મહાકાલ મંદિરમાં આરતીનું ઓનલાઇન બુકિંગ શરૂ

મધ્યપ્રદેશના ઉજ્જૈનમાં સ્થિત પ્રસિદ્ધ મહાકાલેશ્વર મંદિરમાં ભક્તોની વધતી સંખ્યાને ધ્યાનમાં રાખીને વ્યવસ્થામાં મોટો ફેરફાર કરવામાં આવ્યો છે. મંદિર પ્રશાસને ભસ્મ આરતીની જેમ જ હવે 'સંધ્યા આરતી' અને 'શયન આરતી' માટે પણ ઓનલાઇન બુકિંગ સુવિધા શરૂ કરી દીધી છે. આ નિર્ણયથી દર્શન વ્યવસ્થા વધુ પારદર્શક બનશે અને ભક્તોએ લાંબી લાઈનોમાં ઉભા રહેવું નહીં પડે.

બુકિંગ માટેનો સમય અને રીત : 

ભક્તો મહાકાલેશ્વર મંદિરની સત્તાવાર વેબસાઈટ પર જઈને પોતાની ટિકિટ બુક કરી શકે છે. બુકિંગ માટેનો સમય નીચે મુજબ નિર્ધારિત કરવામાં આવ્યો છે

સંધ્યા આરતી: દરરોજ બપોરે 12:00 વાગ્યે બુકિંગ વિન્ડો ખુલશે

શયન આરતી: દરરોજ સાંજે 4:00 વાગ્યાથી ટિકિટ બુકિંગ શરૂ થશે

ટિકિટ દર અને પ્રવેશ પ્રક્રિયા : 

મંદિર સમિતિ દ્વારા સંધ્યા અને શયન આરતીમાં સહભાગી થવા માટે પ્રતિ વ્યક્તિ ₹250નો દર નક્કી કરવામાં આવ્યો છે. જે શ્રદ્ધાળુઓ ટિકિટ બુક નથી કરી શક્યા, તેઓ સામાન્ય લાઈનમાં રહીને દર્શન કરી શકશે. આરતી માટે નોંધણી કરાવનાર ભક્તોએ પ્રવેશ દ્વાર નંબર 1 પરથી એન્ટ્રી લેવાની રહેશે. નિયમ મુજબ, સંધ્યા આરતી માટે સાંજે 6:00 પહેલા અને શયન આરતી માટે રાત્રે 10:00 વાગ્યા સુધીમાં મંદિરમાં હાજર થવું જરૂરી છે.

મહાકાલેશ્વર મંદિરમાં આરતીનો વિગતવાર સમય : 

બાબા મહાકાલના ધામમાં દિવસભર કુલ 6 મુખ્ય આરતીઓ યોજાય છે:

ભસ્મ આરતી: સવારે 4:00 વાગ્યે

દ્યોતક આરતી: સવારે 7:00 વાગ્યે

ભોગ આરતી: સવારે 10:00 વાગ્યે

પૂજન આરતી: સાંજે 5:00 વાગ્યે

સંધ્યા આરતી: સાંજે 7:00 વાગ્યે

શયન આરતી: રાત્રે 10:30 વાગ્યે