શું તમારા ફોનમાં પણ આવ્યો 'Emergency Alert'?

NDMA Cell Broadcast Test: ભારત સરકાર દ્વારા દેશના નાગરિકોની સુરક્ષા અને આપત્તિ વ્યવસ્થાપનને મજબૂત બનાવવા માટે એક અત્યાધુનિક ઇમરજન્સી એલર્ટ સિસ્ટમ વિકસાવવામાં આવી છે. આ ટેકનોલોજીના પરીક્ષણના ભાગરૂપે તાજેતરમાં શનિવારે સવારે 11:42 વાગ્યે દેશના લાખો સ્માર્ટફોન યુઝર્સને એક વિશેષ ચેતવણી સંદેશ મોકલવામાં આવ્યો હતો. આ પરીક્ષણ દરમિયાન લોકોના ફોન પર જોરથી સાયરન વાગવા લાગ્યું હતું અને ફોન વાઇબ્રેટ થવા લાગ્યો હતો, જેની ખાસિયત એ છે કે ફોન સાયલન્ટ મોડ પર હોવા છતાં પણ આ એલર્ટ સક્રિય થયું હતું.

સેલ બ્રોડકાસ્ટ એલર્ટ સિસ્ટમનું રાષ્ટ્રવ્યાપી પરીક્ષણ
આ રાષ્ટ્રવ્યાપી પરીક્ષણ ભારત સરકારના દૂરસંચાર વિભાગ (DoT) દ્વારા રાષ્ટ્રીય આપત્તિ વ્યવસ્થાપન સત્તામંડળ (NDMA) ના સહયોગથી હાથ ધરવામાં આવ્યું છે. આ સિસ્ટમ ખાસ કરીને પૂર, ભૂકંપ કે આગ જેવી કુદરતી આફતો અને કટોકટીના સમયે નાગરિકોને ત્વરિત ચેતવણી આપવા માટે તૈયાર કરવામાં આવી છે. આ સિસ્ટમ સરકારના 'SACHET' નામના સેન્ટ્રલાઇઝ્ડ ચેતવણી પ્લેટફોર્મ સાથે જોડાયેલી છે, જેનો હેતુ એક મજબૂત કટોકટી સંચાર નેટવર્ક ઊભું કરવાનો છે. બપોરના સમયે યુઝર્સના ફોન પર હિન્દી અને અંગ્રેજી ઉપરાંત સ્થાનિક ભાષાઓમાં પણ આ મેસેજ ફ્લેશ થવા લાગ્યો હતો. આ મેસેજમાં સ્પષ્ટપણે ઉલ્લેખ કરવામાં આવ્યો હતો કે આ ફક્ત એક પરીક્ષણ સંદેશ છે અને તેનો હેતુ માત્ર સિસ્ટમની કાર્યક્ષમતા તપાસવાનો છે.

ઇન્ટરનેટ અને રિચાર્જ વગર પણ આપશે સુરક્ષા
આ નવી ઇમરજન્સી સિસ્ટમની સૌથી મોટી વિશેષતા તેની કામ કરવાની પદ્ધતિ છે. આ સિસ્ટમ ઇન્ટરનેટ કનેક્શન વિના પણ કામ કરી શકે છે. જે વિસ્તારોમાં નેટવર્ક નબળું હોય, કોલ ડ્રોપ થતા હોય અથવા ઇન્ટરનેટ ડેટા પેક પૂરું થઈ ગયું હોય, ત્યાં પણ આ મેસેજ પહોંચવાની પૂરેપૂરી શક્યતા છે. ભવિષ્યમાં આ સિસ્ટમ એવા સ્માર્ટફોન પર પણ કામ કરશે જેમાં રિચાર્જ ન હોય. જોકે, જે ફોનમાં બિલકુલ સિગ્નલ ન હોય તેવા ઉપકરણો પર આ સંદેશ પહોંચશે નહીં.

 

अगर आपके फोन पर Alert Message आए, घबराएं नहीं।

यह Emergency Alert System की testing का हिस्सा है,
ताकि आपदा के समय सही जानकारी समय पर मिल सके।

Testing के दौरान यह संदेश बार-बार आ सकता है।
इसे अनदेखा करें, आपको कुछ करने की ज़रूरत नहीं है।#EmergencyAlerts #StayAlert… pic.twitter.com/z0UdeWoZGT

— DoT India (@DoT_India) May 1, 2026

 

સરકારની નાગરિકોને અપીલ: ગભરાશો નહીં
દૂરસંચાર વિભાગે (DoT) સોશિયલ મીડિયા પર પોસ્ટ કરીને નાગરિકોને ખાસ વિનંતી કરી છે કે આ સંદેશ જોઈને ગભરાવાની જરૂર નથી. આ માત્ર સિસ્ટમની ચકાસણીનો એક ભાગ છે. પરીક્ષણ દરમિયાન એક જ યુઝરને આ મેસેજ વારંવાર મળી શકે છે, જેને સામાન્ય પ્રક્રિયા ગણીને અવગણવા માટે જણાવવામાં આવ્યું છે. આ ટેકનોલોજી દ્વારા સરકારનો લક્ષ્ય એ છે કે કોઈપણ મોટી હોનારત સમયે સેકન્ડોમાં લાખો લોકો સુધી જીવનરક્ષક માહિતી પહોંચાડી શકાય.