લેહ જઈ રહેલી ઈન્ડિગોની ફ્લાઈટનું ટેકનિકલ ખામી સર્જાતા ઇમરજન્સી લેન્ડિંગ, વિમાન સુરક્ષિત દિલ્હીમાં ઉતર્યું

અમદાવાદમાં થયેલા અકસ્માત બાદ દેશમાં સતત વિમાનોનું ઈમરજન્સી લેન્ડિંગ જોવા મળી રહ્યું છે. ગુરુવારે સવારે દિલ્હીથી લેહ જઈ રહેલી ઈન્ડિગોની ફ્લાઈટ 6E 2006નું ટેકનિકલ કારણોસર ઈમરજન્સી લેન્ડિંગ કરવામાં આવ્યું હતું. ફ્લાઈટમાં હાજર તમામ મુસાફરો સુરક્ષિત છે.

મળતી માહિતી મુજબ, ઈન્ડિગો ફ્લાઈટમાં ક્રૂ મેમ્બર સહિત લગભગ 180 લોકો સવાર હતા. ગુરુવારે સવારે ફ્લાઈટ દિલ્હીથી લેહ માટે ઉડાન ભરી હતી. લેહ પહોંચતા થોડા સમય પહેલા જ ટેક્નિકલ ખામી જોવા મળી હતી. લેહ પહોંચ્યા પછી તરત જ વિમાન પરત ફર્યું અને દિલ્હીમાં સુરક્ષિત રીતે ઉતર્યું. હાલમાં, તે ટેકનિકલ ખામી અંગેની માહિતી સત્તાવાર રીતે જાહેરાત કરવામાં આવી નથી.

બુધવારે ઈન્ડિગોની ફ્લાઈટ રદ્દ કરવી પડી હતી. ફ્લાઈટ 6E 6101 ભુવનેશ્વરથી કોલકત્તા જવાની હતી. જોકે, ટેકઓફ પહેલા થોડી મિનિટો પહેલા ફ્લાઈટ રદ્દ કરવામાં આવી હતી. તેનું કારણ પ્લેનમાં ટેકનિકલ ખામી હોવાનું પણ કહેવામાં આવ્યું હતું.

આ પહેલા 2 જૂનના રોજ રાંચીમાં ઇન્ડિગોનું એક વિમાન ગીધ સાથે અથડાયું હતું, જેના કારણે ઇમરજન્સી લેન્ડિંગ કરવું પડ્યું હતું. પટનાથી કોલકાત્તા વાયા રાંચી જતી ફ્લાઇટ લગભગ 3-4 હજાર ફૂટની ઊંચાઈએ હતી. તે સમયે એક ગીધ તેની સાથે અથડાયું હતું. ટક્કર બાદ, વિમાન લગભગ 40 મિનિટ સુધી હવામાં રહ્યું. ઇન્ડિગોની આ ફ્લાઇટમાં ક્રૂ મેમ્બર સહિત 175 મુસાફરો હતા.

પક્ષી સાથે અથડાયા બાદ મુસાફરો ગભરાઈ ગયા હતા. વિમાનના ક્રૂ મેમ્બરોએ તેમને આશ્વાસન આપ્યું હતું. પાયલોટે સતર્કતા બતાવી અને રાંચીના બિરસા મુંડા એરપોર્ટ પર વિમાનને સુરક્ષિત રીતે લેન્ડ કર્યું. જોકે, બાદમાં એન્જિનિયરોની ટીમે ટક્કરને કારણે વિમાનને થયેલા નુકસાનનું મૂલ્યાંકન કર્યું. રાંચીના બિરસા મુંડા એરપોર્ટ પર પક્ષીઓને કારણે વિમાનની ઉડાન ખોરવાઈ હોવાની આ પહેલી ઘટના નથી. 8 મેના રોજ પણ દિલ્હી-રાંચી એર ઇન્ડિયા એક્સપ્રેસ (IX 116)માં કબૂતરની પાંખમાં ફસાઈ જવાને કારણે ખામી સર્જાઈ હતી. લેન્ડિંગ પછી ટેકનિકલ ખામી શોધી કાઢવામાં આવી હતી.