નવેમ્બર 2025માં દેશની રાજધાની દિલ્હીના ઐતિહાસિક લાલ કિલ્લા નજીક થયેલા ભયાનક કાર વિસ્ફોટ મામલે સંયુક્ત રાષ્ટ્ર સુરક્ષા પરિષદ (UNSC)એ એક મહત્વપૂર્ણ અહેવાલ રજૂ કર્યો છે.
આ રિપોર્ટમાં સ્પષ્ટપણે જણાવવામાં આવ્યું છે કે પાકિસ્તાન સ્થિત આતંકી સંગઠન જૈશ-એ-મોહમ્મદ (JeM) એ આ હુમલાની જવાબદારી સ્વીકારી હતી. 9 નવેમ્બર 2025 ના રોજ થયેલા આ આત્મઘાતી હુમલામાં 15 નિર્દોષ લોકોએ જીવ ગુમાવ્યા હતા.
મહિલા આતંકીઓની નવી પાંખ UNSC ના પ્રતિબંધિત સંગઠનો પર નજર રાખતી ટીમ દ્વારા જારી કરાયેલા અહેવાલ મુજબ, જૈશના ચીફ અને વૈશ્વિક આતંકી મસૂદ અઝહરે હુમલાના બરાબર એક મહિના પહેલા, એટલે કે ઓક્ટોબર 2025માં 'જમાત-ઉલ-મુમિનાત' નામની મહિલા પાંખની રચના કરી હતી. આ પાંખનો મુખ્ય હેતુ આતંકી પ્રવૃત્તિઓમાં સહાય કરવાનો છે.
લાલ કિલ્લાના હુમલા બાદ NIA (નેશનલ ઇન્વેસ્ટિગેશન એજન્સી) એ તપાસ તેજ કરી હતી, જેમાં આ હુમલા પાછળ 'વ્હાઇટ કોલર ટેરર મોડ્યુલ' હોવાનું બહાર આવ્યું હતું. અત્યાર સુધીમાં આ કેસમાં 3 ડોક્ટરો સહિત કુલ 9 લોકોની ધરપકડ કરવામાં આવી છે.
પહલગામ હુમલો અને ભારતનો વળતો પ્રહાર રિપોર્ટમાં જમ્મુ-કાશ્મીરના પહલગામમાં એપ્રિલ 2025માં થયેલા હુમલાનો પણ ઉલ્લેખ છે, જેમાં લશ્કર-એ-તૈયબાના પ્રોક્સી સંગઠન TRF એ 26 નાગરિકોની હત્યા કરી હતી. આ હુમલાના જવાબમાં ભારતે મે 2025માં પાકિસ્તાન સ્થિત આતંકી ઈન્ફ્રાસ્ટ્રક્ચર પર સર્જિકલ એક્શન લીધી હતી, જેના પરિણામે બંને દેશો વચ્ચે ચાર દિવસ સુધી સૈન્ય અથડામણ ચાલી હતી.
પાકિસ્તાનનો દાવો પોકળ સાબિત થયો એક તરફ પાકિસ્તાન આંતરરાષ્ટ્રીય મંચ પર એવો દાવો કરી રહ્યું છે કે જૈશ-એ-મોહમ્મદ હવે 'નિષ્ક્રિય' (Defunct) થઈ ગયું છે, ત્યારે બીજી તરફ સંયુક્ત રાષ્ટ્રના આ રિપોર્ટે સાબિત કરી દીધું છે કે આ સંગઠન હજુ પણ સક્રિય છે અને નવા મોડ્યુલ સાથે ભારતને નિશાન બનાવી રહ્યું છે. NIAને તપાસમાં આ હુમલાના તાર 'અંસાર ગઝવત-ઉલ-હિંદ' સાથે જોડાયેલા હોવાના પુરાવા પણ મળ્યા છે.

લાલ કિલ્લા હુમલા પાછળ 'જૈશ'નો હાથ

નવેમ્બર'25ના હુમલામાં 15ના મોત થયા હતા; જૈશના પુરાવા મળવાથી આંતરરાષ્ટ્રીય સ્તરે ઘટસ્ફોટ

February 12, 2026 | 14:14 IST