કર્ણાટકના મુખ્યમંત્રી સિદ્ધારમૈયાએ રાજ્યમાં 16 વર્ષથી ઓછી ઉંમરના બાળકો માટે મોબાઈલ ફોન અને સોશિયલ મીડિયાના ઉપયોગ પર પ્રતિબંધ મૂકવાની દિશામાં મહત્વના સંકેતો આપ્યા છે.
વાઇસ ચાન્સેલરો (VC) સાથેની બેઠકમાં મુખ્યમંત્રીએ બાળકોમાં વધતા ડ્રગ્સના સેવન અને સોશિયલ મીડિયા એડિક્શન અંગે ગંભીર ચિંતા વ્યક્ત કરી હતી.
મુખ્યમંત્રીનું નિવેદન અને ઓસ્ટ્રેલિયાનું ઉદાહરણ
સીએમ સિદ્ધારમૈયાએ જણાવ્યું હતું કે, "આજે જ્યારે આપણે આ ગંભીર વિષય પર ચર્ચા કરી રહ્યા છીએ, ત્યારે હું હાજર રહેલા તમામ વાઇસ ચાન્સેલરોનો અભિપ્રાય માંગુ છું. બાળકો ડ્રગ્સનો શિકાર બની રહ્યા છે. ઓસ્ટ્રેલિયા જેવા દેશોની જેમ, આપણે પણ 16 વર્ષથી ઓછી ઉંમરના બાળકો માટે મોબાઈલ ફોન પર પ્રતિબંધ મૂકવાનો વિચાર કરી રહ્યા છીએ. ઘણા બાળકો સોશિયલ મીડિયાના રવાડે ચઢી રહ્યા છે."
આઈટી મંત્રી પ્રિયંક ખડગેની સ્પષ્ટતા
કર્ણાટકના આઈટી મંત્રી પ્રિયંક ખડગેએ વિધાનસભામાં જણાવ્યું હતું કે સરકાર આર્ટિફિશિયલ ઇન્ટેલિજન્સ (AI) અને સોશિયલ મીડિયાના જવાબદાર ઉપયોગ માટે પગલાં લઈ રહી છે. તેમણે ઉમેર્યું કે તેમનો વિભાગ 'મેટા' (Meta) સાથે મળીને 'ડિજિટલ ડિટોક્સ' પ્રોગ્રામ ચલાવી રહ્યો છે, જેનો લાભ 3 લાખ બાળકો અને 1 લાખ શિક્ષકો લઈ રહ્યા છે.
માત્ર કર્ણાટક જ નહીં, પરંતુ ગોવા અને આંધ્ર પ્રદેશ સરકાર પણ આ દિશામાં સક્રિય થઈ છે:
ગોવા: ગોવા સરકાર ઓસ્ટ્રેલિયાના કાયદાનો અભ્યાસ કરી રહી છે. આઈટી મંત્રી રોહન ખૌંટેએ સંકેત આપ્યો કે ટૂંક સમયમાં મુખ્યમંત્રી સાથે ચર્ચા કરી કાયદો લાવી શકાય છે.
આંધ્ર પ્રદેશ: શિક્ષણ મંત્રી નારા લોકેશે જણાવ્યું કે મહિલાઓની સુરક્ષા અને બાળકોના શિક્ષણ પર સોશિયલ મીડિયાની ખરાબ અસરોને રોકવા માટે સિંગાપોર, ઓસ્ટ્રેલિયા અને ફ્રાન્સ જેવા દેશોની નીતિઓનો અભ્યાસ કરવામાં આવી રહ્યો છે.
નિષ્ણાતો અને ધારાસભ્યોએ રજૂઆત કરી છે કે બાળકો ખૂબ નાની ઉંમરે સોશિયલ મીડિયા દ્વારા અશ્લીલ સામગ્રી અને ઓનલાઈન ઉત્પીડનનો ભોગ બની રહ્યા છે.
કેન્દ્ર સરકારના ઇકોનોમિક સર્વેમાં પણ ઓનલાઈન શિક્ષણ ઘટાડવા અને પ્લેટફોર્મ માટે વય મર્યાદા નક્કી કરવાની ભલામણ કરવામાં આવી છે.

CM સિદ્ધારમૈયાની પ્રતિબંધની વિચારણા

ડ્રગ્સ અને સોશિયલ મીડિયાની જાળમાંથી બાળકોને બચાવવા સરકારનો મોટો પ્લાન

February 22, 2026 | 15:09 IST