રી નિર્મલ કુમારે જણાવ્યું હતું કે, એક કેદીએ જેલ સ્ટાફને કોટડીમાં બોલાવવા માટે બીમારીનો ઢોંગ કર્યો હોવાની માહિતી સામે આવી છે. તેમના જણાવ્યા મુજબ, કેદીએ ખેંચ આવતી હોય તેમ વર્તન કર્યું હતું. તપાસ કરવા પહોંચેલા વોર્ડન સહિત ત્રણ કર્મચારીઓ પર હુમલો કરવામાં આવ્યો હતો.

17 ખાસ પોલીસ ટીમો દ્વારા સર્ચ ઓપરેશન
ફરાર કેદીઓને શોધવા માટે પોલીસે વ્યાપક શોધખોળ અભિયાન શરૂ કર્યું છે. મંગળવાર સવાર સુધીમાં ચાર કેદીઓને પકડી લેવામાં આવ્યા હતા, જ્યારે બાકીના કેદીઓને શોધવા કાર્યવાહી ચાલુ છે. ડિંડીગુલ જિલ્લામાં 16 સ્થળોએ ચેકપોસ્ટ ગોઠવવામાં આવી છે અને વાહનોની તપાસ વધુ કડક બનાવવામાં આવી છે. ડિંડીગુલના પોલીસ અધિક્ષક એસ. જયકુમારના જણાવ્યા મુજબ, ફરાર કેદીઓને પકડવા માટે 17 ખાસ પોલીસ ટીમો બનાવવામાં આવી છે. પાડોશી જિલ્લાઓ ઉપરાંત કેરળના ઇડુક્કી સહિતના વિસ્તારોના અધિકારીઓને પણ એલર્ટ કરવામાં આવ્યા છે. ફરાર કેદીઓના ફોટા પોલીસ અધિકારીઓ સાથે શેર કરવામાં આવ્યા છે, જેથી તેમની ઓળખ કરીને ઝડપી કાર્યવાહી કરી શકાય.

હુમલામાં ત્રણ જેલ કર્મચારીઓ ઘાયલ
જેલ સાથે જોડાયેલા ગ્રેડ-2 કર્મચારી થંગાપંડીને માથામાં ઈજા થઈ હતી. તેમને જી. વિલાક્કુની સરકારી હોસ્પિટલમાં દાખલ કરવામાં આવ્યા હતા. અન્ય બે કર્મચારીઓને પણ ઈજાઓ થઈ હતી. આ મામલે કેસ નોંધવામાં આવ્યો છે. પોલીસ બાકીના ફરાર કેદીઓને શોધવા સતત તપાસ કરી રહી છે. થેની સબ-જેલમાંથી 17 કેદીઓ કેવી રીતે ફરાર થયા અને સુરક્ષામાં ક્યાં ચૂક રહી, તે અંગેની તપાસ હવે મહત્વપૂર્ણ બની છે.