Raghav Chadha Appointed Rajya Sabha Petitions Committee Chairman: દેશના રાજકારણમાં પક્ષપલટા અને ત્યારબાદ સમીકરણો બદલાવાની ઘટનાઓ વચ્ચે એક મોટા સમાચાર સામે આવ્યા છે. તાજેતરમાં જ આમ આદમી પાર્ટી (AAP) નો સાથ છોડીને ભારતીય જનતા પાર્ટી (BJP) નો ભગવો ધારણ કરનારા રાજ્યસભા સાંસદ રાઘવ ચઢ્ઢાને સંસદમાં એક અત્યંત મહત્વપૂર્ણ જવાબદારી સોંપવામાં આવી છે. રાઘવ ચઢ્ઢાને ઉપલા ગૃહ એટલે કે રાજ્યસભાની 'અરજીઓ પરની સમિતિ' (Committee on Petitions) ના નવા અધ્યક્ષ તરીકે નિયુક્ત કરવામાં આવ્યા છે. ભાજપમાં જોડાતાની સાથે જ રાઘવ ચઢ્ઢાને મળેલા આ મોટા પદને રાજકીય ગલિયારાઓમાં એક મોટા 'ઈનામ' તરીકે જોવામાં આવી રહ્યું છે.
રાજ્યસભા સચિવાલય દ્વારા સત્તાવાર જાહેરનામું બહાર પડાયું રાજ્યસભા સચિવાલય દ્વારા જારી કરાયેલા એક સત્તાવાર જાહેરનામામાં આ નિમણૂકની પુષ્ટિ કરવામાં આવી છે. જાહેરનામામાં જણાવ્યા અનુસાર, રાજ્યસભાના અધ્યક્ષ સી.પી. રાધાકૃષ્ણને 20 મે 2026થી અમલમાં આવે તે રીતે અરજીઓ પરની સમિતિનું પુનર્ગઠન કર્યું છે. આ પ્રતિષ્ઠિત સમિતિના નેતૃત્વ માટે રાઘવ ચઢ્ઢાના નામ પર મહોર મારવામાં આવી છે, અને તેમની આ નિમણૂક તાત્કાલિક અસરથી લાગુ થઈ ગઈ છે. આ સમિતિ સંસદ સમક્ષ આવતી વિવિધ જાહેર હિતની અરજીઓ અને મહત્વના મુદ્દાઓની કાનૂની અને વહીવટી તપાસ કરે છે.
10 સભ્યોની સમિતિમાં દેશના દિગ્ગજ નેતાઓ સામેલ રાઘવ ચઢ્ઢાના નેતૃત્વવાળી આ 10 સભ્યોની સમિતિમાં દેશભરના અગ્રણી સંસદ સભ્યોને સ્થાન આપવામાં આવ્યું છે. આ સમિતિના અન્ય સભ્યોમાં હર્ષ મહાજન, ગુલામ અલી, શંભુ શરણ પટેલ, મયંકકુમાર નાયક, મસ્તાન રાવ યાદવ બિધા, જે.બી. માથર હિશમ, સુભાષિશ ખુંટિયા, રોંગવરા નરઝારી અને સંદોષ કુમાર પી. નો સમાવેશ થાય છે. આ ઉપરાંત, એક અલગ નોટિફિકેશનમાં જણાવાયું છે કે રાજ્યસભાના સભ્ય ડૉ. મેનકા ગુરુસ્વામીને પણ કોર્પોરેટ કાયદા (સુધારા) બિલ, 2026 પરની સંયુક્ત સમિતિના સભ્ય તરીકે નામાંકિત કરવામાં આવ્યા છે.
'આપ' ને મોટો ફટકો: 7 સાંસદોના પક્ષપલટાથી કેજરીવાલની ચિંતા વધી આ સમગ્ર રાજકીય ઘટનાક્રમની પૃષ્ઠભૂમિ અત્યંત રસપ્રદ છે. આમ આદમી પાર્ટીના સ્થાપક સભ્યો અને ટોચના વ્યૂહરચનાકારોમાં ગણાતા રાઘવ ચઢ્ઢા સહિત રાજ્યસભાના 7 સાંસદોએ અચાનક પાર્ટી સાથે છેડો ફાડી દીધો હતો. રાઘવ ચઢ્ઢા, સંદીપ પાઠક, અશોક મિત્તલ, હરભજન સિંહ, સ્વાતિ માલીવાલ, રાજિંદર ગુપ્તા અને વિક્રમજીત સિંહ સાહનીએ 27 એપ્રિલ 2026ના રોજ સત્તાવાર રીતે ભાજપનું સભ્યપદ સ્વીકારી લીધું હતું. આ સામૂહિક પક્ષપલટાના કારણે રાજ્યસભામાં 10 સાંસદોનું સંખ્યાબળ ધરાવતી આમ આદમી પાર્ટી પાસે હવે માત્ર 3 જ સાંસદો બચ્યા છે, જે અરવિંદ કેજરીવાલ માટે બહુ મોટો આંચકો છે. આ ઘટનાથી રોષે ભરાયેલી 'આપ' પાર્ટીએ રાજ્યસભાના સભાપતિ સમક્ષ સત્તાવાર માંગ કરી છે કે પક્ષપલટા વિરોધી કાયદા હેઠળ આ તમામ 7 બળવાખોર સાંસદોનું સભ્યપદ તાત્કાલિક રદ કરવામાં આવે.
સોશિયલ મીડિયા ટ્રોલિંગ અને ડીપફેકથી પરેશાન ચઢ્ઢા પહોંચ્યા હાઈકોર્ટ એક તરફ રાઘવ ચઢ્ઢાનું રાજકીય કદ વધ્યું છે, તો બીજી તરફ સોશિયલ મીડિયા પર તેમના પક્ષપલટાને લઈને ભારે આક્રોશ અને ટ્રોલિંગ જોવા મળી રહ્યું છે. ડિજિટલ પ્લેટફોર્મ્સ પર પોતાના વિશે ફેલાવવામાં આવી રહેલી નકલી અને એઆઈ-જનરેટેડ (AI-generated) ડીપફેક કન્ટેન્ટથી પરેશાન થઈને રાઘવ ચઢ્ઢાએ દિલ્હી હાઈકોર્ટના દરવાજા ખખડાવ્યા છે. તેમણે અરજીમાં માંગ કરી છે કે તેમની પ્રતિષ્ઠાને નુકસાન પહોંચાડતા આ વીડિયોઝને તાત્કાલિક બ્લોક કરવામાં આવે. જોકે, દિલ્હી હાઈકોર્ટના જસ્ટિસ સુબ્રહ્મણ્યમ પ્રસાદની બેન્ચે આ મામલે કડક વલણ અપનાવતા મૌખિક ટિપ્પણી કરી હતી કે, આ કોઈના અંગત પર્સનાલિટી રાઈટ્સના ઉલ્લંઘનનો મામલો નથી, પરંતુ તેમના રાજકીય નિર્ણયોની આલોચના છે. કોઈના વ્યાપારી અધિકારોનો દુરુપયોગ કરવો અને કોઈની રાજકીય ટીકા કરવી, એ બંને અલગ બાબતો છે. હાલમાં હાઈકોર્ટે આ હાઈ-પ્રોફાઈલ કેસ પર પોતાનો ચુકાદો અનામત રાખ્યો છે.

રાજ્યસભામાં સોંપાઈ આ મોટી જવાબદારી

May 23, 2026 | 16:11 IST