જગદીપ ધનખડે રાજીનામાનું સાચું કારણ જણાવી ચોંકાવ્યા

ભારતના રાજકારણમાં ગયા વર્ષે જુલાઈ મહિનામાં આવેલો સૌથી મોટો ભૂકંપ એટલે પૂર્વ ઉપરાષ્ટ્રપતિ જગદીપ ધનખડનું અચાનક રાજીનામું. મહિનાઓ સુધી ચાલેલી વિવિધ રાજકીય અટકળો અને વિવાદો બાદ, આખરે ધનખડે મૌન તોડ્યું છે. રાજસ્થાનના ચૂરૂમાં એક જાહેર કાર્યક્રમ દરમિયાન તેમણે પોતાના પદત્યાગ પાછળનું સાચું અને વ્યક્તિગત કારણ જણાવીને સૌને આશ્ચર્યમાં મૂકી દીધા છે.

સ્વાસ્થ્ય કે માંદગી? ધનખડે સ્થિતિ સ્પષ્ટ કરી : 

ચૂરૂમાં સભાને સંબોધતા પૂર્વ ઉપરાષ્ટ્રપતિએ સ્પષ્ટતા કરી હતી કે તેમનો નિર્ણય કોઈ ગંભીર બીમારીને આભારી નહોતો. તેમણે ભારપૂર્વક જણાવ્યું કે વ્યક્તિએ જીવનમાં હંમેશા સ્વાસ્થ્યને સર્વોચ્ચ પ્રાથમિકતા આપવી જોઈએ. પ્રાચીન કહેવતને યાદ કરતા તેમણે કહ્યું હતું કે પોતાની તંદુરસ્તી જ સૌથી મોટું સુખ છે અને તેમણે ક્યારેય પણ આ બાબતે સમાધાન કર્યું નથી. તેમણે એ વાતનો પણ ઉલ્લેખ કર્યો કે જ્યારે તેમણે પદ છોડ્યું ત્યારે પણ તેમણે ક્યારેય પોતાને અસ્વસ્થ ગણાવ્યા નહોતા, પરંતુ માત્ર પોતાની જીવનશૈલી અને સ્વાસ્થ્યની સુધારણા માટે આ પગલું ભર્યું હતું.

રાજકીય ગરમાવો અને વિપક્ષના સવાલો : 

જ્યારે 21 જુલાઈ, 2025ના રોજ જગદીપ ધનખડે રાષ્ટ્રપતિને પોતાનું રાજીનામું સોંપ્યું ત્યારે દેશભરમાં અનેક તર્ક-વિતર્ક શરૂ થયા હતા. ખાસ કરીને વિરોધ પક્ષના નેતા રાહુલ ગાંધીએ આ મામલે સરકારને ઘેરતા આશંકા વ્યક્ત કરી હતી કે આ રાજીનામા પાછળ કોઈ અદ્રશ્ય રાજકીય દબાણ અથવા રહસ્ય છુપાયેલું છે. વિપક્ષે એવો પણ સવાલ ઉઠાવ્યો હતો કે રાજ્યસભાના અધ્યક્ષ તરીકે સતત સક્રિય રહેતા વ્યક્તિ અચાનક જાહેર જીવનમાંથી કેમ અલિપ્ત થઈ ગયા. ધનખડના તાજેતરના નિવેદને હવે આ તમામ સવાલો અને શંકાઓ પર પૂર્ણવિરામ મૂક્યું છે.

ચૂરૂની મુલાકાતના રાજકીય અર્થઘટન : 

પોતાના ચૂરૂ પ્રવાસ દરમિયાન જગદીપ ધનખડે પૂર્વ કોંગ્રેસ સાંસદ રામ સિંહ કસવાંની મુલાકાત લીધી હતી. આ મુલાકાતની યજમાની કોંગ્રેસી નેતાઓ દ્વારા કરવામાં આવતા રાજકીય ગલિયારાઓમાં નવી ચર્ચાઓ શરૂ થઈ છે. જોકે, પૂર્વ ઉપરાષ્ટ્રપતિએ આ મુલાકાતને સંપૂર્ણપણે બિન-રાજકીય ગણાવી હતી અને જણાવ્યું હતું કે તેઓ માત્ર કસવાંની ખબર પૂછવા અને તેમની તબિયત જાણવા માટે આવ્યા હતા.

નવા ઉપરાષ્ટ્રપતિની વરણી : 

જગદીપ ધનખડના આકસ્મિક વિદાય બાદ દેશમાં ઉપરાષ્ટ્રપતિ પદ માટે ચૂંટણી યોજાઈ હતી, જેમાં સી.પી. રાધાકૃષ્ણન વિજયી થયા હતા અને હાલમાં તેઓ આ બંધારણીય પદની જવાબદારી નિભાવી રહ્યા છે. ધનખડના આ ખુલાસા બાદ હવે સ્પષ્ટ થયું છે કે તેમનો નિર્ણય સંપૂર્ણપણે વ્યક્તિગત અને જીવનના મૂલ્યો પર આધારિત હતો.