માઇક્રોસોફ્ટ અને ગૂગલના બદલે હવે સ્વદેશી 'ઝોહો'

ભારતના કેન્દ્રીય IT મંત્રી અશ્વિની વૈષ્ણવે ભારતીય ઉત્પાદનોને પ્રોત્સાહન આપવા માટે એક મોટું પગલું ભર્યું છે. તેમણે ટ્વિટર પર જાહેરાત કરી કે તેઓ હવે ડોક્યુમેન્ટ્સ, સ્પ્રેડશીટ્સ અને પ્રેઝન્ટેશન જેવા કાર્યો માટે માઈક્રોસોફ્ટ અને ગૂગલના પ્લેટફોર્મ્સને બદલે 'ઝોહો' (Zoho)નો ઉપયોગ કરશે. આ સાથે જ તેમણે ભારતના નાગરિકોને 'સ્વદેશી' ઉત્પાદનો અને સેવાઓ અપનાવવાની અપીલ પણ કરી છે.

ઝોહો શું છે?

1996માં શ્રીધર વેમ્બુ અને ટોની થોમસ દ્વારા સ્થપાયેલી ઝોહો કોર્પોરેશન એક સોફ્ટવેર-એઝ-એ-સર્વિસ (SaaS) કંપની છે. તેનું મુખ્ય મથક ભલે અમેરિકામાં હોય, પરંતુ તે ભારતમાં 'મેડ ઇન ઇન્ડિયા'ની ભાવના સાથે કામ કરે છે અને તેની મોટાભાગની કામગીરી ગ્રામીણ તમિલનાડુમાંથી ચાલે છે. કંપની 150થી વધુ દેશોમાં 100 મિલિયનથી વધુ યુઝર્સ ધરાવે છે.

ઝોહો 55થી વધુ ક્લાઉડ-આધારિત બિઝનેસ ટૂલ્સ ઓફર કરે છે, જેમાં ઈમેલ, એકાઉન્ટિંગ, HR, પ્રોજેક્ટ મેનેજમેન્ટ અને સીઆરએમનો સમાવેશ થાય છે. તેના લોકપ્રિય પ્રોડક્ટિવિટી એપ્સમાં ઝોહો રાઈટર, ઝોહો શીટ અને ઝોહો શોનો સમાવેશ થાય છે, જે સીધા માઈક્રોસોફ્ટ ઓફિસ 365 અને ગૂગલ વર્કસ્પેસ સાથે સ્પર્ધા કરે છે.

ઝોહોની વિશેષતાઓ:

ડેટા પ્રાઇવસી: ઝોહોની સૌથી મોટી ખાસિયત એ છે કે તે તેના યુઝર્સના ડેટાની ગોપનીયતા જાળવી રાખે છે, કારણ કે તેની આવક જાહેરાતો પર આધારિત નથી.

સસ્તું: માઈક્રોસોફ્ટ અને ગૂગલની સરખામણીમાં ઝોહોના પ્લાન ઘણા સસ્તા છે, જેના કારણે તે ભારતમાં ખાસ કરીને નાના અને મધ્યમ કદના ઉદ્યોગોમાં ખૂબ જ લોકપ્રિય છે.

સ્વ-નિર્ભરતા: સરકાર 'ટેકનોલોજિકલ સેલ્ફ-રીલાયન્સ' પર ધ્યાન કેન્દ્રિત કરી રહી છે, ત્યારે ઝોહો જેવી ભારતીય કંપનીઓને પ્રોત્સાહન આપવાથી આ ઉદ્દેશ્યને વેગ મળશે.

કેન્દ્રીય મંત્રીના આ પગલાથી અન્ય સરકારી વિભાગો અને ખાનગી ક્ષેત્રની કંપનીઓ પણ ભારતીય પ્લેટફોર્મ્સને અપનાવવા માટે પ્રોત્સાહિત થઈ શકે છે.