ભારત સરકારે આતંકવાદ સામે લડવા માટે એક વ્યાપક અને શક્તિશાળી માળખું તૈયાર કર્યું છે. સોમવારે ગૃહ મંત્રાલય દ્વારા 'PRAHAAR' (પ્રહાર) નામની દેશની પ્રથમ રાષ્ટ્રીય આતંકવાદ વિરોધી નીતિ જાહેર કરવામાં આવી છે. આ આઠ પાનાની નીતિમાં આતંકવાદના તમામ સ્વરૂપોને રોકવા માટે ગુપ્તચર માહિતી આધારિત માળખા (Intelligence-led structure) પર ભાર મૂકવામાં આવ્યો છે.
નીતિના મુખ્ય મુદ્દાઓ: 'પ્રહાર' ના 5 મંત્ર
1. ઝીરો ટોલરન્સ: આતંકવાદને કોઈ પણ ધાર્મિક, વંશીય કે વૈચારિક આધારે યોગ્ય ઠેરવી શકાય નહીં. ભારત આતંકવાદના તમામ પ્રકારોની કડક નિંદા કરે છે.
2. ઇન્ટરનેટ અને સોશિયલ મીડિયા પર નજર: નીતિમાં સ્પષ્ટપણે જણાવાયું છે કે આતંકી સંગઠનો ઇન્ટરનેટનો ઉપયોગ સંપર્ક, ભરતી અને જિહાદના ખોટા પ્રચાર માટે કરે છે. એજન્સીઓ હવે ડાર્ક વેબ, ક્રિપ્ટો વોલેટ અને એન્ક્રિપ્શન જેવી ટેકનિકલ પડકારોનો સામનો કરવા સજ્જ બનશે.
3. એજન્સીઓ વચ્ચે તાલમેલ: ઇન્ટેલિજન્સ બ્યુરો (IB) હેઠળની જોઈન્ટ ટાસ્ક ફોર્સ ઓન ઇન્ટેલિજન્સ (JTFI) અને મલ્ટી એજન્સી સેન્ટર (MAC) ને વધુ મજબૂત બનાવવામાં આવશે જેથી રિયલ-ટાઇમ માહિતી શેર કરી શકાય.
4. ફંડિંગ અને OGW નેટવર્ક: આતંકવાદીઓને મળતા નાણાકીય સ્ત્રોતો (Funding) ને કાપી નાખવા અને ઓવરગ્રાઉન્ડ વર્કર્સ (OGW) ના નેટવર્કને તોડી પાડવા પર વિશેષ ધ્યાન આપવામાં આવ્યું છે.
5. ત્રણેય મોરચે સુરક્ષા: ભારતને જમીન, પાણી અને આકાશ&mdash;ત્રણેય માર્ગે આતંકી જોખમ છે. તેથી રેલવે, બંદર, પરમાણુ ઉર્જા અને અંતરિક્ષ જેવા મહત્વના ક્ષેત્રોની સુરક્ષા માટે અત્યાધુનિક ટેકનોલોજીનો ઉપયોગ કરવામાં આવશે.
વૈશ્વિક પડકારો અને માનવાધિકાર
આ નીતિમાં અલ-કાયદા અને ISIS જેવા વૈશ્વિક આતંકી સંગઠનોના જોખમનો ઉલ્લેખ કરવામાં આવ્યો છે. સાથે જ એમ પણ કહેવાયું છે કે આતંકવાદ સામેની આ લડાઈ માનવાધિકાર અને કાયદાના શાસન પર આધારિત હશે. સરકાર માત્ર આતંકવાદીઓને જ નહીં, પરંતુ કટ્ટરપંથ ફેલાવતા કારણોને પણ ખતમ કરવા પર ધ્યાન કેન્દ્રિત કરશે.
આ નીતિ એવા સમયે આવી છે જ્યારે ભારત લાંબા સમયથી સીમાપારના આતંકવાદનો સામનો કરી રહ્યું છે. 'પ્રહાર' દ્વારા ભારત હવે આક્રમક અને સુરક્ષાત્મક એમ બંને વ્યૂહરચના સાથે આતંકવાદને જડબાતોડ જવાબ આપવા તૈયાર છે.

આતંકવાદ વિરોધી નીતિ 'પ્રહાર' જાહેર

ગૃહ મંત્રાલયનો માસ્ટરપ્લાન; જમીન, આકાશ અને સમુદ્ર ત્રણેય મોરચે સુરક્ષા અભેદ

February 23, 2026 | 18:50 IST