વંદે માતરમના 150 વર્ષ પર સંસદમાં વિશેષ ચર્ચા

ભારતના રાષ્ટ્રગીત વંદે માતરમના 150 વર્ષ પૂર્ણ થવાના અવસરે સંસદના શિયાળુ સત્ર દરમિયાન વિશેષ ચર્ચાનું આયોજન કરવામાં આવ્યું છે. લોકસભામાં આ અઠવાડિયે ગુરુવાર અથવા શુક્રવારે દસ કલાક સુધી ચર્ચા યોજાશે, જેમાં વડાપ્રધાન નરેન્દ્ર મોદી પણ ભાગ લેશે. આ ચર્ચામાં વંદે માતરમના ઐતિહાસિક, સાંસ્કૃતિક અને રાષ્ટ્રીય મહત્ત્વ પર વિસ્તૃત ચર્ચા કરવામાં આવશે.

આ ચર્ચા માટેનો પ્રસ્તાવ સંસદીય બાબતોના મંત્રી કિરેન રિજિજુ દ્વારા બોલાવવામાં આવેલી સર્વપક્ષીય બેઠક તેમજ લોકસભા અને રાજ્યસભાની વ્યાપાર સલાહકાર સમિતિઓમાં સહમતિથી પસાર થયો હતો. રાજયસભામાં શાસક પક્ષના સભ્યો દ્વારા પણ આ વિષય પર ચર્ચાની જોરદાર માગ કરવામાં આવી હતી. સરકારએ વંદે માતરમને રાષ્ટ્રીય એકતાનું પ્રતિક ગણાવી તમામ રાજકીય પક્ષોને ચર્ચામાં જોડાવા આમંત્રણ આપ્યું છે.

વંદે માતરમને વર્ષ 1950માં ભારતીય પ્રજાસત્તાકનું રાષ્ટ્રીય ગીત તરીકે સ્વીકારવામાં આવ્યું હતું. આ ગીતની રચના બંકિમચંદ્ર ચેટર્જીએ સંસ્કૃત અને બંગાળીમાં કરી હતી અને તે તેમની બંગાળી નવલકથા આનંદમઠનો ભાગ છે, જે 1882માં પ્રકાશિત થઈ હતી. સ્વાતંત્ર્ય સંગ્રામ દરમિયાન વંદે માતરમ જનઆંદોલન માટે પ્રેરણાસ્ત્રોત બન્યું હતું.

ગીતની 150મી વર્ષગાંઠની ઉજવણી અંતર્ગત કેન્દ્ર સરકારે સ્મારક સિક્કો અને ટપાલ ટિકિટ પણ જાહેર કરી છે. વડાપ્રધાન મોદીએ તાજેતરમાં વંદે માતરમને સ્વાતંત્ર્ય સંગ્રામનો અમર વારસો ગણાવ્યો હતો અને યુવાનોને તેને ગાવા તથા તેની ભાવના અપનાવવા અપીલ કરી હતી.

ઉલ્લેખનીય છે કે લોકસભાની BAC બેઠકમાં કોંગ્રેસે ચૂંટણી સુધારા અને અન્ય મુદ્દાઓ પર ચર્ચાની માગ કરી હતી, પરંતુ સરકારે વંદે માતરમને પ્રાથમિકતા આપી હતી. લોકસભાનું શિયાળુ સત્ર 1 ડિસેમ્બરથી 19 ડિસેમ્બર સુધી ચાલશે, જેમાં કુલ 15 બેઠકો યોજાશે અને આ દરમિયાન અનેક મહત્વના નવા બિલો પણ રજૂ થવાના છે.