બિહારમાં 42 ધારાસભ્યોને પટણા હાઈકોર્ટની નોટિસ

બિહાર વિધાનસભા ચૂંટણી 2025ના પરિણામો બાદ રાજ્યના રાજકારણમાં મોટો વળાંક આવ્યો છે. પટણા હાઈકોર્ટે સત્તાધારી પક્ષ અને વિપક્ષના કુલ 42 ધારાસભ્યોને ચૂંટણીલક્ષી ગેરરીતિઓના આરોપસર નોટિસ ફટકારી છે. આ નેતાઓ પર ચૂંટણી દરમિયાન મતોની ચોરી કરવા અને ઉમેદવારી ફોર્મ (એફિડેવિટ) માં ખોટી વિગતો રજૂ કરવાનો ગંભીર આરોપ મૂકવામાં આવ્યો છે.

પરાજિત ઉમેદવારોએ નોંધાવ્યો વિરોધ : 

ચૂંટણીમાં નજીવા અંતરે હારેલા ઉમેદવારોએ જીતેલા ધારાસભ્યો વિરુદ્ધ પટણા હાઈકોર્ટમાં અરજીઓ દાખલ કરી હતી. 19 ફેબ્રુઆરી 2026 ના રોજ આ અરજીઓ પર પ્રાથમિક સુનાવણી હાથ ધરતા કોર્ટે કડક વલણ અપનાવ્યું છે. હાઈકોર્ટે તમામ 42 ધારાસભ્યોને નોટિસ પાઠવીને નિયત સમય મર્યાદામાં પોતાનો પક્ષ રાખવા અને જવાબ રજૂ કરવા આદેશ આપ્યો છે.

મંત્રીઓ અને દિગ્ગજ નેતાઓ સામેલ : 

નોટિસ મેળવનાર નેતાઓની યાદીમાં બિહાર સરકારના નાણાં અને ઊર્જા મંત્રી બિજેન્દ્ર યાદવ (JDU) નું નામ પણ સામેલ છે. આ ઉપરાંત ભાજપના ધારાસભ્ય જિવેશ મિશ્રા, જેડીયુના ચેતન આનંદ અને આરજેડીના અમેદ પ્રસાદ સહિત અનેક મોટા ચહેરાઓ આ યાદીમાં છે. કોર્ટ હવે આ નેતાઓના જવાબ અને રજૂ કરાયેલા પુરાવાઓના આધારે આગળની સુનાવણી કરશે.

ચૂંટણી પરિણામોની પૃષ્ઠભૂમિ : 

બિહાર વિધાનસભા ચૂંટણીના પરિણામો 14 નવેમ્બરના રોજ જાહેર થયા હતા, જેમાં એનડીએ (NDA) એ બહુમતી સાથે જીત મેળવી હતી. બીજી તરફ, આરજેડી માત્ર 25 બેઠકો પર સમેટાઈ ગઈ હતી અને કોંગ્રેસને માત્ર 6 બેઠકો મળી હતી. જીતનરામ માંઝીની પાર્ટીએ 5 અને ઉપેન્દ્ર કુશવાહાની પાર્ટીએ 4 બેઠકો પર વિજય મેળવ્યો હતો. આ પરિણામો બાદ જ હારેલા ઉમેદવારોએ કાયદાકીય લડત શરૂ કરી હતી.