મીઠાઈમાં ઝેર? હોળી પહેલા હલ્દીરામમાં દરોડા

હોળીના તહેવારને હવે ગણતરીના દિવસો બાકી છે ત્યારે લોકો મીઠાઈઓની ખરીદીમાં વ્યસ્ત છે. આ દરમિયાન ખાદ્ય સુરક્ષા વિભાગ (FSSAI) દ્વારા દેશભરમાં ભેળસેળિયાઓ અને બેદરકાર વેપારીઓ સામે એક મોટું અભિયાન શરૂ કરવામાં આવ્યું છે.

આ અભિયાનની સૌથી ચોંકાવનારી વિગત લખનઉ અને હૈદરાબાદથી સામે આવી છે, જ્યાં હલ્દીરામ જેવી લોકપ્રિય બ્રાન્ડના એકમોમાંથી એક્સપાયર થયેલી મીઠાઈઓ મળી આવી છે.

લખનઉમાં મોટું ઓપરેશન

ઉત્તર પ્રદેશના લખનઉ સ્થિત ફૈઝુલ્લાગંજમાં હલ્દીરામના એક વેરહાઉસ પર ફૂડ સેફ્ટી અધિકારીઓએ દરોડો પાડ્યો હતો. આ તપાસ દરમિયાન અધિકારીઓને 112 કિલો એક્સપાયર થયેલી સોનપાપડી મળી આવી હતી, જેની બજાર કિંમત અંદાજે ₹45,000 હતી.

વિભાગે આ જથ્થો જપ્ત કરી તેનો નાશ કર્યો છે. આ ઉપરાંત, આસપાસના અન્ય સ્ટોરેજ એકમોમાંથી કુલ ₹55.91 લાખની કિંમતનો 10,415 કિલો જેટલો શંકાસ્પદ માવો (ખોયા) અને મસાલા પણ જપ્ત કરવામાં આવ્યા છે.

હૈદરાબાદમાં પણ બેદરકારી

માત્ર ઉત્તર ભારત જ નહીં, પરંતુ દક્ષિણ ભારતમાં પણ સ્થિતિ ચિંતાજનક છે. થોડા દિવસો પહેલા હૈદરાબાદમાં હલ્દીરામના એક આઉટલેટ પર તપાસ દરમિયાન પ્રોડક્ટ્સ પર લેબલિંગમાં ખામી અને એક્સપાયરી ડેટમાં ગેરરીતિઓ જોવા મળી હતી.

આ ઘટનાઓએ ગ્રાહકોમાં ભારે રોષ અને ચિંતા જન્માવી છે કે જો આટલી મોટી બ્રાન્ડ્સ પર પણ ભરોસો ન કરી શકાય, તો સામાન્ય જનતાએ ક્યાં જવું?

કચરાપેટીમાંથી મીઠાઈ વીણતા લોકો

દરોડા દરમિયાન એક અત્યંત વરવું દ્રશ્ય સામે આવ્યું હતું. જ્યારે અધિકારીઓએ જપ્ત કરેલી એક્સપાયર મીઠાઈઓને જાહેર કચરાપેટીમાં ફેંકી, ત્યારે આસપાસના લોકો તે ઝેરી મીઠાઈઓ લેવા માટે તૂટી પડ્યા હતા. આ ઘટના સૂચવે છે કે એક તરફ બ્રાન્ડ્સની બેદરકારી છે અને બીજી તરફ જનતામાં સ્વાસ્થ્ય પ્રત્યેની જાગૃતિનો અભાવ.

દિલ્હીથી શરૂ થયું દેશવ્યાપી અભિયાન

દિલ્હી ફૂડ સેફ્ટી ડિપાર્ટમેન્ટે પણ હોળીને ધ્યાનમાં રાખીને પનીર, માવો અને ઘીની શુદ્ધતા તપાસવા માટે સ્પેશિયલ ડ્રાઈવ શરૂ કરી છે. નિષ્ણાતોનું કહેવું છે કે બજારમાં અત્યારે નકલી પનીર અને સિન્થેટિક દૂધનો રાફડો ફાટ્યો છે, જે લીવર અને કિડનીને ગંભીર નુકસાન પહોંચાડી શકે છે.