મેઘાલય ખાણ વિસ્ફોટ: 18ના મોત, ગેરકાયદે ખનન પર રોષ

મેઘાલયના પૂર્વ જયંતિયા હિલ્સ જિલ્લામાં ગુરુવારે એક ભયાનક દુર્ઘટના સર્જાઈ હતી. અહીં ગેરકાયદેસર રીતે ચાલતી કોલસાની ખાણમાં અચાનક વિસ્ફોટ થવાને કારણે સમગ્ર વિસ્તારમાં અફરાતફરી મચી ગઈ હતી. આ અકસ્માત એટલો ભયાનક હતો કે અંદર કામ કરી રહેલા શ્રમિકોને બહાર નીકળવાની તક પણ મળી ન હતી. અત્યાર સુધીમાં રાહત અને બચાવ ટીમે 18 શ્રમિકોના મૃતદેહ બહાર કાઢ્યા છે, જ્યારે હજુ પણ અનેક લોકો કાટમાળ નીચે દબાયેલા હોવાની ભીતિ સેવાઈ રહી છે.

રાહત કામગીરી અને સરકારની સક્રિયતા : 

આ ઘટનાની ગંભીરતાને જોતા NDRF અને SDRFની ટીમો તાત્કાલિક ઘટનાસ્થળે પહોંચી ગઈ હતી. જોકે, ભૌગોલિક સ્થિતિને કારણે બચાવ કામગીરીમાં મુશ્કેલીઓનો સામનો કરવો પડી રહ્યો છે. આ દુર્ઘટના બાદ વડાપ્રધાન નરેન્દ્ર મોદીએ ઊંડા શોકની લાગણી વ્યક્ત કરી છે. કેન્દ્ર સરકાર અને રાજ્ય સરકાર બંને એક્શન મોડમાં આવી ગઈ છે. કેન્દ્રીય ગૃહમંત્રી અમિત શાહે મેઘાલયના મુખ્યમંત્રી કોનરાડ સંગમા સાથે ટેલિફોનિક વાતચીત કરીને શક્ય તમામ મદદની ખાતરી આપી છે.

વળતરની જાહેરાત : 

સરકાર દ્વારા અસરગ્રસ્ત પરિવારો માટે આર્થિક સહાયની જાહેરાત કરવામાં આવી છે:

કેન્દ્ર સરકાર: મૃતકોના પરિવારને 2 લાખ રૂપિયા અને ઈજાગ્રસ્તોને 50,000 રૂપિયાની સહાય.

રાજ્ય સરકાર: મૃતકોના આશ્રિતોને 3 લાખ રૂપિયાની આર્થિક મદદ.

ગેરકાયદેસર ખનન સામે કડક તપાસના આદેશ :

પ્રાથમિક તપાસમાં સામે આવ્યું છે કે આ ખાણ કોઈપણ મંજૂરી વગર ગેરકાયદેસર રીતે ચલાવવામાં આવતી હતી. મુખ્યમંત્રી કોનરાડ સંગમાએ આ મામલે ઉચ્ચ સ્તરીય તપાસના આદેશ આપ્યા છે. પોલીસે ભારતીય દંડ સંહિતા, ખાણ અને ખનિજ અધિનિયમ 1957 તેમજ વિસ્ફોટક અધિનિયમ હેઠળ ગુનો નોંધીને તપાસ તેજ કરી છે. સરકારે સ્પષ્ટ કર્યું છે કે રાજ્યમાં હવે માત્ર વૈજ્ઞાનિક પદ્ધતિથી જ ખાણકામને મંજૂરી અપાશે અને નિયમોનું ઉલ્લંઘન કરનારાઓ વિરુદ્ધ કડક કાયદાકીય પગલાં લેવામાં આવશે.

રાષ્ટ્રપતિ દ્રૌપદી મુર્મુ સહિત વિપક્ષી નેતાઓ અખિલેશ યાદવ અને પ્રિયંકા ગાંધીએ પણ આ ઘટના પર દુઃખ વ્યક્ત કરીને કડક તપાસની માંગ કરી છે. હાલમાં સમગ્ર વિસ્તારમાં શોકનું મોજું ફરી વળ્યું છે.