મન કી બાત: 'AI સમિટથી દુનિયા ભારત સામે સ્તબ્ધ'

વડાપ્રધાન નરેન્દ્ર મોદીએ રવિવારે તેમના માસિક રેડિયો કાર્યક્રમ 'મન કી બાત' ના 131મા એપિસોડ દ્વારા રાષ્ટ્રને સંબોધિત કર્યું હતું. આ પ્રસંગે તેમણે ટેકનોલોજી, અંગદાન અને ભારતીય ઉત્પાદનોની ગુણવત્તા પર વિશેષ ભાર મૂક્યો હતો. 

પીએમ મોદીએ જણાવ્યું હતું કે તાજેતરમાં યોજાયેલી 'AI ઇમ્પેક્ટ સમિટ 2026' ભારત માટે ટર્નિંગ પોઈન્ટ સાબિત થઈ છે અને વૈશ્વિક નેતાઓ ભારતની ઇનોવેશન શક્તિ જોઈને આશ્ચર્યચકિત છે.

ખેતીમાં AIનો જાદુ jova m lyo 

વડાપ્રધાને સમિટના અનુભવો શેર કરતા કહ્યું કે, "મેં વિશ્વના નેતાઓને બતાવ્યું કે કેવી રીતે AI પશુઓની સારવારમાં મદદ કરી રહ્યું છે. હવે ખેડૂતો આધુનિક ટેકનોલોજીની મદદથી 24x7 તેમના પશુધનની દેખરેખ રાખી શકે છે."

તેમણે ઓડિશાના યુવા ખેડૂત હિરોદ પટેલની પ્રેરણાદાયી વાર્તા શેર કરી, જેમણે પરંપરાગત ખેતી છોડીને આધુનિક અભિગમ અપનાવીને સફળતા મેળવી છે.

'ઝીરો ડિફેક્ટ' અને વિશ્વસ્તરીય ગુણવત્તા

ભારતીય સ્ટાર્ટ-અપ્સ અને ઉત્પાદકોને પ્રોત્સાહિત કરતા પીએમ મોદીએ 'ઝીરો ડિફેક્ટ' (શૂન્ય ખામી)નો મંત્ર આપ્યો હતો. તેમણે કહ્યું કે ભારતે એવા ઉત્પાદનો બનાવવા જોઈએ જેની વિશ્વભરમાં કદર થાય. સેમિકન્ડક્ટર, અવકાશ સંશોધન અને ગ્રીન એનર્જી જેવા ક્ષેત્રોમાં ભારતની યુવા શક્તિ દેશને નવી ઊંચાઈએ લઈ જશે.

અંગદાન અને માનવતાનું ઉદાહરણ

ભાવુક ક્ષણોમાં પીએમ મોદીએ કેરળની નાની બાળકી આલિન શેરિન અબ્રાહમને યાદ કરી. તેના પરિવારે આલિનના અંગોનું દાન કરીને અનેક લોકોને નવું જીવન આપ્યું છે. પીએમએ કહ્યું કે દેશમાં અંગદાન પ્રત્યે જાગૃતિ વધી રહી છે, જે તબીબી સંશોધન માટે પણ પ્રોત્સાહક છે.

ડિજિટલ સુરક્ષા અને છેતરપિંડીથી સાવધાન

વધતા જતા ડિજિટલ યુગમાં પીએમ મોદીએ 'ડિજિટલ ફ્રોડ' અંગે નાગરિકોને ચેતવ્યા હતા. તેમણે KYC (નો યોર કસ્ટમર) પ્રક્રિયા પ્રત્યે જાગૃત રહેવા અને ઓનલાઈન પ્લેટફોર્મનો ઉપયોગ કરતી વખતે સાવચેતી રાખવા અપીલ કરી હતી.

જયલલિતાને શ્રદ્ધાંજલિ અને સાંસ્કૃતિક ગૌરવ

તામિલનાડુના પૂર્વ મુખ્યમંત્રી જે. જયલલિતાની 24 ફેબ્રુઆરીએ આવતી જન્મજયંતિ નિમિત્તે પીએમ મોદીએ તેમને યાદ કર્યા હતા. તેમણે જયલલિતાની મક્કમ નેતૃત્વ ક્ષમતા અને લોકો પ્રત્યેના તેમના સમર્પણના વખાણ કર્યા હતા.

વધુમાં, તેમણે રાષ્ટ્રપતિ ભવનમાં યોજાનારા 'રાજાજી ઉત્સવ' વિશે પણ માહિતી આપી હતી અને લોકોને ભારતીય સંસ્કૃતિ સાથે જોડાવા આહવાન કર્યું હતું.